AYEGHLE 33
ZA 130 Dzameghe ye nlem ôse
Aval ékôan é ne vu ôtemgha Jehôva nfa é môr a va bo nsem ônen
« Nge môr a sia bo nsem, bi bele é môr a kame bia » (1 JEAN 2:1).
É DZAM BIA YE YEN
Bia ye yen, é bura meyeghle bi ne ñong ébe é dzam é nga boban ékôan ya Corinto ntet mimbu ôsua, éyong moadzang ézing a nga bo nsem ônen.
1. Za dzam Jehôva a kômô akal boan be-bôr besese ?
JEHÔVA a nga vele boan be-bôr ye fili ya top. Mia belane das té éyong ésese, éyong mia ñong minkighane. Nkighane wa dang éban ye minkighane misese moan môr a ne ñong, a ne nkighane ye a ve Jehôva éning dèñ, ye bo môr mboo ye nsama bebo-bisèñ bèñ. Jehôva a kômô naa, môr asese a ñong nkighane té. Amu dzé ? Amu a dzing boan be-bôt, ye naa, a kômô é dzam da dang mbeng akal deba. A kômô naa, be bele mbemba élat ye ñe, ye ning mbèmbèè (Deut. 30:19, 20 ; Begal. 6:7, 8).
2. Za dzam Jehôva a wôran akal é bôr baa be ki dzôban ? (1 Jean 2:1)
2 Ve daa, Jehôva aa yemle ki môr ézing naa a sèhane ñe. A likh kada môt fili ya top naa a sèhane ñe nge ki kaa. Za dzam da boban nge é moan kristen a dubaneyang a bian atsing Nzame é bo nsem ônen ? Nge a bo kaa dzôban, ba yiène ñe vèè ékôan été (1 Becor. 5:13). Ve, be fiang ñe vèè aval té, Jehôva a kômô ye n’nem ôsese naa, mbo-abé té a bera bulan ébe ñe. Bebela a ne naa, akal dzam té, éde a nga ve ntang, nfa ye naa, é bôr be va bo nsem ye dzôban, be tobe ndjiiane (A lang 1 Jean 2:1). Jehôva, é Nzame a ne édedèè édzing, a saghe é bôr be va bo nsem ônen naa be dzôban (Zach. 1:3 ; Bero. 2:4 ; Jacq. 4:8).
3. Za dzam bia ye yen ayeghle di été ?
3 Jehôva a dzô bia é dzam a wôran nfa nsem, ya fe, nfa é bôr ba bo nsem ônen. Éde a kômô naa, bi wôran fe é dzam a wôran. Ayeghle di été, bia ye yen aval bi ne de bo. Nté bia ye fakh ayeghle di, bia ye yen (1) é dzam ntôô Pablo a nga dzô ékôan ya Corinto ye ntet mimbu ôsua naa é bo, éyong moadzang ézing a nga bo nsem ônen, (2) é dzam ntôô Pablo a nga dzô ékôan naa é bo, niène fam té é nga dzôban (3) é dzam Jehôva a wôran nfa é bôr ba bo nsem ônen.
É DZAM ÉKÔAN É NGA BO ÉYONG MOADZANG ÉZING A NGA BO NSEM ÔNEN NTET MIMBU ÔSUA
4. Za dzam é nga boban ékôan ya Corinto, ntet mimbu ôsua ? (1 Becorinthien 5:1, 2)
4 A lang 1 Becorinthien 5:1, 2. Ékena lal dèñ ane nlôman, ntôô Pablo a nga wokh mbia mefuèñ mé tsinane nféféñ ékôan ya Corinto. Moadzang ézing ye ékôan té, a mbe é ke binong ye é minenga ésaa. Aval mbia abo-dulu té, é mbe édedèè abé, ye naa, « amben bôr be ye meyong, béé mbe ki bé bo de ! » Ye naa, ékôan éé dzi ki bo ve a yebe mbia abo-dulu té, éyong ézing, é nga ngônô fe meban akal dzam té. Éyong ézing, bevoo be mbe bé tem naa, dzam té é nga lere nté mbé Nzame a ne n’nem éngôngoo, ye wokh boan bôr a minsem. Ve, Jehôva aa yebe ki mbia mimboan ayong dèñ. Ye mbia abo-dulu té, é bôr bézing béé mbe ki bé sèhane Jehôva, be nga kol-ôbakh ye dzô mbia be-mam nfa ayong Jehôva. É mbe fe ve naa, bôr bézing be sum bo é mam me ne abé ékôan été. Éde, za dzam Pablo a nga dzô ékôan naa, é bo ?
5. Za dzam Pablo a nga dzô ékôan naa é bo, dzam té da yili ki ya ? (1 Becorinthien 5:13) (A daghe fe évaghle).
5 A lang 1 Becorinthien 5:13. Ngalane nsisim Nzame, ntôô Pablo, a nga tsili é kalare a mbe é dzô naa, be vèè mbo-nsem aa dzôbane ki ékôan été. Aval avé besôsôe bekristen be nga yiène ñong môr té ? Pablo a nga dzô naa, « be sim naa ba tobe » ye môr té. Dzam té é nga yili ya ? Pablo a nga lere naa, atsing é mbe fe dé sili naa, « be taa vaghle dzi-dzi ye aval môr té » (1 Becor. 5:11). Éyong mia dzi ye môt, mia lôr tam ye ñe, ye lèè minlang ye ñe. Asughlan, dzam té é ne ve naa, mi lôt abuiñ tam ye ñe. Da tugha yili naa, Pablo a nga kômô dzô vèè naa, nge dzam té déé se ki éban, biaa yiène ki lôr tam ye môr té. Dzam té é mbe ve naa, a taa kôô ékôan mbia abo-dulu dèñ (1 Becor. 5:5-7). Ye fe naa, éyong bekristen bevoo ba tebe ñe ôyap, ye kobe ye ñe fave nge é ne éban, éyong ézing, é ne ñe vole a wokh nté mbé a va ke mezen Jehôva ôyap. Dzam té é ne fe ñe tsini naa a wokh ôsoan, ye bele nkômane naa a dzôban.
Ngalane nsisim Nzame, Pablo a nga tsili é kalare a mbe é dzô naa, be vèè é môr a bo nsem kaa dzôban ékôan été (A daghe abong 5)
6. Aval avé ékôan é nga ñong é kalare Pablo a nga tsili, za dzam ki môr té a nga sughlane bo ?
6 Niène a nga lôm é kalare wèñ ébe bekristen be ya Corinto, Pablo a nga sum sili émiéñ aval avé ékôan da ye ñong mam. Asughlan, Tito a nga kare Pablo é fuèñ é nga bira ñe ve mevakh. Ékôan é nga yem ñong, é kalare Pablo a nga lôm (2 Becor. 7:6, 7). Be nga béé melepgha a nga ve be. Ye fe naa, mengoan me nga zu ôsu vèè, a kuane naa Pablo a lôm-hang é kalare wèñ, mbo-abé a nga dzôban mbia abo-dulu dèñ ! A nga sanghle mbia abo-dulu dèñ ye sum naa, a ning é dzale metsin metsing Jehôva me ne sôsôe, éning dèñ (2 Becor. 7:8-11). Éndagha, za dzam Pablo a nga ye sili ékôan naa é bo ?
AVAL ÉKÔAN É NGA YIÈNE ÑONG MBO-NSEM A NGA DZÔBAN
7. Za dzam é môr a nga bo nsem ékôan été a nga bo niène be nga vèè ñe ékôan ? (2 Becorinthien 2:5-8)
7 A lang 2 Becorinthien 2:5-8. E va, Pablo a nga dzô naa « akira môra ngap y’ébe mina da ve môr té, [é mbe dé] yiène. » Nge bi ne da dzô aval afe, akira té é nga dzale ésèñ é nga yiène bo ébe môr té. Nsonghan ô mbe ya ? A ve môr té naa, a dzôban (Behéb. 12:11).
8. Ôsu vèè, za dzam Pablo a nga dzô ékôan naa é bo ?
8 Amu môr té a nga dzôban, Pablo a nga dzô bemvene be ye ékôan naa be likh ñe naa, a bera ñii ékôan été. A nga dzô fe be naa : « Be djii ñe ye fôlô ñe, ye n’nem ôsese », ye fe « ban ñe édzing deba. » Pablo a mbe é kômô naa be ban mbo-nsem a nga dzôban alé, ye bifiè bieba, aval ba tobe ye ñe, ye mimboane mieba, naa be djiiyang ñe ye n’nem ôsese, ye naa, ba dzing ñe. Aval té, be nga ye ñe tugha lere naa, ba yen mbeng naa, a bereya so ékôan été.
9. Éyong ézing, amu dzé bevoo bézing be nga yen ndzukh a djii mbo-nsem a nga dzôban ?
9 Ye bobedzang bézing be ye ékôan été, be nga yen ôyôm ndzukh naa be yebe mbo-nsem a nga dzôban alé, ékôan été ? Nlang waa dzô ki de. Ve, é ne bo naa, éñe é nga bo nèè. Da yiène, amu mimboane mièñ mi nga so mintsiè akal ékôan ése. Éyong ézing, é nga ve fe bevoo bézing ôsoan. Ngeng ézing, bevoo bézing be nga tem naa, déé nga yiène ki naa, ba bera yebe môr té ye n’nem ôsese ékôan été ane é moanñang wôba ; atoo naa, ébe be nga sèñ ngu’u naa ba tsini naa, ba tobe nfuban nfa ôtemgha (A vaghane ye Luc 15:28-30). Ve, amu dzé é mbe éban naa, ékôan é lere édzing da so a n’nem, ébe é moanñang wôba a nga bulan ékoan alé ?
10-11. Dzé é mbe boban, nge bemvene be nga tep naa ba djii mbo-nsem a nga dzôban ?
10 Tamane siman é dzam é nga ye boban nge bemvene be nga tep naa ba ñii ékôan été, mbo-nsem a nga dzôban ye n’nem ôsese. Nge ki faa, niène a nga bera ñii ékôan été, ékôan é nga tep naa da lere ñe édzing. Môr té, a mbe tobe ndzalan ye « éwiñ da neman. » A mbe wôrane naa, éé se ki fe vaghle bera sèhane Jehôva môs ézing. É mbe fe likh naa, a taa bera sèñ ngu’u, naa a kôm élat dèñ ye Nzame.
11 Édi da bera dang abé, nge bobeñang ye bekal bèñ be ye ékôan be nga tep naa, ba djii mbo-nsem a nga dzôban, be nga ye ndaman élat deba ye Jehôva. Amu dzé ? Amu naa, be nga ye vu se ki é fulu ndjiiane Jehôva akal é bôr ba bo nsem bé dzôban, ve, mbia n’nem ye é nget Satan. Be nga ye likh naa, Debele a belane be, nfa ya ve naa, môr té a taa bera sèhane Jehôva (2 Becor. 2:10, 11 ; Beéph. 4:27).
12. Aval avé ékôan é mbe vu Jehôva ?
12 Éde, aval avé ékôan ya Corinto é mbe vu Jehôva se ki Satan ? É mbe vu Jehôva dé djii ye n’nem ôsese é bôr be nga dzôban ye n’nem ôsese. Bilighe é dzam betsili bézing be ya Biblia be nga dzô nfa Jehôva. David a nga dzô naa : « A ne mbemba n’nem ye nkoghane naa, a djii » (Bya 86:5). Miqueas nge ki Michée a nga tsili naa : « Za a ne Nzame ane wa, éñi a dzame ékop ye kaa bembe ébe évus ? » (Michée 7:18) Isaïe ñe a nga dzô naa : « Mbo-abé a dzameghe mbimbia mimboane mièñ, mbia môr ki, mesimane mèñ ; a buleghan ébe Jehôva, amu naa ñe a ye kuè éngôngoo, ôwé é Nzame wèè, amu a djii ye n’nem ôsese » (Esaïe 55:7).
13. Amu dzé é mbe éban naa, be bera ñinghle ékôan été mbo-nsem ya Corinto a nga dzôban ? (A daghe nkaalé « Éyong évé be nga bera ñinghle môr ya Corinto a nga bo nsem ékôan été ? »)
13 Naa, é vu Jehôva, ékôan ya Corinto é nga yiène yem ñong mbo-nsem a nga dzôban, ye ban ñe édzing dèñ. Dé béé melepgha Pablo naa, é yebe nféféñ mbo-nsem a nga dzôban, ékôan é nga lere naa, é mbe « mewokh ébe mam mesese » (2 Becor. 2:9). Bebela a ne naa, fave ayôm mengoan ave be vèè môr té ékôan, éme me nga lôt, ve akira be nga ve ñe, é nga ve naa, a dzôban. Éde dzam té déé mbe ki éban naa be yane ayap, naa be bera ñe ñinghle ékôan été.
AVAL BI NE VU SÔSÔE YE N’NEM ÉNGÔNGOO JEHÔVA
14-15. Za meyeghle bi ne ñong ébe é dzam é nga bo ékôan ya Corinto ? (2 Pierre 3:9) (A daghe fe évaghle).
14 Be nga tsili ye baghle nlang ye aval be nga kôm é dzam é nga boban ékôan ya Corinto « akal ayeghle daa » (Bero. 15:4). Nlang té wa yeghle bia naa, Jehôva aa yebe ki naa, é bôr ba tsini naa ba bo nsem ônen kaa dzôban, be lighe ékôan été. Bôr bézing be ne tem naa, amu Jehôva a ne « n’nem éngôngoo » a ne yebe naa, môr a tsini naa a tobe ékôan été, amben a bo é dzam é ne abé kaa dzôban. Ve, se ki éñe Jehôva a lere n’nem éngôngoo wèñ aval té. Ye naa, é dzam a tem nfa abé ye mbeng, daa tsen ki. É ne été naa, Jehôva a ne n’nem éngôngoo, ve aa dzim ki mis ébe mbia mimboan (Jude 4). Nge Jehôva a likh naa, é môr a bo abé a tsini naa a tobe ékôan été kaa dzôban, aa lere ki n’nem éngôngoo vèè, amu naa dzam té é ne dzughu ékôan ngura (Mink. 13:20 ; 1 Becor. 15:33).
15 Amben aval té, bia yeghe naa, Jehôva aa kômô ki naa, môr ézing a tobe ntsaman. A kômô naa, môr ase a tobe nkôran éyong ésese é ne boban. É bôr besese ba tsen ye kômô kôm élar deba ye ñe, a lere be n’nem éngôngoo (Ézéch. 33:11 ; a lang 2 Pierre 3:9). Éde, éyong môr ya Corinto a nga dzôban, ye likh ô mvus mbia mimboan mièñ, Jehôva a nga belane Pablo naa, a lere ékôan naa, é nga yiène ñe djii, ye yem ñe ñong.
Bia vu édzing, ye n’nem éngôngoo Jehôva, éyong bia lere édzing ye mbemba fulu, ébe é bôr be va bera yebe ékôan été (A daghe mebong 14-15)
16. za dzam mia wôran nfa Jehôva, éyong mi yemeyang aval be nga kôm ntsiè ô nga boban ékôan ya Corinto ?
16 Éfônan ye ékôan ya Corinto, é va lere bia naa, Jehôva a ne édedèè édzing, sôsôe ye tetele (Bya 33:5). Ye daa ve mia nkôman ye naa, mi tugha bera lughe Jehôva ? Da yiène, amu kada môt y’ébe bia, a ne mbo-nsem, éde bia besese bia yi naa, a djii bia. Kada môr y’ébe bia, a bele mekalgha ya ve Jehôva akiba akal ntang, amu éwô wa ve naa, a djii bia. Ke da sili bia min’nem ôsi a yem naa, Jehôva a bira dzing ayong dèñ, ye naa, a kômô é dzam da dang mbeng akal bebo-bisèñ bèñ !
17. Za mam bia ye yen meyeghle ma zu ?
17 Éde, a ne ki ya éyong môr a bo nsem ônen ému ? Aval avé bemvene be ye ékôan be ne vu Jehôva nfa ya vole mbo-nsem naa a dzôban ? Aval avé ékôan da yiène ñong mam éyong bemvene ba kikh naa, ba vèè môr ékôan été, nge ki a bera ñe ñinghle ékôan été ? Bia ye yalane minsili mité meyeghle ma zu.
ZA 109 Nyeghan ye nlem ôse wenan
