YE Ô tareya bele meyep a n’nem amu ô va tubane ndzukh ézing, ve kaa bele é môr a ne wô vole ? Bia ning « metam me ne édedèè ndzukh a zômô » me ne ve naa bi sili mo ôsi, ye likh naa bi wôrane naa bi ne étam (2 Tim. 3:1). Vedèè, bia yiène simane naa, éyong bia tubane mindzukh, bi bele fe é bôr be ne bia vole. Nfa té, Bible a dzô naa ña mengom me ne bia bira vole, « metam me ne ndzukh » (Mink. 17:17).

Éyong a mbe é ke bikena minlômane bièñ, ntôô Paul a mbe é ke ya mengom mèñ mézing. Éde, mengom meté me nga vole ñe meval abuiñ (Becol. 4:7-11). Éyong Paul a mbe a fere mimbokh a Roma, mengom mèñ me nga vole ñe a bo é mam émièñ éé mbe ki bo. Éfônan, Épaphrodite a nga zu kee Paul é biôm bobeñang ye bekal bèñ be ya Philippe be nga lôm ñe (Beph. 4:18). Tíquico nge ki Tychique a nga ke bikôan-bikôan naa a ke likh bekalare Pablo a nga tsili (Becol. 4:7). Ye avole mengom mèñ, Pablo a nga dzale ésèñ dèñ, amben be nga biñ ñe nge ki naa, a mbe étam a nda mimbokh. Aval avé ô ne bo ña angom ému ?

Bifônane bi ye metam mèè, bia lere éban ya bo ña angom. Fasghan éfônan kal dzèè a nga lere naa a ne ña angom akal Elisabet, mpwaghe mefan ya Paña. Éyong be nga yen ñia é cáncer a kuna ñe wiñ, kal dzèè té, é nga lôm Elisabet abuiñ bemensajes be tsii bifus bi ya Biblia naa a saghe ñe. Elisabet a dzô naa : « Bemensajes beté, be nga ve ma ngu’u ya zômô kada môs, kaa ki wôrane naa me ne étam » (Mink. 18:24).

Bi ne wône angom dèè ye bobedzang ye bekal bèè éyong bia vole be naa be ke minkanghle, nge ki be ke bisulan bi ye ékôan. Éfônan, ye ô ne yebe naa wa ke lerane n’nôm moadzang nge ki kal dzaa ésulan nge ki minkanghle ? Nge ô bo de, ô ne be saghe, ye naa, baa fe, ba ye wô saghe (Bero. 1:12). Ve, bekristen bézing béé se ki kôre menda meba. Aval avé bi ne bo ña angom akal deba ?

Bekristen bézing ba koan, nge ki naa bitéñ bife bia ve naa, be taa tobe bisulan a Nda ékôan. Nyeneghan éfônane David, éñi be nga yen ôkoan linfoma nge ki lymphome. Tang a lôt mengoan mesaman, be nga bo ñe quimioterapia nge ki chimiothérapie. Nté sese be mbe bé bo ñe de, David ya ngal, Lidia, be mbe bé yen bisulan a nden.

Za avole mengom meba me ye ékôan deba me nga ve be ? Amanegha kada ésulan, bobedzang ye bekal bèè bézing be mbe a Nda ékôan, be mbe bé ve mengu’u naa be kobe ye David ba Lidia ngalane videoconferencia. Ya fe naa, éyong David ye Lidia be mbe bé yalan, den, bobeñang ye bekal beba, be mbe bé lôm be bemensajes naa ba saghe be. Asughlan é mbe yè ? David ba Lidia be  nga wôrane naa, bobeñang ye bekal beba, ba dzing be.

Éyong ézing bi ne kômane naa, bi kanghle ye moadzang nge ki kal dzèè éé se ki kôre é nda dzèñ. Bi ne songhane boan be-mam mézing mintaane miè été, naa bi sèñ ya be. Aval mboane té, wa ye be lere naa biaa vuène ki be (Mink. 3:27). Ngeng ézing mi ne tsili bekalare ye be, nge ki a kanghle ngalane teléfono ya be. Bemvene be ne fe kômane naa, é bôr be yeme menda meba, be buane fe bisulan akal minkanghle ngalane videoconferencia. David ba Lidia be nga bira dzing ntaane té. David a dzô naa : « A tobe ésulan akal minkanghle ye bobedzang ye bekal bèè be ye abeng minkanghle daa, naa bia kobe ye be ôyôm tam ye bèè meyaghlan, é nga bira bia vole. » Ya fe naa, biyong bizing, nge mi ne de bo, mi ne sili bobedzang nge ki bekal bèè be yeme menda été, nge mi ne zu menda meba ya n’yeghe Bible wônan akal ayeghe dèñ.

Éyong bia lôr tam ya bobedzang ye bekal bèè be yeme menda meba été, bia yeghe a yem be, ye yem é mbemba mefulu meba. Ye fe naa, bia bo mengom me ne édedèè élat ya be. Éfônan, éyong wa bèè ane ba yeghle môr Éfiè Nzame, ye vole ñe a yir Jehôva bébéñ, da ve naa ô dzing be, ye ve naa, ô bele ngang akal deba. Mi ne bele minféféñ mengom éyong mia vole bobedzang ye bekal bèè naa, be ke minkanghle ye bisulan (2 Becor. 6:13).

Éyong Pablo a mbe a tele mindzukh été, angom dèñ, Tito, é nga ke ñe fep. Dzam té, é nga vole ñe naa a wôrane mvèñ (2 Becor. 7:5-7). É ne mbeng naa bi dzô bobedzang ye bekal bèè bifiè bia saghe be. Ve, éfônane Tito da yeghle bia naa, bia fôlô fe be éyong bia lôr tam ya be, ye éyong bia bo mam naa bi vole be (1 Jean 3:18).

Bobedzang ye bekal bèè be ya Rusia be nga ve bemba éfônan, bé sukghane bevoo ye éba bevoo. N’yeneghan é dzam é nga biane Serguéi ba ngal, Tatiana. Niène bizima bi nga mane bo mindzeng é nda dzeba, ane be nga ke be a nda mimbokh naa be ke be sili minsili. Tatiana éñe be nga tare kulu, éde a nga dughan é nda dzeba. Serguéi a kane naa : « Étéñ ébién [Tatiana] a nga kuiñ a nda, ngengaa kal dzèè ézing a nga zu ñe fep a nda. Abuiñ memvuiñ mefe me nga zu ñe vole a ve nda nfuban ye mane de kôm, amu bizima bi nga mane de tsam éyong be nga bo mindzeng. »

Serguéi a koghle naa : « Ma so ma dzing nten Minkana 17:17 é vôm ba dzô naa : “Ña angom da lere édzing tam ése, ye naa, a ne é moanñang a nga byale akal metam me ne ndzukh”. Bifiè bité bi nga bele mura ayilgha akal dam éyong me mbe me tele bitsible été, ye naa, méé mbe ki dang bitsible bité étam. Jehôva a nga ve ma mengom me nga bo ayokh ye vole ma a. »

Atoo naa bia tebe bitéñ bia ke ve abé-abé, bia yi mengom me ne bia vole. Bia ye dang bira yi avole deba é tam bitsible binen. Éde, n’vahane mengu’u mesese mèè naa, bi bo ña mengom atéé ye éndagha ! (1 Pierre 4:7, 8).