AYEGHLE 8
DZIA 130 Djiighe ye n’nem ôse
Aval avé bi ne vu é fulu ndjiane Jehôva ?
« Aval ane Jehôva a nga djii mia ye n’nem ôse, mia fe, mia yiène djii é bôr bevoo ya n’nem ôse » (BECOL. 3:13).
É DZAM BIA YE YEN
Ayeghle di été, bia ye yen é mam bi ne bo naa bi djii é môr a va vus ye bia.
1-2. (a) Éyong évé é ne bia dang tobe ndzukh naa bi djii é môr mboo ? (b) Dzé é nga vole Denise naa a djii ?
YE É ne mia ndzukh a djii é bôr bevoo ? Ôwé, ébe abuiñ y’ébe bia é ne édedèè ndzukh, dang-dang éyong môr a va dzô nge ki a bo é dzam da bira bia dzughu a n’nem. Ve, bi ne bo mam mézing me ne bia vole a sim naa bia wokh ôlun ye djii é bôr bevoo. N’ñonghan éfônane kal dzèè ézing, a too éyôla naa Denise a. A nga lere mura fulu ndjiane. Mbu 2017, Denise ye é nda-bôr dzèñ be nga ke fep tsîn étobgha Bengaa Jehôva. Éyong be mbe a zen naa ba bulan é nda dzeba, ane ndure metua ézing a nga ke yimi metua wôba. Denise a nga dzimle ken. Niène a nga véé, ane be nga kare ñe naa, é boan bèñ be va dzime dzukh, ye naa, n’nôm wèñ, Brian, a nga wu. Éyong a bera simane tam té, Denise a dzô naa : « Me nga wôrane naa me ne ntsaane ye nzaman. » Ôsu vèè, a nga wokh naa metua éñe a mbe bidzô, se ki ndure metua émièn. Ane a nga yaghlane Jehôva naa a ve ñe mvoa.
2 Be nga biñ ndure metua té ye kikh ñe nsang amu a nga wiñ n’nôm, ve kaa naa a nga vang de bo. Ye nsang té, nge be nga kikh naa a ku, a mbe ke a mbokh. Ve, ane abèè da kikh minsang é nga dzô Denise naa, nsang ba ye kikh môr té ô tsii ye é dzam Denise a ye ke kobe. Denise a dzô naa : « Me mbe mé wôran ane môr a va bera me wiè meveng me mbe nlaran, ye bera shuii nku été, amu me nga yiène kobe adzô ye metam me nga dang ndzukh éning dam. » Fave ayôm besono ôsu, ane Denise a nga ke tobe abèè ba kikh minsang, ye mane kôman aval a ye kobe ye é môr a nga ve naa éñe ye é nda-bôr dzèñ be wôrane bura mintèñ mité. Za dzam a nga dzô ? Denise a nga sili nkikh minsang naa a kué môr té éngôngoo b. Éyong a nga bo naa a maneya kobe, ane nkikh minsang té a nga laa ébii. A nga dzô naa : « Ébe mimbu 25 me lôrang ane nkikh minsang, maa be ki tare wokh aval bifiè bi, abèè di été. Maa be ki tare wokh é nda-bôr be va dzughu dé sili naa be djii nge ki a dzame é môr a va bo be abé. Maa be ki tare wokh aval bifiè bi édzing ye aval bifiè bi ndjiane bité. »
3. Dzé é nga tsini Denise naa a djii ?
3 Dzé é nga vole Denise naa a lere n’nem éngôngoo ? A ne a binan ébe é fulu ndjiane Jehôva (Michée 7:18). Nge bia dzing aval Jehôva a djii bia, da ye fe bia tsini naa bi djii é bôr bevoo.
4. Za dzam Jehôva a kômô naa bi bo ? (Beéphésien 4:32).
4 Jehôva a kômô naa bi djii é bôr bevoo ye n’nem ôsese (a lang Beéphésien 4:32). A yane naa bi tobe nkoghan a djii é bôr besese ba bo bia abé (Bya 86:5 ; Luc 17:4). Ayeghle di été, bia ye yen é mam melal me ne bia vole a dang bera lere fulu ndjiane.
MI TAA BIANE É MAM MIA WÔRAN
5. Aval ane bia lang de nten Minkana 12:18, za dzam bi ne wôran éyong môr a dzughu bia ?
5 É ne bia bo édedèè mintèñ éyong môr a dzô nge ki a bo é dzam da dzughu bia, dang-dang nge a ne mvuiñ dzèè nge ki môr ye é nda-bôr dzèè (Bya 55:12-14). Biyong bizing, mintèñ bia wôrane mi ne bo édedèè ngu’u, ane be va dzii bia ôkeng (a lang Minkana 12:18). É ne kuiñ naa bia dzeng naa bia dzim nge ki a biane mintèñ bia wôran. Ve, a bo de é ne ane éyong be va dzii bia ôkeng, ye likh ôkeng té ô beme aveng été. Aval dèè fe, bii se ki yane naa mintèñ bia wôran mi man nge bia tsini naa bia biane mio.
6. Dzam évé bi ne kômô bo éyong môr a dzughu bia ?
6 Éyong môr a va bo bia é dzam é ne abé, é dzam ôsua bi wôla kômô bo, é ne naa bia wokh ôlun. Bible a yebe naa, bi ne faa wokh ôlun. Ve, a bame fe bia naa, biaa yiène ki tsini naa bia wokh ôlun (Bya 4:4 ; Beéph. 4:26). Amu dzé ? Amu naa, é mam bia wôrane me ne bia tsini naa, bi bo mam aval ézing. Atoo fe naa, mboane té waa sughlane ki mbeng (Jacq. 1:20). Bi taa vuène naa, bi ne wokh abé éyong môr a dzughu bia. Ve dèè, bi ne top naa bia sim nge ki bia tsini naa bia wokh abé.
Bi ne sia wokh ôlun, ve, a tsini naa bia wokh ôlun é ne é dzam bia top
7. Za aval afe bi ne wôran éyong môr a dzughu bia ?
7 Éyong môr a bo bia abé, é ne ve naa bi wôran aval mintèñ mife. Éfônan, kal dzèè ézing a too éyôla naa, Anne, a dzô naa : « Éyong me mbe mong, tare a nga likh nane naa a ke lughane ye é minenga be mbe bé yaane naa a kale ma. Me nga wôrane naa a lameya ma. Éyong be nga byèñ é boan beba, me nga wôrane naa me dzimleya éto dam. Me nga vem mé wôrane naa baa dzing ki ma. » Kal dzèè ézing éfe, a too éyôla naa Georgette, ñe a kanghle fe é dzam a nga wôran éyong n’nôm a nga bo medzian. A dzô naa : « Bi mbe memvuiñ atéé ye bi nga so bong. Bi mbe fe bempwaghe mefan nsama ! Dzam té, é nga ve ma bura mintèñ a n’nem. » Kal dzèè ki, a ne éyôla naa, Naomi, ñe a dzô naa : « Méé dzi ki vaghle tem môs ézing naa n’nôm wom a mbe me dzughu. Éde, éyong a nga dzô me naa, a nga daghe pornografía, ye naa a nga shuale me de, me nga wôrane naa a nga kong ma. »
8. (a) Mekalgha mevé bi bele ma ve bia naa, bia yiène djii é bôr bevoo ? (b) Za biboran bia ñong éyong bia djii ? (A daghe fe nkaale « Dzé bi ne bo nge môr a va bira bia dzughu ? »).
8 Bii se ki kame bôr naa, be dzô nge ki a bo bia mam mézing, ve bi ne kikh aval bi ne yalan. Ye naa, abuiñ biyong, éyalane da dang mbeng a ne a djii. Amu dzé ? Amu bia dzing Jehôva, ye naa, a kômô naa bi djii. Nge bi tsini naa bia wokh ôlun ye bo kaa djii é bôr bevoo, bi ne vane bo é dzam é ne kaa yiène, ye dang bera dzukh (Mink. 14:17, 29, 30). Tamane daghe éfônane kal dzèè ba luè naa Christine. A dzô naa : « Éyong ma wokh ôlun, maa dang ki fe wuèñ. Da ve fe me naa, me dzi bidzi bii se ki mbeng. Maa tugha ki ke ôyô, ye naa, é ne me ndzukh naa me djié awôrane dam. Dzam té da ndaghle alukh dam, ye élar me bele ye é bôr bevoo. »
9. Amu dzé bia yiène sim naa bia wokh ôlun ?
9 Amben é môr a va dzughu bia aa sili ki bidzamgha, bia yiène dzeng naa, bi taa de dang ve a n’nem. Amu dzé ? Georgette, éñi bi va tu ôyô, a dzô naa : « É nga sili ôyôm tam, ve me nga sim naa ma wokh abé ye ôlun ye é môr a mbe me n’nôm. Asughlan, ane me nga wôrane môra mvoa. » Éyong bia sim naa bia wokh ôlun, dzam té da vole bia naa, bi taa likh ôlun bia wôran, ô ndaman élar bi bele ye é bôr bevoo. Bia ve fe bia bebién das éyong bia bo de. A sum ye vèè, bi ne bera tsini éning dèè ye mesan (Mink. 11:17). Ve, nge da kuiñ naa, bi yebeyang awôrane dèè, bi nee bo yè, nge é ne bia ndzukh naa bi djii ?
AVAL BI NE SIM NAA BIA WOKH ÔLUN
10. Amu dzé bia yiène ve bia bebién tam naa, bi sim naa bia wokh ôlun ? (A daghe fe bivaghle).
10 Dzé é ne bia vole naa bi sim naa bia wokh ôlun ? É dzam évoo bi ne bo, é ne a ve bia bebién tam ya let. Éyong é môr a ne nkôkoan a ñu mebiang, da sili tam naa, mebiang meté me tugha ke ma wogho a ñuu été, nfa ye naa a let. Aval dèè fe, naa bi djii môr ye n’nem ôsese, é ne sili ôyôm tam (Eccl. 3:3 ; 1 Pierre 1:22).
Aval ane ña aveng da sili naa be sèñ de, ye tam naa é let, é ne fe aval dèè éyong môr a va dzughu bia (A daghe abong 10)
11. Aval avé meyaghlan me ne bia vole a djii ?
11 Dzaaghe Jehôva meyaghlan été naa, a vole wa a djii c. Anne, éñi bi va tu ôyô, a kanghle aval meyaghlan me nga vole ñe. A dzô naa : « Me nga dzaa Jehôva naa a djii kada môr ye é nda-bôr dzèè, é mam mesese bii dzi ki yem bo. A kôre ye vèè, ane me nga tsili kalare akal ésaa wom, ye é minenga a nga lukh, naa me dzô be naa me djiiya be. » Anne a yebe naa, dzam té déé mbe ki ébubu. Ve, a koghle naa : « Ma bunu naa, a dzeng naa me vu é fulu ndjiane Jehôva, da ye vole tare ye é minenga wéñ naa be kômô yeghe a yem Jehôva. »
12. Amu dzé bia yiène dang ve mebun mèè ébe Jehôva a lôr aval bia wôran ? (Minkana 3:5, 6).
12 Vakh mebun muè ébe Jehôva, se ki ébe é mam wa wôran (a lang Minkana 3:5, 6). Jehôva a tugha yem é dzam da dang mvèñ akal dèè, éyong ésese (Esaïe 55:8, 9). Aa ye ki bia vaghle sili naa bi bo é dzam é ne bia dzughu. Éde, éyong a saghe bia naa bi djii, bi ne bele ndzi-n’nem naa, dzam té da ye so bia abuan (Bya 40:4 ; Esaïe 48:17, 18). Nfa mboo ki, nge bi ve mebun ébe mesimane mèè, biaa ye ki vaghle kuiñ tam ézing naa bi djii (Mink. 14:12 ; Jér. 17:9). Naomi, éñi bi va tu ôyô, a dzô naa : « Ôsusua me mbe mé tem naa, maa yiène ki djii n’nôm wom, amu a mbe é yen pornographie. Me mbe mé ko wong naa a bera me dzughu éyong éfe, nge ki naa, a vuène mintèñ misese a nga ve ma. Me mbe mé tem naa, Jehôva a mbe é wokh é dzam ma wôran. Éde me nga sum yen naa, se ki amu Jehôva a wokh é dzam ma wôran, éde da yili naa a yebe de. A yem é dzam ma wôran, ye naa, da sili tam naa me let, ve a kômô fe naa, me djii d. »
AVAL BI NE BELE MBEMBA AWÔRAN
13. Aval ane bia lang de nten Beromain 12:18-21, za dzam bia yiène bo ?
13 Éyong bia djii é môr a va bira bia dzughu, biaa sughu ki fave a kikh naa biaa ye ki fe bera tsiè dzam té. Nge é môr a va bo bia abé, a ne moadzang nge ki kal dzèè ya nsisim, nsonghane wèè ô ne naa, mvoa é bera bo (Mat. 5:23, 24). Ndaane naa bia tsini ôsu naa bia wokh ñe abé, bia ñong nkighane naa bia lere mvam ye djii ñe (a lang Beromain 12:18-21 ; 1 Pierre 3:9). Dzé é ne bia vole naa bi bo dzam té ?
14. Za dzam bia yiène ve mengu’u naa bi bo, amu dzé ki ?
14 Bia yiène ve mengu’u naa bi yen é môr a va bo bia abé aval Jehôva a yen ñe. Jehôva a top naa, a yen é mam me ne mbeng ébe boan be-bôt (2 Mila. 16:9 ; Bya 130:3). Bi wôla yen ébe bôt, é mam bia top naa bia yen ébe bo, a bo mbeng nge ki abé. Éyong bia top é mam me ne mbeng ébe bôt, da ye bia bo ébubu naa, bi djii be. Éfônan, moadzang ézing a too éyôla naa, Jarrod a dzô naa : « Ma yen naa, da dang ma ébubu naa me djii moadzang wom, éyong ma vaghane abé a va bo ma ye é ndanguna mam ma ñeghe ma yen ébe ñe. »
15. Amu dzé é ne bo éban naa bi dzô môr naa, bi djiiya ñe ?
15 É dzam afe é ne bo éban bia yiène dzeng naa bi bo, é ne a kare é môr mboo naa, bi djiiya ñe. Amu dzé ? Tamane bili é dzam Naomi, éñi bi va tu ôyô a dzô : « N’nôm wom a nga sili me naa, ‘Ye ô djiiya ma ?’ Éyong me nga wiè anu naa ma dzô ñe naa, ‘Me djiiya wa’, éde abukh é nga biñ ma. Éñe me nga yem vèè naa, abong té, a ke kuane naa, méé be ki ñe djii ye n’nem wom ôse. Ye tam, me nga bele ngu’u ya dzô ñe é bura bifiè bilal bi, ‘Me djiiya wa.’ Éyong me nga djii ñe aval té, n’nôm wom a mbe a bele mighi ô mis. Me nga bira kam abim avé dzam té é nga tobe ñe mbeng. Atéé ye éyong té, éde me nga bera sum naa ma tobe ñe mebun. Abong di, bi bereya bo bura mengom. »
16. Za dzam mi va yeghe nfa fulu ndjiane ?
16 Jehôva a kômô naa bi djii (Becol. 3:13). Ve, amben nèè té, é ne bia bo ndzukh naa bi djii é bôr bevoo. Ve, bi ne de bo nge biaa biane ki é mam bia wôran, ye ve mengu’u naa bi vèè me. Akôre ye vèè, bi ne bera sum naa bia bele mbemba awôran (a daghe nkaale « É mam melal ô ne bo naa ô djii é bôr bevoo »).
A BEMBE ÉBE ABUAN É NE ÉYONG WA DJII
17. Aval avé bia ñong abuan éyong bi bele fulu ya djii ?
17 Bi bele abuiñ mekalgha ma tsini bia naa, bi djii. Ntamane yen mevoo me ye été. Ôsusua, bia vu ye ve Ésaa wèè a ne mvam, Jehôva, n’nem mbeng (Luc 6:36). Édi bèè, bia ve akiba akal é fulu ndjiane Jehôva a va lere bia (Mat. 6:12). Ye édi lal, bia buane mbemba mvoa minsôn, ye bele fe mengom me ne ngu’u.
18-19. Za dzam é ne boban éyong bia djii ?
18 Éyong bia djii é bôr bevoo, bi ne wôran biboran bii mbaa ki bi yane. Éfônan, tamane daghe é dzam é nga kuiñ Denise, éñi bi va tu ôyô. Amben éé be ki é yem de tam té, é môr a nga yimi be metua, a nga ñong nkighane naa, a ye wiñ émién niène ba mane ñe kikh nsang. Ve, amu Denise a nga djii ñe, dzam té é nga bira ñe name, éde a nga sum naa a yeghe Bible ye Bengaa Jehôva.
19 Bi ne simane naa, a djii é môr mboo, a ne dzam dèè ye é mam ma dang ndzukh bia yiène bo, ve, ngeng ézing, a ne fe dzam dèè da dang nfi (Mat. 5:7). Éde, nkehane ôsu ye ve mengu’u mèè mesese, naa bi vu é fulu ndjiane Jehôva.
DZIA 125 « Mvom ébe é bôr ba yen éba bevoo éngôngoo ! »
a Be nga tsen biyôla bizing.
b Aval étéñ té, kada kristen a yiène ñong nkighane wéñ.
c A daghe a nden jw.org bingengeng bi ye ngura aval bya « Hay que perdonar nge ki Pardonnons-nous les uns aux autres », « A dzame ye n’nem ôse », ye « Bi bereya bo angom. »
d Amben a yen pornografía é ne nsem, ye naa, da dzughu é môr mboo, vedaa, Bible aa dzô ki naa, é môr n’nôm nge ki ngal a bo de a vas alukh.
