1-2. Za biboran é môt a dubaneyang a ye bele ?

 BI NE mevakh éyong bia duban ye bo môt mboo y’é nda-bôt Jehôva. É bôt besese be tele mbemba étéñ té ba yebe bifiè David bi : « Mvom ébe é bôt wa [Jehôva] top ye zu be naa be tobe minseng muè » (Bya 65:4).

² Se ki môt asese éñe Jehôva a zu ñe minseng mièñ. Aval ane bi va yen de ayeghle bi ndaghe mane di, a top naa a dure é bôt be lereyang naa, ba kômô bele élat é ne ngu’u ya ñe (Jacq. 4:8). Éyong wa ve Jehôva éning duè ye duban, wa ve Jehôva éning duè ngum aval. Ô ne tobe ndzi-n’nem naa a ye « wô shuii biboran ya ke kuiñ waa ye ki fe makh dzôm ézing » (Mal. 3:10 ; Jér. 17:7, 8).

3. Bekristen be vehang Jehôva éning deba ye duban, be bele za bura meyem ? (Ecclesiastes 5:4, 5)

³ Bebela a ne naa, a duban a ne fave atarga. Niène ô dubaneyang, wa ye kômô ve mengu’u mesese muè naa, ô baghle é ngiagh ô nga bo naa wa sèhane Jehôva ye tobe sôsôe ya ñe, amben éyong wa tubane meboblan naa ô bo é dzam é ne abé nge ki éyong wa tubane minzukh (A lang Ecclesiastes 5:4, 5). Éyong ô ne n’yeghe Yésu, wa ye tông éfônane dèñ ye tugha yem béé meyeghle mèñ (Mat. 28:19, 20 ; 1 Pierre 2:21). Ayeghle di da ye wô vole a bo de.

 « A TSINI NAA BIA BÉÉ » YÉSU AMBEN BITSIBLE YE MEBOBLAN

4. Aval avé beyeghe Yésu be beghe « nkum minzukh » ? (Luc 9:23)

⁴ Ô taa simane naa niène wa duban, éning duè da ye bo ébubu. Bebela a ne naa, Yésu a nga tugha lere beyeghe bèñ naa, ba ye beghe « nkum minzukh. » Éde, ba ye de bo « môs ane môs » (A lang Luc 9:23). Ye Yésu a mbe éé dzô naa, beyeghe bèñ ba ye dzukh éyong asese ? Kaa dzôm. A nga ngône fave naa, ba ye bele biboran ye minzukh. Minzukh mivoo mi y’été mia ye fe be ve mintèñ (2 Tim. 3:12).

5. Za biborane Yésu a nga kiagh é bôt ba bo metunegha ?

⁵ Éyong ézing é nda-bôt duè é nga tebe wa é ngam ayat nge ki naa, ô nga dzimle abuiñ miang ye biôm nfa ya tele Édjié Nzame ôsu éning duè (Mat. 6:33). Nge éñe é ne nèè, tobe ndzi-n’nem naa, Jehôva a va yen mimboan mi sôsôe muè (Behéb. 6:10). Éyong ézing ô yenang fe é bebela da so bifiè Yésu bi : « Môt ézing éé dzi ki kôre nda, bobeñang, bekal, ñiè, ésaa, boan, nge ki mefup akal dam ye akal mbemba fuèñ, kaa naa a ñong ébe ntet biyong éndagha, menda, bobeñang, bekal, beñiè, boan ye mefup, ya bitsible ye naa nféféñ éning da zu di, éning é ne mbèmbèè » (Marc 10:29, 30). Biboran ô va ñong bia dang abuiñ y’é mam ô va dzimle (Bya 37:4).

6. Amu dzé wa yiène tsini naa wa lumane « mekômgha me ya nsôn » amben ô dubaneyang ?

⁶ Da ye bo éban naa ô tsini naa wa lumane « mekômgha me ya nsôn » amben ô dubaneyang (1 Jean 2:16). É ne aval té amu ô ngen môt a minsem. Biyong bizing ô ne fe wôran é dzam ntôl Pablo nge ki Paul a nga wôran. A nga tsili naa : « Bebela a ne naa, é môt me ne été, a ñeghe atsing Nzame, ve, ma yen é ñuu dzam été atsing da lumane atsing éfe, da wule mesimane mam ye kee ma ane mbokh ébe atsing nsem é ne é ñuu dzam été » (Bero. 7:22, 23). Ô ne sili mo ôsi amu wa lumane mbia mekômgha. Ve, a siman é ngiagh ô nga bo éyong ô nga ve ñe éning duè, da ye veme nkômane wiè ya lumane meboblan. Bebela a ne naa, é ngiagh ô nga bo éyong ô nga ve Jehôva éning duè, da ye ve naa, éning duè é bo ébubu éyong wa ye tubane meboblan. Aval avé ?

7. Aval avé, a ve Jehôva éning duè da ye vole naa ô tsini naa wa tobe ñe sôsôe ?

⁷ Éyong wa ve Jehôva éning duè, wa tep wamièn. Da yili naa wa tep minkômane ye minsonghane muè miaa ve ki Jehôva n’nem mbeng (Mat. 16:24). Éde, éyong ô tele meboblan été, déé se ki éban naa wa ñong abuiñ tam naa wa kè nfa é dzam wa yiène bo. A kuane naa, ô kighang é dzam wa ye top naa wa bo ; da yili naa, a tobe sôsôe ya Jehôva. Wa ye bele nkômane ô ne ngu’u naa, wa tsini naa wa ve Jehôva n’nem mbeng. Nge wa bo aval té, wa ye fônane Job. Amu naa, amben éyong a mbe a tele mbimbia minzukh été, ye ndzi-n’enm ésese, a nga dzô naa : « Maa ye ki kanane ye é sôsôe dam ! » (Job 27:5).

8. Aval avé meyaghlane wa bo éyong wa ve Jehôva éning duè me ne wô vole naa ô dang meboblan ?

⁸ A fas meyaghlan ô nga bo éyong ô nga ve Jehôva éning duè, da ye wô ve ngu’u naa ô dang meboblan mesese. Éfônan, ye wa ye sum naa wa bo bivuiñ bidzing ye é môt mia ñe mii se ki nlughan ? Bebela a ne naa kaa ! A kuane naa, ô dzô-hang, kaa, ébe mam meté. Nge waa likh ki awôrane daa yiène ki é vem n’nem wiè été, waa ye ki lumane naa ô vèè mo melu ma zu. Wa  ye « lum mvus » ébe « é zen mbia bebôt » (Mink. 4:14, 15).

9. Aval avé a fas meyaghlane wa bo éyong wa ve Jehôva éning duè é ne wô vole a tele bisèñ bi ya nsisim ôsu éning duè ?

⁹ Za dzam wa ye bo nge ba ve wa ésèñ da ye ve naa, ô ta bera tobe bisulan éyong ésese ? Wa ye yem é dzam wa yiène bo. Kaa naa be ve wa ésèñ té, ô nga yemang naa, waa ye ki de yebe nge da ye ve naa, ô taa tobe bisulan éyong ésese. Aval té, waa ye ki yebe ésèñ té, éyong té ôsu vèè, ô nga dzeng aval ô ne tele Jehôva ôsu éning duè. Wéé simane nkômane Yésu a mbe a bele naa a ve Ésaa n’nem mbeng, wa ye tep avôô ye n’nem ôsese é dzam ésese é ne ve Nzame n’nem abé, éñi ô nga ve éning duè (Mat. 4:10 ; Jean 8:29).

10. Aval avé Jehôva a ye wô vole naa ô « tsini naa wa béé » Yésu amben ô dubaneyang ?

¹⁰ É dzam wa bo éyong ô tele minzukh ye meboblan été, da lere nté mbé wa kômô « tsini naa wa béé » Yésu. Nté wa bo de, ô ne bele ndzi-n’nem naa, Jehôva a ye wô vole. Bible a dzô naa : « Nzame a ne sôsôe, aa ye ki likh naa mi tubane meboblan a lôt abim mi ne zôme, ve éyong meboblan ma ye bo, a ye kômane zen nfa ye naa ô zôme me » (1 Becor. 10:13).

É DZAM Ô NE BO NAA Ô TSINI NAA WA BÉÉ YÉSU

11. Aval avé da dang mbeng bia béé Yésu ? (A daghe fe évaghle).

¹¹ Yésu a mbe ayông ye naa a nga tobe Jehôva bebéñ meyaghlan été (Luc 6:12). Aval évoo da dang mbeng ô ne tsini naa wa béé Yésu éyong ô dubaneyang, é ne a tsini naa wa bo é mam ma ye wô vole a yir Jehôva bebéñ. Bible a dzô naa : « A bo aval ésese bi vemang, n’tsinighane naa bia wule aval da yiène, zen évoo » (Beph.  3:16). Biyong bizing wa ye wokh bifônane bobedzang ye bekal bèè be nga kikh naa ba bira sèñ akal Jehôva. Éyong ézing be nga bo Sikôlô bekare fuèñ be y’Édjié Nzame nge ki be nga ke tobe é vôm ba yi abuiñ avole. Nge wa, wa ñong fe nsonghane naa wa bo aval mam meté, boghe me ya é ngu’u ése duè. Ayong Jehôva da dzeng aval é ne bira sèñ akal dèñ (Bisè mintôl 16:9). Ve, za dzam é ne boban nge wéé se ki de bo abong di ? Ô taa simane naa, wéé se ki ane é bôt be bohang de. Nkar mbii bekristen, ô ne é dzam é ne mban (Mat. 10:22). Ô taa vuène naa, Jehôva a ne édedèè mevakh éyong wa bo é dzam asese ô ne bo y’abim ngu’u ye fe étéñ duè da likh wô de. A ne aval évoo da dang mbeng ô ne tsini naa wa béé Yésu niène ô dubaneyang (Bya 26:1).

12-13. Za dzam ô ne bo nge wa wôrane naa ayông ô mbe ô bele éyong ô nga sum sèhane Jehôva da sibi ? (1 Becorinthien 9:16, 17) (A daghe fe nkaalé «  Tsinighe nkar mbii »).

¹² Za dzam ô ne bo nge wa wôrane naa, waa yaghlane ki fe ya n’nem ôsese, nge ki naa, waa ñeghe ki fe minkanghle ane metam ô mvus ? Za dzam ô ne bo, nge waa ñeghe ki fe wa lang Bible ane ô mbe wéé ñeghe wa bo de metam ô mvus ? Nge mam mesese meté ma biane wa, niène ô dubaneyang, ô taa kikh naa ô dzimleyang ayebe Jehôva. Ô ne moan môt a minsem, éde, é mam wa wôrane me ne sia tsen. Nge ayông duè é sumang naa da sibi, simghan éfônan ntôl Paul. Amben Pablo nge ki Paul a mbe éé dzeng naa a vu Yésu, a mbe éé yem naa, biyong bizing aa ye ki bele nkômane ô ne ngu’u naa a bo é dzam a yiène bo (A lang 1 Becorinthien 9:16, 17). A nga dzô naa : « Amben maa bo ki de ya n’nem ôsese, daa vèè ki naa be va ve m’ésèñ. » Nge bi ne dzô aval éfe,  Paul a mbe a bele nkômane ya dzale ésèñ dèñ kaa bis é dzam ésese a mbe wôrane tam té.

¹³ Aval té évoo, ô taa ñong minkighane mi tsii fave ébe é mam wa wôran amu bi ne bebo minsem. Ñonghane nkighane naa, mia ye bo é dzam mia yiène bo kaa bis é mam mia wôran. Nge mi tsini naa mia bo é mam me ne sôsôe, ya tam é mam mia wôran me ne sanghlé. A bo aval ésese é ne bo, tsineghane naa mia baghle mbemba mefulu me ya nsisim, ma ye mia vole a tsini naa mia béé Yésu niène mi dubaneyang. Éyong bobeñong ye bekal benan ba ye yen ôdzibi mia sèhane wô Jehôva, da ye be saghe (1 Beth. 5:11).

« TSINIGHANE NAA MIA FAS [. . .] TSINIGHANE NAA MIA DAGHE »

14. Za dzam wa yiène fas éyong asese, amu dzé ki ? (2 Becorinthien 13:5)

¹⁴ Da ye fe bo éban nge niène wa duban, wa tsini naa wa fas wamièn éyong asese (A lang 2 Becorinthien 13:5). Biyong bizing, tugha fas éning duè ye mefulu muè, naa ô yen nge wa yaghlan éyong ésese, a lang ye binane Bible, a ke bisulan ye bo minkanghle. Dzenghe meval mesese naa ô tugha yem buane mam meté. Éfônan, ô ne sili wamièn minsili mi : ‘Ye me ne yem yeghle é bôt bevoo meyeghle me ne tsîn a Biblia été ? Ye me ne ve naa, minkanghle miam mi bo édedèè mvèñ ? Ye me ngen faa ma yaghlan ye n’nem ôsese ? Ye meyaghlane mam ma lere naa, ma ve mebun mam mesese ébe Jehôva ? Ye me ne mban a tobe bisulan ? Aval avé me ne tugha kôm aval ma bèè ye yalane bisulan ?’

15-16. Za dzam wa yeghe ébe moadzang nfa a zôme meboblan ?

¹⁵ É ne fe éban naa, ô tugha fas é mam ma ve wa atakh. Moadzang ézing a too éyôla naa Robert, a kanghle é dzam é nga biane ñe aval di : « Éyong me mbe me bele mimbu 20, me nga bele ésèñ ma bo étun môs. Môs ézing niène ésèñ é nga man, ane é minenga ézing bia ñe bi nga sèñ a nga bane ma é nda dzèñ. A nga dzô me naa bia ye tobe étam, ye naa bia ye lôt ‘mbemba biyong.’ Ôsusua, me nga tare ñe ve zeze mekalgha, ve, ane me nga sughlane tep ye dzô ñe amu dzé. » Robert a nga dang meboblan, é ne fe mbemba dzam. Ve, ôsu vèè éyong a nga fas é dzam é nga boban, a nga yen naa, a mbe bo mam aval afe. A yebe naa : « Méé dzi ki tep é dzam a nga sili ma ye n’nem ôsese nge ki y’aval avôô José nge ki Joseph a nga tep é dzam ngal Potifar a nga sili ñe (Atar. 39:7-9). Bebela a ne naa, me nga yen nté mbé é  mbe me ndzukh naa me tep. Dzam té é nga vole ma a yen naa, me nga yiène bera sèñ ngu’u nfa ya wône élat dam ya Jehôva. »

¹⁶ Ô ne ñong abuan éyong wa fas wamièn aval ane Robert a nga bo de. Amben éyong ô va dang meboblan, silighe wamièn naa : ‘Za abim tam é va ñong ma naa me dzô naa, kaa ?’ Nge ô yen naa wa yiène bera kôm dzam ézing, ô taa kikh wamièn nsang. Tobeghe mevakh naa, wa yem é mam ma ve wa atakh. Teleghe dzam té ôsu meyaghlane muè été, ye ñong minkighane mia yiène nfa ya wône nkômane wiè ya ning wéé kang metsin metsing Jehôva (Bya 139:23, 24).

17. Aval avé é dzam é nga biane Robert é nga name éyôla Jehôva ?

¹⁷ Nlang Robert waa sughu ki fave vèè. A tsini éé dzô naa : « Niène me nga tep nluèn é minenga bia ñe bii mbe bi sèñ, ane a nga dzô me naa, ‘Ô kiabeyang mevaghle !’ Me nga sili ñe é dzam a nga kômô dzô vèè. Éde a nga dzô me naa, mvuiñ dzèñ ézing a mbe moan Bengaa, a nga dzô ñe naa, bitong Bengaa besese ba ning bining bibèñ, ye naa, nge be tebe aval étéñ me nga tebe, ba ye bo é dzam a va sili ma. Éde a nga dzô mvuiñ dzèñ naa, a ye tame vakh dzam té ye ma. Éyong té éde me nga wôrane nté mbé me mbe mevakh amu naa me nga lughu éyôla Jehôva. »

18. Mi ne nkoghane naa mia ye bo dzé niène mia duban ? (A daghe fe nkaalé «  Minlô medzô mibèñ mia ye dzing »).

¹⁸ Éyong wa ve Jehôva éning duè ye duban, wa lere vèè naa, wa kômô ve éyôla dèñ nfuban, kaa bis é dzam ésese é ne boban. Éde, ô ne tobe ndzi-n’nem naa, Jehôva a yem minzukh misese ô ne tubane mio, ye meboblan mesese wa dang. A ye borane mengu’u mesese wa ve naa ô tobe sôsôe. Beleghe mebun naa, ye nfufup nsisim wèñ, a ye wô ve ngu’u naa ô bo de (Luc 11:11-13). Y’avole Jehôva ô ne tsini naa wa béé Yésu niène ô dubaneyang.