1-2. (a) Za dzam Jehôva a siman nfa é bôr ba bo nsem ônen, ve, be kaa dzôban ? (b) Za dzam Jehôva a kômô naa, é bôr ba bo nsem be bo ?

 JEHÔVA aa yebe ki abo-dulu ésese ; a fem nsem (Bya 5:4-6). Jehôva a yane naa, bi bo metsing mèñ me ne a Biblia été mewokh. Bebela a ne naa, Jehôva aa yane ki naa, bi dzale me kaa bo ékop, amu bi ne bebo-minsem (Bya 130:3, 4). Aa yebe ki ‘é bôr ba ñong n’nem éngôngoo wèñ ane akalga da ve be naa, be bele mbia abo-dulu’ (Jude 4). Bebela a ne naa, Biblia a kobe adzô « ntsamane bikoar-koat bi-bôt » aluman Armagedón Nzame a ye so de (2 Pierre 3:7 ; Mel. 16:16).

² Ve daa, Jehôva aa kômô ki naa, môr ézing a tobe ntsaman. Aval bi va yeghe de nlong meyeghle me ye Ô momo wi, Biblia a tugha lere naa, « a kômô naa, bôr besese be dzôban » (2 Pierre 3:9). Bemvene ba vu Jehôva, éyong ba dzeng ye ôdzibi naa, be vole bebo-abé naa be tsen abo-dulu deba, ye bera bele ayebe Jehôva. Ve, se ki bebo-abé besese ébe ba yebe avole té (Esaïe 6:9). Bevoo, ba tsini naa ba bele mbia abo-dulu, afiang bo mengu’u bemvene ba ve naa, be vole be naa be dzôban. Éde, za dzam ba yiène bo éyong mam me ne aval té ?

 « VÈÈGHANE MBIA MÔT »

3. (a) Za dzam Biblia a dzô nfa bebo-abé baa dzôbane ki ? (b) Éyong mbo-abé a tep naa a dzôban, amu dzé bi ne dzô naa, émién a va top naa a kôrô ékôan ?

³ Éyong mbo-abé aa dzôbane ki, bemvene ba yiène fave béé atsing da kuiñ nten 1 Becorinthien 5:13 da dzô naa : « Vèèghane mbia môt ézizang denan. » Mbo-nsem a yem naa, nge aa dzôbane ki, ba ye ñe vèè ékôan été. Éde, nge a tsini naa a bo abé, a ne ane émién a va top naa, be vèè ñe ékôan été. A sap é dzam a a va bèñ (Begal. 6:7). Amu dzé bi ne de dzô ? Amu naa, mbo-nsem a va tep naa a tsen, amben bemvene be va dzia a dzeng naa, ba vole ñe (2 Bed. 17:12-15). A va lere ye mimboane mièñ naa, aa kômô ki bo metsin metsing Jehôva mewokh (Deut. 30:19, 20).

4. Amu dzé ba kare ékôan fuèñ éyong ba vèè mbo-abé ékôan ?

⁴ Éyong ba vèè mbo-nsem aa dzôbane ki ékôan été, ba kare ékôan fuèñ naa, éé se fe moan Bengaa b. Éyong ba kare ékôan fuèñ, nsonghan wéé se ki naa bia kômô ve mbo-abé ôsuan. Ndaane de, ba bôme fuèñ té nfa ye naa, ékôan é béé melepgha ma so a Biblia été ma dzô naa « be taa bera tobe élat » ye aval môr té, « amben a dzi-dzi » ye ñe (1 Becor. 5:9-11). Jehôva a bele mbemba mekalgha naa, a ve atsing té. Ntôô Pablo a nga tsili naa : « Ôyôm levadura wa ve naa, masa nge ki pâte, a vus » (1 Becor. 5:6). Nge baa vèè ki ékôan été, é môr aa dzôbane ki minsem mièñ, é ne ve é bôr bevoo ôsimane naa, déé se ki éban naa be bo metsing Jehôva mewokh (Mink. 13:20 ; 1 Becor. 15:33).

5. Aval avé bia yiène ñong é môr be vèèyang ékôan été, amu dzé ki ?

⁵ Éyong ba vèè moadzang ézing ékôan été, aval avé bia yiène tobe môr té ? Amben biaa bele ki fe élat ye môr té, bia yiène ñe ñong ane ntôma ô va dzimi, se ki ane é môr béé se ki fe bera songhan. Ntôma ô va dzimi, ô ne bera so a nda. Simeghane naa, ntôma ô va dzimi alé, ô va ve Jehôva éning dèñ. Édi é ne éngôngoo é ne naa, éé dzi ki kang é ngiagh a nga bo ñe, ye naa, dzam té da tele ñe mbia étéñ (Ézéch. 18:31). Afiang bo aval té, nté tam é ngen, ye naa, Jehôva a ne nkoghane naa, a lere ñe n’nem éngôngoo, bi bele mebun naa, Jehôva a ye ñe tsen. Éde, aval avé bemvene be bele mebun meté, amben asu é môr a va bo abé be va vèè ékôan été ?

AVAL BEMVENE BA VOLE É BÔR BA VÈÈ ÉKÔAN ÉTÉ

6. Za mam bemvene ba ye bo, naa be vole é môr be nga vèè ékôan été ?

⁶ Éyong be va vèè môr ékôan été, ye bemvene ba sim naa, ba vole ñe naa, a bulan ébe Jehôva ? Kaa dzôm ! Éyong bemvene ba dzô é môr a va bo nsem kaa dzôban, ba lere fe ñe é mam a yiène bo, naa a bera bulan ékôan. Ve bemvene baa ye ki sughu vèè. Abuiñ biyong, ba ye dzô mbo-abé naa, ba kômô ñe bera yen fave ayôm mengoan ôsu vèè naa be yen, nge a tsenang ôtemgha wèñ. Nge ayôm mengoan ôsu, mbo-abé té a yebe naa, a bera yen bemvene, ba ye ñe saghe naa, a dzôban, ye naa a bera so ékôan été. Amben aa tsen ki ôsimane wèñ tam té, bemvene ba ye dzeng naa, be bera ñe yen biyong bife mengoan ma zu vèè, naa be bera ñe saghe naa a dzôban.

7. Éyong ba vèè môr ékôan, aval avé bemvene ba lere naa, ba vu Jehôva nfa ya lere n’nem éngôngoo ? (Jérémie 3:12)

 ⁷ Bemvene ba vu Jehôva, éyong ba lere é môr be nga vèè ékôan été n’nem éngôngoo. Éfônan, Jehôva éé dzi ki yane naa, ayong dèñ Bisraelitas é de é tare dzôban, kaa naa a dzeng naa a vole de. Ndaane de, Jehôva a nga lôm be bekule medzô, kaa naa ayong té é dzôban nsem wèñ. Aval bi va yen de ayeghle bèè, ye nlong meyeghle wi, Jehôva a nga lere n’nem éngôngoo wèñ é dzô nkule medzô Oseas naa, a bera bo élat ye ngal atoo naa, éñil té, abong té a ngen a bo nsem (Osée 3:1 ; Mal. 3:7). Éyong ba vu Jehôva, bemvene ba kômô ye n’nem ôsese naa, mbo-abé a bera so, éde baa ve ki naa, dzam té é bo ñe ndzukh (A lang Jérémie 3:12).

8. Aval avé éfônan é ndôma é nga dzimi Yésu a nga belane de, da vole bia a tugha wokh é dzam Jehôva a wôran, akal é bôr ba vèè ékôan été ? (Luc 15:7)

⁸ Simeghan aval ésaa é ndôma é nga dzimi éfônan Yésu a nga ve, a nga ñong mam. Éyong a nga yen é moan wèñ ôyap naa a zu a nda, ésaa « a nga ke mbii, a wubane ñe, ye ñang ñe memang » (Luc 15:20). Bilighane naa, ésaa té éé dzi ki yane naa, ndôma dzèñ é tare ñe zu dzaa bidjiigha. Ndaane de, ésaa a nga ke mbii ébe ndôma dzèñ, amu a mbe é dzing ñe. Aval mbemba fulu té, éde fe bemvene ba dzeng naa be lere akal é bôr be va vèè ékôan été. Ba kômô naa, mintôma mi va dzimi mi « bulan a nda » (Luc 15:22-24, 32). Mevakh me ne a dzôp été éyong mbo-abé mboo a dzôban, mevakh me ne fe a si ! (A lang Luc 15:7)

9. Za dzam Jehôva a kômô naa, bebo-minsem be bo ?

⁹ Ya zu kuiñ abong di, bi yegheyang naa, Jehôva aa likh ki naa, é bôr baa dzôbane ki minsem mieba be tobe ékôan été. Ve dzam dèè, aa lum ki bebo-abé mvus. A kômô naa, be bulan ébe ñe. É dzam Jehôva a wôrane nfa bebo-minsem ba dzôban, da kuiñ nten Osée 14:4 da dzô naa : « Ma ye lere ékoar-koat deba. Ma ye be dzing kaa naa, ba yemle me de, amu naa, ôlun wom wéé se ki fe ébe be. » A yem é dzam Jehôva a wôran, da tsini bemvene naa, be dzeng naa ba yem é dzam ésese é ne lere naa, mbo-nsem a sumang a dzôban. Bifiè bité bia yiène ban é bôr besese be kôrôyang Jehôva naa, a ngen a dzing be, ye naa, a kômô naa be bulan ébe ñe.

10-11. Aval avé bemvene ba ye dzeng naa, be vole é bôr be nga vèè ékôan été melu mvus ?

¹⁰ Aval avé bemvene ba dzeng naa, be vole é bôr be nga vèè ékôan été, éyong ézing é ntoo abuiñ mimbu ému ? Ngeng ézing bôr beté baa bo ki fe nsem ô nga ve naa, be vèè bo ékôan été. Ébe biteñ bizing, a ne bo nde baa simane ki fe amu dzé be nga vèè bo ékôan été. A bo é dzam ésese é ne bo, bemvene ba ye dzeng naa, be yem é vôm be ntoo ye ke be fep. Éyong ba ye be ke fep, bemvene ba ye be sili nge ba yebe naa, be yaghlane ya be, ye dzô be naa, ba kômô naa, be bera so ékôan été. Bebela a ne naa, nge môr a va tobe ékôan atan tang abuiñ mimbu, da ye bo éban naa, a bera yeghe a yem Jehôva, ye bebebela be ya Biblia. Nge a dzô be naa, a kômô bulan ékôan été, bemvene be ne kôm mam nfa ye naa, môr a bera yeghe Biblia ye ñe, amben béé mbe ki ñe bera ñii ékôan été. Ébe bitéñ bisese bité, a ne bemvene ébe ba ye top é moadzang nge kal da ye wulu ayeghe Biblia té.

¹¹ Bemvene ba dzeng naa, ba vu n’nem éngôngoo Jehôva akal boan be-bôt. Éde, bemvene ba ye dzeng é bôr besese be nga kôrô Jehôva, ye saghe be naa, be bulan  ébe ñe. Éyong mbo-nsem a lere naa a dzôban, ye naa, a lighang mbia abo-dulu dèñ, be ne ñe bera ñii ékôan été kaa yane (2 Becor. 2:6-8).

12. (a) Za bitéñ bia sili naa, bemvene be bo édedèè nkee ? (b) Amu dzé biaa yiène ki simane naa, é bôr ba bo aval minsem mizing baa yiène ki buane n’nem éngôngoo Jehôva ? (A daghe fe atoan).

¹² Ébe bitéñ bizing, bemvene ba ye bo édedèè nkee, kaa naa be bera ñii môr ézing ékôan été. Éfônan, a tsible moan abuiñ meval, a bo Apostasía, nge ki faa, abu mefakh naa a tsam alukh dèñ. Bemvene ba yiène tugha dzeng naa be yem nge é môr a nga bo aval dzam té, a dzôbaneyang faa (Mal. 2:14 ; 2 Tim. 3:6). Ba yiène kaman bobedzang ye bekal bèè be ye ékôan. Ve daa, bia yiène baghle naa, Jehôva a ye  yebe mbo-nsem asese a dzôban ye n’nem ôsese, ye sim naa a bo abé. Éde, amben bemvene ba kômô tugha yem, nge é môr a nga bo nget ye wulu ye medukh ye é bôr bevoo, a dzôbane faa ye n’nem ôsese, baa yiène ki vaghle tem naa, aval môr té daa ye ki vaghle buane n’nem éngôngoo Jehôva c (1 Pierre 2:10).

É DZAM ÉKÔAN É NE BO

13. Za nkane ô ne é zang aval bia ñong é môr bemvene be va ve akira ye éñi be va vèè ékôan été ?

¹³ Ane bi va yen de ayeghle é daghe man di, biyong bizing, ba kare ékôan naa, be va ve môr akira. Éyong é ne aval té, bia tsini naa bia kobe ye môr té, amu bia yem naa, a va dzôban ye dzame mbia abo-dulu dèñ (1 Tim. 5:20). A ngen môr ye ékôan ye naa, a yi é bobeñang ye bekal bèñ bevoo, be tsini naa ba saghe ñe naa a bo é dzam é ne sôsôe (Behéb. 10:24, 25). Ve, déé se ki aval dèè ye é môr be va vèè ékôan été. Bia « sim naa, bia bo élat » ye môr té, « biaa dzi-dzi ki ye aval môr té » (1 Becor. 5:11).

14. Aval avé bekristen be ne belan é dzidzii wôba a ne n’yeghlane ye Biblia, éyong da daghe é bôr be va vèè ékôan été ? (A daghe fe évaghle).

¹⁴ Ye atsing da so nten 1 Becorinthien 5:11 da yili naa, bii se ki bane é môr be va vèè ékôan bisulan, nge ki a ve ñe fave mbôlô éyong a so bisulan ? Kaa, se éñe da yili nèè. Amben aval té, biaa ye ki lèè minlang ye ñe. Ve, bekristen be ne belan é dzidzii wôba a ne n’yeghlane ya Bible naa ba top nge ba ye bane bisulan é môr be va vèè ékôan été ; ane bo môr ye é nda-bôr dzeba nge ki faa naa, a mbe be angom kaa naa be vèè ñe ékôan été. Bi ne top naa, bia bane ñe naa a zu tobe ésulan ye bia. Nge a sia so ésulan, aval avé bi ne ñe ñong ? Metam ô mvus, bii mbe ki bi ve-ve aval môr té mbôlô. Vedaa, kada kristen a yiène belan é dzidzii wèñ a ne n’yeghlane ye Biblia, nfa té. Bevoo be ne top naa, ba barane ñe, nge ki faa, a ve ñe mbemba nsohan éyong a zu ésulan. Ve dzam dèè, biaa yiène ki bele minlang mia bem ye môr té, nge ki a lôt abuiñ tam naa, bia bo mam mefe ye ñe.

15. Za aval bebo-minsem ba kobe de nten 2 Jean 9-11 ? (A daghe fe nkaalé « Ye  Juan ba Pablo be mbe bé kobe adzô nsem ôvoo-ôvoo ? »)

 ¹⁵ Bôr bézing be ne sili naa, ‘Ye Biblia aa dzô naa, é kristen a ve aval môr té mbôlô, a yebe mbimbia mimboan mièñ ?’ (A lang 2 Jean 9-11) Éyong bia daghe nlang wa tsinane éfus té, wa tugha lere naa, atsing té é mbe dé daghe Bapóstatas, ye é bôr besese ba saghe mbia abo-dulu (Mel. 2:20). Éde, nge môr a mbe é sukh ye ngu’u meyeghle Bapóstatas, ye mbia mimboane mife, bemvene baa ye ki kômane naa, be ke ñe fep. Bebela a ne naa, bi ngen bi bele mebun naa, a ne tsen ôsimane wèñ melu ma zu. Ve, ya ke kuiñ dzam té da ye boban, biaa, ye ki ve aval môr té mbôlô, nga bane-bane ñe bisulan bi y’ékôan.

NVUGHANE N’NEM ÉNGÔNGOO YE É MVAM JEHÔVA

16-17. (a) Za dzam Jehôva a kômô naa, bebo-minsem be bo ? (Ézéchiel 18:32) (b) Aval avé bemvene be ne lere naa ba sèñ ye Nzame éyong ba dzeng naa, be vole é bôr be va bo abé ?

¹⁶ Za mam bi va yeghe nlong meyeghle metan ma été ? Naa, Jehôva aa kômô ki naa môr ézing a tobe ntsaman ! (A lang Ézéchiel 18:32) A kômô naa, bebo-minsem be bera kôm élat deba ye ñe (2 Becor. 5:20). Akal dzam té, éde, atéé ye melu mvus, ébe abuiñ biyong, Jehôva a nga saghe ayong dèñ é nga dzimi, ye fe é bôr be nga lum ñe mvus naa, be dzôban ye bulan ébe ñe. Bemvene be y’ékôan ba sèñ nsama ye Jehôva nfa ye naa be vole é bôr be va bo nsem ônen naa, be dzôban ye n’nem ôsese (Bero. 2:4 ; 1 Becor. 3:9).

¹⁷ Tame siman, mevakh me ne a dzôp été, éyong bebo-minsem ba dzôban ! Ésaa wèè a n’édzôô, Jehôva, a wôrane fe mevakh meté éyong ésese mintôma mièñ mi va dzimi, mia bera bulan ékôan été. Édzing dèè akal Jehôva da tsini naa da vem éyong bia binan n’nem éngôngoo wèñ, é mvam dzèñ ye é mbemba fulu dèñ (Luc 1:78).