Bevoo b’ézing be nga vem mevôm ba yen binenga zeze. Éfônan, Hans, ndeghe bikôan ézing ya Bolivia, a dzô naa : « Befam b’ézing be nga vem mevôm ma ve be naa be bo ébere ñuu, éde be bele ôsimane naa ba dang binenga, akal dzam té, éde baa lere ki binenga ngang b. » Shengxian, mvene ézing ya Taïwan, a dzô naa : « É vôm ma tobe, abuiñ befam ba simane naa, binenga baa yiène ki ve anu deba ébe é mam ma daghe ôkira wôba. Nge fam ézing a sia ve ôsiman minenga ébe dzam ézing, é bôr bevoo be ne ñe biane. » Befam bevoo ba shuale é dzam ba simane nfa binenga. Éfônan, be wôla bo é fiang da sili binenga ôsi.

Édi é ne mbeng é ne naa, fam é ne tsen aval a yen binenga, afiang bo é vôm a va vem nge ki metum a bele. A ne dang ôsimane ye naa, befam ba dang binenga. Be ne bo dzam té éyong ba vu éfônane Jehôva (Beéph. 4:22-24). Ayeghle di été, bia ye yen aval Jehôva a ñong binenga, aval bobedzang be ne yeghe a ñong binenga ane Jehôva, ye aval bemvene be ne tebe ôsu nfa y’a lere binenga ngang.

AVAL AVÉ JEHÔVA A ÑONG BINENGA ?

Jehôva a ne mbemba éfônan nfa y’aval ba yiène ñong binenga. A ne mbemba Ésaa a dzing é boan besese bèñ (Jean 3:16). É binenga be bele mebun ébe ñe, be ne ane bengoan bèñ a bira dzing. N’yeneghan aval Jehôva a lere binenga édzing ya ngang.

Jehôva éé se ki ôbangam ya binenga. Jehôva a nga vele befam ya binenga éfônane dèñ (Atar. 1:27). Éé dzi ki vele befam naa  ébe ba dang akeng nge ki n’yeman a lôr binenga ; ye naa, a ñeghe befam ye binenga aval dèè (2 Mila. 19:7). A nga vele befam ye binenga naa besese be ne wokh bebebela be ya Bible aval dèè, ye vu é mbemba mefulu mèñ. Jehôva a dzing befam ya binenga be bele mebun ébe ñe ; a nga ve befam ya binenga ôyane ya ning mbèmbèè a paradis a si va, nge ki a dzôp été ane bekéza ye befara (2 Pierre 1:1, atoan). Bebela a ne naa, Jehôva éé se ki ôbangam ya binenga.

A bèè be. Jehôva a bis é dzam binenga ba wôran y’é dzam da kele be min’nem ôyô. Éfônan, a nga bèè meyaghlan Raquel nge Rachel ye Anne be nga bo ñe, ye yalane be (Atar. 30:22 ; 1 Sam. 1:10, 11, 19, 20). Jehôva a nga ve fe betsili Bible nsisim wèñ naa be tsili minlang é bôr be nga bèè binenga. Éfônan, Abraham a nga tông melepgha Jehôva a nga ve ñe naa a bèè ngal wèñ Sara (Atar. 21:12-14). Kéza David a nga bèè Abigaïl. Amu a nga wôrane naa Jehôva éñe a nga lôm ñe naa a zu kobe ñe (1 Sam. 25:32-35). Amu Yésu a nga tugha yem vu Ésaa wèñ, éde a nga bèè ñiè wèñ Marie (Jean 2:3-10). Bifônan bité bia lere naa, aval évoo Jehôva a nga lere binenga ngang, a ne a bèè be.

A tobe a be mebun. Éfônan, Jehôva a nga lere naa a tobe Ève mebun naa a vole Adam a kôm si ése ngura (Atar. 1:28). Éé bo de, a nga lere ñe vèè naa, n’nôm wèñ Adam aa dang ki ñe, ve, a ne é môr a yiène ñe ane mvole. Jehôva a nga lere fe naa, a tobe a mebun ya bekulu medzô binenga bèñ Déborah ya Houlda nfa ya ve ayong dèñ melepga, a lang été, nkikh minsang ye kéza (Bekô. 4:4-9 ; 2 Bed. 22:14-20). Ému wi fe, Jehôva a lere naa a tobe bekristen be ne binenga mebun, éé ve be bisèñ Ékôan dzèñ été. Besôsoe bekal bèè beté, be ne bekar fuèñ, bempwaghe mefan, ye minlôman. Ba vole a vaghle, a long ye baghle Menda-m’ékôan ye fe menda mefe me ye mintem bikôan. Bevoo ba sèñ be Béthel ; éba bevoo, menda ba konghlan mebakh. Bekal bèè beté, be ne ane môra nsama bizima Jehôva a belane wô naa a dzale nkôman wèñ (Bya 68:11). Bebela a ne naa, Jehôva aa ñong ki binenga ane mintetakh, nge ki ane é bôr baa yem ki bo dzam ézing.

AVAL AVÉ BOBEDZANG BE NE YEGHE A YEN BINENGA ANE JEHÔVA A BO DE ?

A bobedzang, naa bi yem nge bia yen binenga ane Jehôva a bo de, bia yiène fas ya n’nem ôse aval bia tem ye aval bia bo mam. Naa bi bo de, bia yi avole. Aval ane bemakina ba ve naa bedokira be yen aval avé n’nem ô bôô a ñuu été, aval té éde mbemba angom, ya fe Nkobe Nzame be ne bia vole naa bi yem nge aval bia yen binenga da ve Jehôva n’nem mbeng. Aval avé bi ne bele avole té ?

Kenghane sili mbemba angom wônan (Mink. 18:17). Bi ne ke yen mbemba angom wèè bia tobe ñe mebun, a too fe mbemba fulu, ye sili ñe minsili ane : « Wa tem naa ma ñong binenga aval avé ? Ye ô ne faa dzô naa ma lere be ngang ? Ye me ne tsen dzam ézing ? » Nge angom denan té, é lere mina é mam mézing mia yiène tsen, mi taa de wokh abé. Ndaane de, vehane mengu’u naa mi tsen é mam ma yiène.

Yeghan Nkobe Nzame. Aval da dang mbeng bi ne yem nge bia yem ñong bekal bèè, é ne a belane Nkobe Nzame naa é vole bia a fas mesiman ye mimboane miè (Behéb. 4:12). Éyong bia yeghe Bible, bia ñong ayeghle ébe befam be nga yem ñong binenga ya éba be nga dzime be ñong. Aval té, bi ne vaghane bifônane bité, ye aval biè bebièn bia ñong binenga. Ye fe naa, éyong bia vaghane bifus bi ya Bible bizing y’ébi bivoo, da ye bia vole naa bi taa dzime wokh ôsiman ézing ya Bible, ye naa, bi tsen mbia n’yenane mam bi ne bele nfa binenga. Éfônan, aval nten 1 Pierre 3:7 da dzô de, befam ba yiène ve binenga é « ngang da yiène é ndakh da dzigha bwélé c. » Ye dzam té da yili naa fam da lôr minenga, nge ki naa minenga éé se ki n’yeman, nge ki faa naa, aa  yem ki bo mam ? Kaa dzôm ! Tamane vaghane bifiè Pierre y’é dzam bia lang nten Begalates 3:26-29, bia lere naa, Jehôva a nga top binenga ye befam naa be bo bedjiè ya Yésu a dzôp été. Éyong bia yeghe Nkobe Nzame, ye sili mbemba angom é dzam a simane nfa aval bia ñong binenga, bi ne yeghe a lere bekal bèè, é ngang da yiène.

AVAL AVÉ BEMVENE BA LERE NGANG AKAL BEKAL BEBA ?

Bobedzang be y’ékôan baa fe be ne yeghe a ñong bekal ya ngang, éyong ba tông éfônane bemvene bèè be ne édzing. Aval avé bemvene ba tebe ôsu nfa ya lere bekal ngang ? N’yeneghan meval ba bo de.

Bemvene ba kur bekal bèè fuas. Ntôô Pablo nge ki Paul a nga ve bemvene mbemba éfônane ba yiène vu. É kalare a nga tsili ékôan ya Roma nge ki Rome, a nga kur abuiñ bekal fuas (Bero. 16:12). Tamane simane nté mbé bekal beté be nga wôrane mevakh, éyong be nga lang é kalare Paul a nga tsili ékôan été. Aval daa fe, bemvene ba kur bekal fuas akal é mbemba mefulu ba lere, ye ésèñ ba bo akal Jehôva. Dzam té da vole bekal a yem naa ékôan da lere be ngang ye bira be dzing. É mbemba bifiè mvene ézing, bi ne bo é dzam ébièn bekal ba yi naa be tsini naa ba sèhane Jehôva ya sôsôe (Mink. 15:23).

Éyong ba kur bekal beba fuas, bemvene ba kobe bebela, ye dzô é dzam ébièn be va ñeghe. Amu dzé ba bo de ? Kal dzèè a too éyôla naa Jessica a dzô naa : « É ne mbeng éyong bobedzang ba dzô kal dzèè naa ô va bo ‘mbemba ésèñ.’ Ve, bia bira dzing éyong bobedzang ba kur bia fuas, béé dzô bia é dzam ébièn bi va bo, be va ñeghe. Ane aval bia yem yeghe é boan bèè naa be tobe mvoa bisulan, nge ki éyong bia ve mengu’u mesese naa bia ke ñong n’yeghe Bible naa a zu tobe bisulan bi y’ékôan. » Éyong bemvene ba kur bekal beba fuas akal ngura dzam ézing be va dzing ba yen, ba ve naa bekal beté be wôrane  naa be ne éban ékôan dèè été ye naa be ne tang nden.

Bemvene ba bèè bekal beba. Bemvene be ne asili ñuu ba yebe naa se ki b’étam ébe be bele mbemba mefakh. Bemvene beté ba dzaa bekal bèè naa be ve mefakh meba, ba tugha fe bèè éyong bekal beba beté ba kobe. Éyong ba bo de, bemvene ba saghe bekal beba, ye naa bebièn ba ñong fe ayeghle été. Aval avé ? Mvene ézing a sèñ ô Béthel a ntoo éyôla naa Gerardo, a dzô naa : « Éyong ma sili bekal bam é dzam ba simane nfa dzam ézing, da vole ma a yem bo ésèñ dam. Biyong bizing be sohang ba bo ésèñ té ayap a lôr bobedzang. » Ékôan été, abuiñ bekal bèè ba sèñ ane bempwaghe mefan, éde ba tugha yem bôt be y’abeng minkanghle deba. Mvene ézing a too éyôla naa Bryan a dzô naa : « Bekal bèè be bele édedèè mbemba mefulu ye bele akeng ékôan da yi. Éde bia yiène ñong abuan y’akeng deba ! »

Bemvene be ne fakh baa yiène ki bian é dzam bekal beba ba dzô. Amu dzé ? Mvene ézing a too éyôla naa Édward a dzô naa : « Akeng kal dzèè é ne vole moadzang naa a tugha wokh dzam ézing, ye naa, aval a yen mam é ne vole moadzang naa a wokh é dzam é bôt bevoo ba wôran » (Mink. 1:5). Amben mvene aa ye ki bo é dzam kal dzèè a va dzô ñe, a ne ñe ve akiba amu a va dzô ñe aval a yen mam, n’yemane wèñ y’aval a wokh mam.

Bemvene ba yeghe bekal bèè ésèñ. Bemvene be ne fakh, ba dzeng meval be ne yeghe bekal bèè ésèñ. Éfônan, ba yeghe bekal bèè aval be ne wulu ésulan akal minkanghle, naa be bo de nge a sia kuiñ naa é moadzang a ne nduban éé se ki vèè. Be ne be yeghe a belane béngini nge ki bivol bife, naa be belane be nfa y’akôm nge ki a long menda m’ékôan. Bemvene ba daghe bisèñ ô Béthel, be nga yeghle bekal bèè a bo abuiñ bisèñ ane, a kôm biôm, a kus biôm, a tsiè mam me mono, a belane be programas informáticos nge ki programmation informatique ye bisèñ bife. Éyong bemvene ba yeghle bekal bèè, ba lere naa ébe be, bekal bèè ba yem bo bisèñ ye naa ba tobe be mebun.

Abuiñ bôt ba buan ayeghle bekal bèè be va ñong ébe bemvene. Éfônan, bekal bèè b’ézing ba belan ayeghle be va ñong nfa nlonghane menda, naa be vole é bôt bevoo naa be bera long menda meba, niène ébubua dzam da boban. Bekal bèè befe ba belane é dzam be va yeghe nfa a kanghle é vôm bôt ba lôt abuiñ naa be vole é bôr bevoo naa baa fe, be buan aval minkanghle mité. Za dzam bekal bèè ba wôrane nfa bemvene be nga yeghle be ésèñ ? Kal dzèè a too éyôla naa Jennifer a dzô naa : « Éyong bi nga long Nda-ékôan, é mvene a mbe éé daghe bisèñ, a nga ñong tam naa a yeghle ma. A nga yen ésèñ me nga bo, éde a nga kur me fuas akal ésèñ té. Me nga dzing ma sèñ ye ñe amu me nga wôrane naa me ne éban ye naa a tobe ma mebun. »

BIBORAN BIA SO ÉYONG BIA ÑONG BEKAL BÈÈ ANE BÔT BE Y’É NDA-BÔT DZÈÈ

Bia ñeghe besôsôe bekal bèè aval ane Jehôva a ñeghe be ! Éde bia ñong be ane bôt be y’é nda-bôt dzèè (1 Tim. 5:1, 2). Bia dzing bia sèñ ye be. Bi ne édedèè mvom éyong ba wôrane naa bia dzing be ye sukh be asi. Kal dzèè ézing a too éyôla naa Vanessa a dzô naa : « Ma ve Jehôva akiba amu a va ve naa me bo môt mboo y’Ékôan dèñ é ne ndzalane ye bendôm bam, ba bira me saghe nfa ya nsisim. » Kal dzèè ézing ya Taïwan ñ’a dzô naa : « Ma bira ve Jehôva ye Ékôan dèñ akiba amu ba bira lere binenga éñeghe ye ngang, y’amu ba bis é mam ba wôran. Dzam té da wônô mebun mam, ye ve naa, me bira dzing é maa me bele naa me ne môt mboo y’ékôan Jehôva. »

Za mevakh Jehôva a wôran éyong a yen besôsôe befam bekristen ba sèñ ngu’u naa be yen ye ñong binenga ane a bo de ! (Mink. 27:11) Mvene ézing ye Escocia nge ki Écosse, a too éyôla naa Benjamen a dzô naa : « Ému wi, abuiñ befam be y’émo baa vaghle ki lere binenga ngang. Éde éyong binenga ba zu a Nda-ékôan, bia kômô naa be wôran édzing ye ngang. » Éde, bia besese, n’vehane mengu’u mesese mèè naa bi vu Jehôva, bii ñong bekal bèè y’édzing y’é ngang ba yiène de (Bero. 12:10.)