1. Amu dzé Ésesang ôsiman awu Yésu ô ne é môs wa dang éban ébe mbu ? (Luc 22:19, 20)

 ÉBE bengaa Jehôva, Ésesang ôsiman awu Yésu é ne é môs wa dang éban ébe mbu. É ne ésesang étam Yésu a nga dzô beyeghe bèñ naa be dzemlé (A lang Luc 22:19, 20). Bi bele abuiñ mekalgha ma ve bia naa, bi kômô naa é tam Ésesang ôsiman awu Yésu é dzigha kuiñ. N’yenghane mekalgha m’ézing me y’été.

2. Za mekalgha m’ézing bi bele naa bi kômô naa é tam Ésesang ôsiman awu Yésu é dzigha kuiñ ?

² Ésesang ôsiman awu Yésu da vole bia a binan nté mbé ntang Yésu ô ne éban ye biboran bia so été. Da simane biè abuiñ meval bi ne lere naa bia yem mbeng atunegha Yésu a nga ve (2 Becor. 5:14, 15). Da ve fe biè tam naa bi « vaane ngu’u » bevoo ya éba bevoo (Bero. 1:12). Kada mbu, é bobedzang b’ézing be manang takh a nsisim be wula tobe ésesang té. Bevoo b’ézing be y’été be wula bera kômô bulane ébe Jehôva, éyong be va yem be ñong. Ye fe naa, abuiñ bôt b’ézing be wula kômô sum wule zen y’éning, amu é mam be va yen ye wokh ésesang té. Mam mesese meté éme ma ve naa, Ésesang ôsiman awu Yésu, é bo édedèè éban akal dèè !

3. Aval avé Ésesang ôsiman awu Yésu da ve naa Bengaa besese be ya si ése ngura be bo élat ? (A daghe fe évaghle).

³ Bia kômô naa, Ésesang ôsiman awu Yésu é dzigha kuiñ amu bia yem naa, môs té, bi ne élat ye bobedzang ye bekal bèè be ye si ése ngura. Bengaa Jehôva be ye si ése ngura, ba kôan tam té, éyong nlô dzôp wa ke bôme ôsi ôtetak ôtetak. Bia besese bia bèè ntun wa ngône éban ntang ô bele. Bia yiè bya bi ôlughu bibèñ, ba ve naa vino ya nfem be lôt ésesang té, ye yalane « amen » ye n’nem ôse ébe meyaghlan menii ba bo ésesang té. Ébe mewala me nkwala 24 ma zu  ôsu, bikôan bise bi ya si ése ngura, bia ye bo aval dèè. Ye mi ne siman mevakh Jehôva ba Yésu ba wôran éyong ba yen ane bia lughe be élat été aval té ?

4. Za dzam bia ye yen ayeghle di été ?

⁴ Ayeghle di été, bia ye yalane minsili mi : Aval avé bi ne kômane n’nem wèè akal Ésesang ôsiman awu Yésu ? Aval avé bi ne vole é bôt bevoo naa be buan ésesang té ? Ya aval avé bi ne vole é bobedzang ye bekal bèè be manang takh a nsisim ? A yalane minsili mité da ye bia vole naa bi tobe nkoghan akal ngura aval ésesang té.

AVAL AVÉ BI NE KÔMAN N’NEM WÈÈ AKAL ÉSESANG ÔSIMAN AWU YÉSU ?

5. (a) Amu dzé bia yiène fas ébe éban ntang ô bele ? (Bya 49:7, 8) (b) Za dzam ô va yeghe ya éngengeng Amu dzé Yésu a nga wu ?

⁵ Aval évoo é ne éban naa bi ne kôman n’nem wèè akal Ésesang ôsiman awu Yésu, é ne a fas éban atungha Yésu Christ a nga ve é bele. Bii mbe ki kôre bia bebièn ébe nsem ye awu (A lang Bya 49:7, 8 ; a daghe fe éngengeng Amu dzé Yésu a nga wu?  a). Jehôva a nga kôm mam naa, Yésu a ve éning dèñ nfa ya kôre bia. Jehôva ba Yésu, bebèñ be nga bo môra atunegha (Bero. 6:23). Éyong bia binan ébe é dzam Jehôva ba Yésu be nga bo akal dèè, dzam té da ye ve naa bi bira dzing ntang. Bia ye yen é mam m’ézing me mbe ndzukh, Jehôva ba Yésu be mbe nkoghane naa ba bo akal dèè. Édi ôsua, Za dzam ntang ô nga sili ?

6. Za dzam ntang ô nga sili ?

⁶ Ntang ô ne é tang ba yaane naa be bera kus dzôm ézing. É môt ôsua, Adam, a mbe kaa ékop éyong be nga vele ñe. Éyong a nga bo nsem, a nga dzimlé éning é ne mbèmbèè ye fe ve naa, é boan bèñ, baa fe, be dzimlé éning é ne mbèmbèè. Naa a bera kus é dzam Adam a nga dzimlé, Yésu a nga ve éning é ne kaa ékop dèñ ane atunegha. Nté sese a nga ning a si va, Yésu « éé dzi ki bo nsem, ye naa, béé ndzi ki kuan évus anu dèñ été » (1 Pierre 2:22). Éyong a nga wu, éning Yésu é mbe kaa ékop, é mbe faa éyièn éning Adam a nga dzimlé (1 Becor. 15:45 ; 1 Tim. 2:6).

7. Za minzukh mizing Yésu a nga tubane mie éyong a mbe a si va ?

⁷ Yésu a nga bo Ésaa a ne a dzôp été mewokh, amben minzukh misese a nga tubane mie éyong a mbe a si va. Yésu a nga bo bebyèñ be mbe bôt a bikop mewokh amben émièn a mbe kaa nsem (Luc 2:51). Éyong a mbe étong, a nga yiène ve mengu’u, éyong ézing amu é bôt bevoo be nga yemle ñe naa a taa bo bebyèñ bèñ mewokh nge ki a tobe sôsôe ya Jehôva. Éyong Yésu a nga bo ñamôrô, a nga yiène ve mengu’u naa a dang meboblan Satan a nga ve ñe, a nga ve fe mengu’u éyong Satan a nga dzeng naa a taa tobe sôsôe ya Nzame (Mat. 4:1-11). Satan a nga kômô naa Yésu a bo nsem naa a taa yaane ntang.

8. Za minzukh mife Yésu a nga tubane mie ?

⁸ Éyong a nga bo ésèñ minkanghle a si va, Yésu a nga tubane abuiñ minzukh mife. Minzinzing mièn mi nga tsible ñe ya dzeng naa be wiñ ñe (Luc 4:28, 29 ; 13:31). A nga zôme bikop betong bèñ (Marc 9:33, 34). Éyong be nga kikh ñe nsang, be nga yir ñe ya poghe ñe. Éde, be nga wiñ ñe ane mbia môt ye naa a nga bira dzukh kaa naa a wu (Behéb. 12:1-3). A nga zôme minzukh mité étam kaa naa Jehôva kame ñe b (Mat. 27:46).

9. Za dzam bia wôran akal atungha Yésu ? (1 Pierre 1:8)

 ⁹ Yésu a nga bira dzukh naa a yaane ntang. Éyong bia binan ébe é mam mese Yésu a mbe nkoghane naa a bo akal dèè, bia bira ñe dzing (A lang 1 Pierre 1:8).

10. Za dzam Jehôva a mbe koghane naa bo naa a yaane ntang ?

¹⁰ Za dzam Jehôva a nga tobe nkoghane naa a dzimlé nfa ye naa Yésu a yaane ntang ? Jehôva ba Yésu be bele élat da dang ngu’u é ne bo ézizang ésaa ye moan (Mink. 8:30). Tamane siman, aval Jehôva nga wôran éyong a nga yen aval Yésu a zôme minzukh misese a nga tubane mie a si va. Kaa bisô, Jehôva a nga bira wokh n’nem mintèñ éyong a nga yen ane ba tsible é Moan wèñ, ba tep ñe ye boble ñe.

11. Vakh éfônane da lere aval Jehôva a nga wôran éyong a nga yen aval be nga wiñ Yésu.

¹¹ Bebyèñ besese be dzimléyang moan awu, ba tugha yem mintèñ misese mia so y’awu té. Bi bele mebun me ne ngu’u ébe awômô bewu, ve, daa vèè ki mintèñ misese bia wôran éyong bia dzimlé môt awu. Éfônan té da vole bia naa bi wokh aval Jehôva a nga yiène wôran éyong é Moan wèñ a nga dzukh ye wu mbu 33 ye metam mèè c (Mat. 3:17).

12. Za dzam bi ne bo kaa naa é môs Ésesang ôsiman awu Yésu é kuiñ ?

¹² Atéé y’éndagha yakekuiñ é môs Ésesang ôsiman awu Yésu da ye boban, dzenghe naa ô tugha yeghe ntang ayeghe duè wamièn nge ki ayeghe ya nda-bôt. Ô ne belane Guía de estudio para los testigos de Jehová nge ki Guide de recherche pour les Témoins de Jéhovah (nge ô bele de nkobe wiè) nge ki évole akal a yeghe Bible éfe naa, ô tugha fas nlô-adzô té d. Dzenghe fe naa, ô lang bifus bi ya Bible bi ne akal Ésesang ôsiman awu Yésu bi ne a Kalare akal ésulan Éning moan kristen ye ésèñ minkanghle. É môs Ésesang ôsiman awu Yésu, ô taa vuène naa wa daghe ngura aval ntun wa ye lôt kikiri té. Nge bia kômane n’nem wèè akal Ésesang ôsiman awu Yésu, bia ye vole é bôt bevoo naa be buane fe de (Esdras 7:10).

VOLEGHE É BÔT BEVOO NAA BE BUAN ÉSESANG TÉ

13. Za dzam ôsua bi ne bo naa bi vole é bôt bevoo naa be buan Ésesang ôsiman awu Yésu ?

¹³ Aval avé bi ne vole é bôt bevoo naa be buan Ésesang ôsiman awu Yésu ? É dzam  ôsua bi ne bo, a ne a bane be. Biaa yiène ki bane fave é bôt bia tubane be minkanghle, bia yiène fe tsili biyôla é bôt besese bia yem nfa ye naa bi bane bo. A ne bo bôt be y’é nda-bôt dzèè, é bôt bia bebe bia bo sikôlô, é bôt bia bebe bia sèñ, ya bôt befe. Amben bii bele ki abuiñ mefep nluèn, bi ne de lôm ngalan dispositivo electrónico nge ki bappareil electronique. Bi ne yaghan abim bôt be ne yebe naa ba zu ésesang té ! (Eccl. 11:6).

14. Lereghe ane éyong wamièn wa bane môt naa a zu Ésesang ôsiman awu Yésu, é ne ñe vole a zu ésesang té.

¹⁴ Éyong wamièn wa bane môt naa a zu Ésesang ôsiman awu Yésu, é ne ve môt té ngu’u naa a zu ésesang té. Môs ézing, é kal dzèè ézing, n’nôm éé se ki moan Bengaa, a nga yaghan éyong n’nôm a nga dzô ñe naa, ba ñe ba ye ke Ésesang ôsiman awu Yésu. Amu dzé a nga yaghane de ? Amu naa abuiñ biyong melu mvus, a nga dzaa n’nôm naa, be ke ésesang té, ve, éé dzi ki de yebe. Dzé é nga ve naa a tsen tam té ? N’nôm a nga dzô naa : « Be nga ve ma afep nluèn », éé lere naa é mvene ézing a yem, éñ’a nga bane ñe. N’nôm a nga tobe Ésesang ôsiman awu Yésu ye mbu té, ya fe ébe abuiñ mimbu ôsu vèè.

15. Za dzam bia yiène bale ôsiman éyong bia bane bôt naa be zu Ésesang ôsiman awu Yésu ?

¹⁵ Bia yiène baghle ôsimane naa, é bôt bia bane, be ne bia sili minsili nfa Ésesang ôsiman awu Yésu, dang dang nge baa be ki tare tobe bisulan biè. É ne mbeng naa bi tare fas minsili be ne bia sili ye kôman biyalan (Becol. 4:6). Éfônan, bôt b’ézing be ne bia sili naa : ‘Za dzam da ye boban ésesang té ?’ ‘Ye da ye bem ?’ ‘Ye ma yiène boat ngura aval ézing ?’ ‘Ye ba sili mono naa be ñii ?’ ‘Ye ma yiène ve mono éyong ma ye tobe ésesang té ?’ Éyong bia bane môt Ésesang ôsiman awu Yésu, bi ne ñe sili naa, « Y’ô bele minsili mizing ? » ye tobe nkoghane naa bia yalane minsili môt té a ne bele. Bi ne fe belane bingengeng Siman awu Yésu ye Dzé da lot é nda ékuane Bengaa? naa bi vole bôt beté a  wokh aval bisulan biè bia boban. Ayeghle 28 ya abakh Beleghane éning é ne mbembèè ! da ve bia mbemba mesiman bi ne kap ya be.

16. Za minsili mife é bôt ba ye ke Ésesang ôsiman awu Yésu be ne bele ?

¹⁶ Niène Ésesang ôsiman awu Yésu da ye man, minféféñ mi bôt ba ye tobe ésesang té be ne bele minsili mife. Be ne sili amu dzé môt asese éé dzi ki dzi nfem ye ñu vino. Be ne fe sili biyong tang ya bia bo Ésesang ôsiman awu Yésu. Be ne fe kômô yem nge bisesang bisese Bengaa Jehôva bia boban aval daa. Amben be manang tsiè minlô-medzô mité Ésesang ôsiman awu Yésu, é môt a ndeme so, a ne kômô tugha yem mam mefe. Nlô-adzô « ¿Por qué los testigos de Jehová celebran la Cena del Señor de forma diferente a otras religiones? nge ki Pourquoi les Témoins de Jéhovah célèbrent-​ils le Repas du Seigneur différemment des autres religions ? » bia yen a jw.org, é ne bia vole naa bi yalane minsili mizing be ne bia sili. Bia kômô bo é dzam ésese bi ne bo, kaa naa Ésesang ôsiman awu Yésu é bo, é tam da ye lôt, ya éyong da ye man, naa bi vole é bôt « be ne koghan » a buan ésesang té(Bisè mintôl 13:48).

VOLEGHE É BÔT BE MANANG TAKH A NSISIM

17. Aval avé bemvene be ne vole é bôt be manang takh a nsisim ? (Ézéchiel 34:12, 16)

¹⁷ É tam Ésesang ôsiman awu Yésu da ye boban, aval avé bemvene be ne vole é bôt be manang takh a nsisim ? A ne éyong ba lere naa ba bis be (A lang Ézéchiel 34:12, 16). Kaa naa Ésesang ôsiman awu Yésu é bo, dzenghane naa mia bane abuiñ y’été. Dzôghane be naa mia bis be, ye naa, mia kômô be vole abim mi ne de bo. Baneghane be Ésesang ôsiman awu Yésu. Nge be soo ésesang té, vaane be mbemba nsoan. Niène Ésesang ôsiman awu Yésu da man, tsinighane naa mia ke fep nge ki a luè bobedzang ya bekal bèè beté, ya ve bo avole  ya nsisim ba yi nfa ye naa be bulan ébe Jehôva (1 Pierre 2:25).

18. Aval avé bia besese bi ne vole é bôt be manang takh a nsisim ? (Beromain 12:10)

¹⁸ Bobedzang besese be y’ékôan be ne vole é bôt besese be manang takh a nsisim ba so Ésesang ôsiman awu Yésu. Aval avé ? Éyong ba lere be édzing, mbemba fulu ya ngang (A lang Beromain 12:10). Simghane naa déé mbe ki ébubu akal bobedzang beté naa be bera so bisulan. Éyong ézing be nga ko wong naa baa ye ki be yem ñong e. Éde, mi taa be sili minsili mi ne be lere ôsoan nge ki a dzô é mam mézing me ne be dzughe (1 Beth. 5:11). Bobedzang ya bekal bèè beté, be ne bekristen a ne bia. Bi ne mevakh naa, bia bera kang Nzame ya be ! (Bya 119:176 ; Bisè mintôl 20:35).

19. Za biboran bia ñong éyong bia siman awu Yésu ?

¹⁹ Bi bele mevakh naa, Yésu a nga dzô bia naa bi siman awu dèñ kada mbu, ye wokh amu dzé é ne édedèè éban naa bi bo do. Éyong bia bo do, bia bebièn bia buan, é bôt bevoo ba buane fe do abuiñ meval (Esaïe 48:17, 18). Édzing dèè akal Jehôva ba Yésu da vem. Bia lere nté mbé bia dzing é dzam be nga bo akal dèè. Bia wône élat dèè ya bobedzang. Bi ne vole é bôt bevoo naa be buan biboran bia ye so ya ntang. Éde, bia besese n’boghan é dzam ésese bi ne bo naa bi tobe nkoghan akal Ésesang ôsiman awu Yésu ye mbu wi, é môs wa dang éban ye mbu !