1. Za dzam bia yiène bo naa, bi ning é môs Jehôva ?

 ÉYONG Bible a kobe adzô « é môs Jehôva », a kobe adzô é tam Jehôva a ye tsam minzizing mièñ, ye kôre ayong dèñ. Metam ô mvus, Jehôva a nga ve meyong mézing akira (Esaïe 13:1, 6 ; Ézéch. 13:5 ; Soph. 1:8). Metam mèè, « é môs Jehôva » wa sum éyong bidjiè bia ye tsam Babilonia N’nen ye ke man alumane y’Armagedón. Naa, bi ning « môs » té, bia yiène kôman éndagha. Yésu a nga yeghle naa, biaa yiène kôman fave akal « bitsible binen », ve bia yiène « tobe nkoghan » akal môs té—Mat. 24:21 ; Luc 12:40.

2. Amu dzé bi ne buan é dzam bia lang nten 1 Bethessalonicien ?

² É kalare ôsua a nga tsili Bethessalonicien ngalane nsisim Nzame, ntôl Paul a nga belane abuiñ bivaghle naa, a vole bekristen a tobe nkoghan akal é môra môs nkighane nsang Jehôva. Pablo a nga yem naa, é môs Jehôva waa ye ki so é tam a nga kobe (2 Beth. 2:1-3). Amben éde, a nga sakh bobeñang naa, be kôman akal môs té ane wa ye so ôkiri, éde bia fe, bi ne dzale melepgha meté. N’yenghan ayilgha a nga ve ébe é mam melal ma zu ma : (1) aval é môs Jehôva wa ye so, (2) za aa ye bo kaa ning môs té, ya (3) aval avé bi ne kômane naa, bi ning.

3. Aval avé é môs Jehôva wa ye so ane nwuwup alu ? (A daghe fe évaghle).

³ « Ane nwuwup alu » (1 Beth. 5:2). A ne évaghle ôsua ye bivaghle bilal bia kobe adzô aval é môs Jehôva wa ye so. Abuiñ biyong minwuwup mia bo mam avôô alu éyong bôt baa yane ki be. É môs Jehôvah wa fe, wa ye so atem-tem,  éyong abuiñ bôt baa yane ki de. Amben beña bekristen ba fe, ba ye sighan y’aval avôô mam ma ye boban môs té. Ve, édi da selane beña bekristen ya mbia be bôt é ne naa, baa ye ki mane wu.

4. Aval avé é môs Jehôva ô ne ane mintèñ mi myô ?

⁴ « Ane mintèñ mi myô é minenga a ne abum » (1 Beth. 5:3). É minenga a ne abum, éé se ki dzô é môs ébién a ye sum koghle myô. Ve, éé bele ki bisô naa, mintèñ mité mia ye so. Éyong tam té da kuiñ, myô wa so a tem-tem ya mintèñ kaa naa mi ne sim. Aval té fe, biaa yem ki é môs nge awala é môs Jehôva wa ye sum. Amben éde, bia yem naa, dzam té da ye boban, ye naa, é môs Jehôva a ye kikh be-bo abé nsang wa ye so a tem-tem kaa naa be ne wô saalé.

5. Aval avé bitsible binen bi ne an’éyong kiri da lene ?

⁵ Éyong kiri da lene. Évaghle lal Pablo a tu wa tsiè adzô minwuwup mia wup alu. Ve, Pablo a tsen n’yenane mam, éde a fônane naa, a vaghan é môs Jehôva ane éyong kiri da lene (1 Beth. 5:4). Minwuwup mia so alu, be ne bele édedèè abuiñ mam y’a bo aval da ve naa, be taa fe yen ane tam da lôt. Be ne tem-tem kiri é nga lene ye kulane be éndendang. Bitsible binen bia fe, bia ye kulan é bôt be ne ane minwuwup, be ne ô dzibisi ba tsini naa, ba bo é mam Nzame a vini. Édi da selane ya be, bi ne tobe nkoghan bii tep abo-dulu da ve Jehôva n’nem abé ye tsini naa, bia bo « é mam mese me ne mvèñ, sôsôe ya bebela » (Beéph. 5:8-12). Ôsu vèè, Pablo a belane bivaghle bibèñ bia kobe adzô é bôt baa ye ki ning.

6. Aval avé abuiñ bôt bézing be bôô ôyô ? (1 Bethessalonicien 5:6, 7)

⁶ « É bôt be bôô ôyô » (A lang 1 Bethessalonicien 5:6, 7). Paul a nga vaghan é bôt baa ye ki ning é môs Jehôva, ane é bôt  be bôô ôyô. Baa yem ki é mam ma lôrane be minfeng nge ki é tam da lôt. Ya dzam té, baa yem ki ôden é dzam é ne éban da boban y’é dzam ba yiène bo nfa dzam té. Abuiñ bôt ému be ne ane be bôô ôyô nfa ya nsisim (Bero. 11:8). Baa bis ki mendem ma lere naa, bi nga ninghang « melu me y’asughlan » ye naa, bitsible binen bi nkun so. É bôra be-mam ma boban si ése ngura me ne véé bevoo be y’été ôyô ya nsisim be ne, ye tsini be naa, be bis fuèñ ye Édjiè Nzame. Ve, abuiñ y’ébe be, ba bera k’ôyô ndaane naa, be tobe vevee. Amben é bôt ba bunu naa, môs nkighane nsang wa ye so, ba tem naa, ô ngen ôyap (2 Pierre 3:3, 4). Ve, kada môs wa lere naa, é ne édedèè éban naa bi tobe vevee.

7. Aval avé é bôt Nzame aa ye wiñ ayèè dèñ be ne ane é bôt ba fuèn meyokh ?

⁷ « É bôt ba fuèn meyokh. » Ntôl Pablo a nga vaghan é bôt Nzame aa ye wiñ ayèè dèñ ya é bôt ba fuèn meyokh. É bôt ba fuèn meyokh baa bo ki mam avôô éyong dzam da bobane be minfeng, ye naa, ba ñong fe mbia minkighan. Aval té fe, mbimbia be-bôt baa bèè ki mimbame Nzame. Ba top é zen da ye ke be ntsaman. Ve, ba dzô bekristen naa, ba yiène baghle é ken dzeba ye tugha fas mam (1 Beth. 5:6). N’yem mam ya Bible a ve ayilgha y’éfiè a tugha fas ane « étéñ ya nsisim é ne mvoa, kaa teng, a yem yen mam aval da yiène, dzam té da ve naa, a ñong mbemba nkighan. » Amu dzé bia yiène tobe mvoa ye kaa teng ? Amu naa, dzam té da ve naa, bi taa ñong ngap ébe minsili mia tsinane politique nge ki é mam ma ndaghle bôt ému. Nté sese é môs Jehôva wa ke wa yir bebéñ, nté sese té, ba ye bira ke ba yemle bôt naa be ñong ngap ébe mam meté. Ve, déé se ki éban naa, bi kele min’nem ôyôp nfa aval bia ye ñong mam. Nsisim Nzame ô ne bia vole a bele étéñ ya nsisim é ne mvoa, kaa teng ye ñong mbemba minkighan—Luc 12:11, 12.

8. Aval avé nten 1 Bethessalonicien 5:8 da lere mefulu ma ye bia vole a tobe vevee ye baghle é ken dèè ? (A daghe fe évaghle).

⁸ « Boarghan ében [. . .] ye [. . .] afoghelong. » Paul a nga vaghane bia besese ya bizima bi ne nkoghane ye mboaran akal aluman (A lang 1 Bethessalonicien 5:8). Bôt ba yane naa, moan bizima a tobe nkoghane naa, a luman éyong alumane da sum. É ne fe aval dèè akal bia besese. Bia tobe nkoghan akal é môs Jehôva éyong bia boat ében ye mbunan y’édzing, y’afoghelong y’ôyane. Mefulu meté me ne bia vole abuiñ.

9. Aval avé mebun mèè, me ne kame bia ?

⁹ Ében é nga kame n’nem moan bizima. Mebun y’édzing ma kame n’nem ya nsisim wèè. Ma ye bia vole naa, bi tsini naa bia sèhane Nzame ye tsini naa bia béé Yésu. Mebun ma bane bia naa, Jehôva a ye boarane bia, amu bia dzeng ñe ya n’nem ôse (Behéb. 11:6). Da ye bia tsini naa, bi baghle é sôsôe wèè ébe Ndjiè wèè Yésu amben nge bia yiène zôme minzukh. Bi ne wônô mebun mèè nfa ye naa, bi zôme minzukh bi ne tubane mio éning, éyong bia yeghe bifônane bi y’é bôt be ye melu mèè be nga baghle é sôsôe deba amben be nga tubane bitsible nge ki minzukh mi mono. Bi ne saalé ôlam ya bira dzing mono y’akum ya si éyong bia vu bifônane bité b.

10. Aval avé édzing dèè akal Nzame y’é bôt bevoo da vole bia a bo mban minkanghle ?

¹⁰ Édzing daa fe, da vole bia a tobe vevee  ye baghle é ken dèè (Mat. 22:37-39). Édzing akal Nzame da vole bia a bo mban minkanghle amben minzukh misese minkanghle mi ne so bia me (2 Tim. 1:7, 8). Amu bia dzing fe é bôt baa sèhane ki Jehôva, éde bia tsini naa bia kanghle ye sèñ abeng minkanghle dèè, amben bia bo de ngalane teléfono nge ki be kalare. Bi taa dzimlé ôyane wèè naa, môs ézing é bôt be too bia minfeng be ne tsen ye sum bo é dzam é ne sôsôe—Ézéch. 18:27, 28.

11. Aval avé édzing akal bekristen bevoo da vole bia ? (1 Bethessalonicien 5:11)

¹¹ Bia dzing fe bobedzang bèè ya bekal bèè. Bia lere aval édzing té éyong bia « saghan bevoo ya éba bevoo ye longhane bevoo ya éba bevoo » (A lang 1 Bethessalonicien 5:11). Aval ane bizima ba sèñ nsama éyong be ne aluman, bia saghane bevoo y’éba bevoo. É ne kuiñ naa, moan bizima a ne dzukh éñi mboo éyong be ne aluman kaa naa a va kômô de bo, ve, aa ye de vaghle bo amu a kômô ñe dzughu. Aval té fe, biaa ye vaghle dzughu bobedzang ya bekal bèè nge ki a bulane be abé amu bia kômô de bo (1 Beth. 5:13, 15). Bia ye fe lere édzing bi bele akal deba éyong bia kang é bobedzang ba wulu ya ékôan (1 Beth. 5:12). Éyong Pablo a nga tsili kalare té, abong té ékôan ya Tesalónicas nge ki Thessalonique daa be ki dzale ngura mbu. É ne bo naa, befam be nga tele naa be wulu y’ékôan, baa mbe ki édedèè akeng ye naa, be nga bo fe bikop. Amben éde, be nga yiène be ve ngang. Nté sese bitsible binen bia yir bebéñ, é ne bo naa, bia ye yi avole bemvene naa, be lere bia aval bia yiène wulu a lôt abim bia bo de éndagha. Éyong ézing biaa ye ki fe bele melepgha ma so a Tsîn ékôan nge ki mintem bikôan, éde é ne éban naa, bi yeghe a dzing ye kang bemvene be y’ékôan éndagha. A bo édi sese é ne bo, bia yiène baghle é ken dèè, bii bembe ébe aval Jehôva ngalane Cristo nge ki Christ a wulu ya besôsôe befam beté se ki ébe bikop bieba.

12. Aval avé ôyane wèè wa kam mesimane mèè ?

¹² Aval ane afoghelong é nga kame nlô  moan bizima, ôyan y’akôrô wèè wa kame mesimane mèè. Ôyan ô ne ngu’u wa ve naa, bi yebe naa, é dzam émo é ne bia kiagh é ne zeze (Beph. 3:8). Ôyane wèè, wa vole bia baghle mvoa kaa teng. Dzam té éde é nga lôrane Wallace ba Laurinda, ba sèñ ane be Béthélite Africa. Ébe sono élal ñia Laurinda ya ésaa Wallace be nga wu. Akal pandémie COVID-19, baa mbe ki bulane menda meba naa, be tobe ya memvong me-bôt meba. Wallace a nga tsili naa : « Ôyane y’awômô bewu wa vole me naa, me simane be, se ki aval be mbe, melu me nga sughlan kaa naa be wu, ve aval ba ye bo éyong ba ye wômô nféféñ éning. Ôyane té wa sili ma n’nem ôsi éyong me ne éwiñ akal me nga dzimle be. »

13. Za dzam bi ne bo naa, bi bele nsisim Nzame ?

¹³ « Ô taa dzim nduane ya nsisim » (1 Beth. 5:19). Pablo a nga vaghan nsisim Nzame ane é nduan ézing é ne bia a ñuu été. Éyong bi bele nsisim Nzame, bi ne édedèè ayông ya nsaza, bia kômô fe sèñ akal Jehôva (Bero. 12:11). Za dzam bi ne bo naa, bi bele nsisim Nzame té ? Bi ne yaghlan akal té, a yeghe Kalare Nzame, ye bo môt y’Ékôan dèñ. A bo de, da ye bia vole a bele « ébuma ya nsisim »—Begal. 5:22, 23.

14. Za dzam bia yiène saalé nge bia kômô ke ôsu ya bele nsisim Nzame ? (A daghe fe évaghle).

¹⁴ Niène Nzame a ve bia nsisim wèñ bia yiène tobe vevee naa, « bi taa dzim nduane ya nsisim té. » Nzame a ve nsisim wèñ fave é bôt ba baghle ôsimane wôba y’abo-dulu deba nfuban. Aa ye ki tsini a ve bia nsisim wèñ, nge bia tsini naa, bia bele asiman é ne mvin ye bo mam aval asimane mvin té da lere bia naa, bi bo (1 Beth. 4:7, 8). Naa, bi ke ôsu ya ñong nsisim Nzame, biaa yiène ki « bian minkulane medzô » (1 Beth. 5:20). Éfus di été, éfiè « minkulane medzô » da yili mefuèñ Jehôva a ve bia ngalane nsisim wèñ, a lang été, é môs Jehôva, y’aval bia yiène bo mam y’avôô akal metam mèè. Biaa bunu ki naa, é môs Jehôva wa ye bo kaa so. Ndaane de, bia ve naa môs té ô so avôô, nge ki a baghle wô ôsiman, bii  baghle mbemba abo-dulu ye bele « mimboane mia lere élat ya Nzame » kada môs—2 Pierre 3:11, 12.

15. Aval avé bi ne saalé naa, bi tobe ndughane akal minèè ya mefuèñ ma so ébe mbia minsisim ? (1 Bethessalonicien 5:21)

¹⁵ Melu ma zu, minzizing Nzame ba ye kar fuèñ : « Mvoa ye nkaman ! » (1 Beth. 5:3) Si da ye tobe ndzalane ya mefuèñ ma so ébe mbia minsisim, béé dukh abuiñ bôt (Mel. 16:13, 14). Édi da daghe bia ki ? Biaa ye ki tobe ndughane nge « bi tugha fas [nge ki « a vakh »] mam mesese » (A lang 1 Bethessalonicien 5:21 ; a daghe atoan é ne asi). Éfiè Griego nge ki Grec ba konghlane a Fang naa « a tugha fas, » be nga belane de naa, ba lere aval bôt be nga belane bikièñ ane kông ya mono naa, be tugha fas nge a mbe faa ña kông ya mono. Éde, bia yiène fas é dzam bia bèè nge ki a lang nfa ye naa, bi tugha yem nge a ne é mam me ne bebela. Dzam té é mbe éban akal Bethessalonicien, da ye fe bo édedèè éban akal dèè nté sese bitsible binen bia ke bia yir bebéñ. Ndaane naa, bi sia yebe é mam bôt befe ba dzô, bia belan ôsimane wèè nfa ye naa, bi fas é dzam bia lang nge ki édi bia bèè ya é dzam Bible ya Ékôan Jehôva ba dzô. Éyong bia bo de, baa ye ki bia dukh ya mefuèñ ma so ébe mbia minsisim—Mink. 14:15 ; 1 Tim. 4:1.

16. Z’ôyane bi bele, za dzam ki ôyane té wa tsini bia naa bi bo ?

¹⁶ Ane nsama, be-bo bisèñ Nzame ba ye ning bitsible binen. Ve kada môt y’ébe bia aa yem ki, é dzam da ye lôran ôkiri (Jacq. 4:14). Amben éde, a bo naa bia ning bitsible binen, nge ki naa bia wu kaa naa é boban, bia ye bele maan éning é ne mbèmbèè nge bi tsini naa bia tobe sôsôe. Minwoane mboan mia ye tobe ayôp été ya Christ. Mintôma mivoo mia ye tobe a si a paradis. Bia besese bia yiène bembe ébe ôyane wèè ye tsini naa bia tobe nkoghan akal é môs Jehôva !