AYEGHLE 32
ZA 44 Meyeghlan é môr a ne minzukh été
Jehôva a kômô naa bia besese, bi dzôbane minsem mia
« Jehôva [. . .] aa kômô ki naa, môr ézing a tobe ntsaman, ve a kômô naa, bôr besese be dzôbane minsem mieba » (2 PIERRE 3:9).
É DZAM BIA YE YEN
Bia ye yen é dzam môr a yiène bo naa a dzôbane minsem mièñ, amu dzé é ne éban naa bia bese bi dzôbane minsem mia, ye aval Jehôva a nga vole bôr naa be dzôbane minsem mieba.
1. Za dzam é môr a dzôbane minsem mièñ a yiène bo ?
ÉYONG bia bo é dzam é ne abé, é ne édedèè éban naa bi dzôban. Bible a dzô naa, môr a dzôban éyong a sum fem é dzam é ne abé a nga bo, a sim naa a bo dzam té, ye bele nkôman ô ne ngu’u naa a taa de bera vaghle bo (A daghe « Arrepentimiento nge ki Repentir » a Glosario nge ki Lexique).
2. Amu dzé é ne éban naa, bia besese bi yeghe é dzôm é ne adzôbane ye minsem mia ? (Néhémie 8:9-11)
2 Boan be-bôr besese, ba yiène yeghe é dzôm é ne adzôbane minsem. Amu dzé ? Amu naa, bia bo minsem éyong ésese. Kada môt ye ébe bia, bi ne é mvong Adán ye Eva, a nga ñong nsem ye awu (Bero. 3:23 ; 5:12). Da yili naa, môr ézing ye ébe bia éé se ki kaa nsem. Amben é bôr be mbe be bele bura mebun ane ntôô Pablo, be nga lumane fe ye nsem (Bero. 7:21-24). Ye da yili naa, bia yiène tobe éwiñ éyong ésese étom minsem mia ? Kaa, amu Jehôva a ne n’nem éngôngoo, ye naa, a kômô naa bi tobe mvom. Ntamane yen éfônan Bejudíos be ye metam Néhémie (A lang Néhémie 8:9-11). Jehôva éé mbe ki é kômô naa be tobe éwiñ étom minsem mieba mi ye melu mvus, a mbe é kômô naa, be kang ñe mevakh été. Jehôva a yem naa, adzôbane minsem da so mvom. Éde, a yeghle bia de. Nge bia dzôbane minsem mia, bi ne tobe ndzi-n’nem naa, Ésaa wèè a ne n’nem éngôngoo, a ye bia djii.
3. Za mam bia ye yen ayeghle di été ?
3 N’yeghan abuiñ mam mefe nfa adzôbane minsem. Ayeghle di été, bia ye yen mam melal. Ôsusua, bia ye yen é dzam Jehôva a nga yeghle Bisraelitas nfa adzôbane minsem. Éyong té, bia ye yen aval Jehôva a nga vole be naa be dzôbane minsem mieba. Asughlan, bia ye yen é dzam beyeghe Yésu be nga yeghe nfa adzôbane minsem.
É DZAM JEHÔVA A NGA YEGHLE BISRAELITAS NFA ADZÔBANE MINSEM
4. Za dzam Jehôva a nga yeghle ayong Israel nfa adzôbane minsem ?
4 Éyong Jehôva a nga ve ayong Israel metsing, a nga dzô be naa, nge be bo ñe mewokh, a ye kamane bo ye borane bo. Édi da tsinane metsing meté, a nga dzô naa : « Atoo naa, atsing ma ve wa ému, déé se ki édedèè ndzukh akal duè, ye naa, déé se ki é dzam wéé se ki bo » (Deut. 30:11, 16). Ve, nge be nga bo ñe melo, ngeng ézing bé top naa ba wume benzame befe, a nga ye be vèè biborane bièñ, éyong té be nga ye dzukh. Ve, amben aval té, be mbe bera bele ayebe Nzame. Be mbe « bera bulan ébe Jehôva, é Nzame [wôba], ye bèè é king dèñ » (Deut. 30:1-3, 17-20). Nge bi ne de dzô aval afe, be mbe dzôban. Nge be nga ye dzôban aval té, Jehôva a nga ye be yir bébéñ ye bera borane be.
5. Aval avé Jehôva a nga lere naa éé mbe ki é lame ayong dèñ é mbe dé bo ñe melo ? (2 Bedjié 17:13, 14)
5 Ayong Jehôva a nga top, é nga bo ñe melo abuiñ biyong. Be mbe bé wume biyema ye bera fe bo mbia be-mam mefe me mbe angônô. Asughlan, ane be nga bira dzukh. Ve, Jehôva éé dzi ki lame ayong dèñ amu é nga bo ñe melo. A nga lôm bekule medzô bèñ abuiñ biyong, naa be zu saghe ayong dèñ naa é dzôbane minsem mièñ, ye bulan ébe ñe (A lang 2 Bedjié 17:13, 14).
6. Aval avé Jehôva a nga belane bekulu medzô bèñ naa, a yeghle ayong dèñ amu dzé é ne éban naa é dzôban ? (A daghe fe évaghle).
6 Éyong ayong dèñ é mbe dé bo ñe melo, Jehôva a mbe é lôm bekule medzô bèñ naa be bame ye ve de akira. Éfônan, Jehôva a nga dzô ngalane nkule medzô Jeremías naa : « Bulughan, a Israel a ne melo [. . .] Maa ye ki buru asu dam ôsi ye ôlun akal duè, amu me ne sôsôe [. . .] Maa ye ki wô baghle zing mbèmbèè. Yebeghe fave naa wa ku, amu ô va bo Jehôva, é Nzame wiè melo » (Jér. 3:12, 13). Ngalane nkule medzô Joel, Jehôva a nga dzô naa : « Bulughan ébe ma, ye min’nem misese mienan » (Joël 2:12, 13). Ngalan Esaïe a nga dzô naa : « Fubeghane mina bebièn ; vèèghane mbimbia mimboane mienan asu dam ; simghane naa mia bo é dzam é ne abé » (Esaïe 1:16-19). Ye naa, ngalan Ézéchiel, Jehôva a nga sili be naa : « Ye awu mbia môr da ve ma mevakh ? [. . .] Ye maa bame kômô naa a tsen mbia abo-dulu dèñ, ye tsini naa a ning ? Awu môr ézing daa vaghle ki me ve mevakh, [. . .] éde, tseneghan abo-dulu denan ye ning » (Ézéch. 18:23, 32). Jehôva a ne édedèè mvom éyong a yen naa bôr ba dzôbane minsem mieba, amu a kômô naa be ning mbèmbèè ! Éde, Jehôva aa sum ki vole bôr fave éyong be dzôbaneyang. Ntamane yen bifônan bife bia lere de.
Abuiñ biyong, Jehôva a nga belane bekule medzô naa be saghe ayong dèñ é mbe melo, naa é dzôban (A daghe mebong 6-7)
7. Za ayeghle Jehôva a nga ve ayong dèñ, ngalane nlang nkulu medzô Osée ye ngèè ?
7 Bilighan é dzam Jehôva a nga yeghle ayong dèñ ngalan éfônan nkule medzô Osée ye ngèè, Gomer. Niène a nga bo medzian, ane a nga kôre Osée naa a ke ning ye befam befe. Za dzam Jehôva a nga bo naa a vole ñe ? Jehôva, é môr a ne lang min’nem été, a nga dzô Osée naa : « Beregha dzing ñu ngèè, éñi fam éfe é va dzing, éñi a bo medzian, aval ane Jehôva a dzing ayong Israel, atoo naa ayong té da ke ébe benzame befe » (Osée 3:1 ; Mink. 16:2). Baghle naa, a ke kuane naa, é minenga Osée a ngen a bo nsem ônen. Ve, Jehôva a nga dzô Osée naa a bera ñe ñong, a djii nsem wèñ ye bera kôm élar ye ñe a. Aval dèè fe, Jehôva éé dzi ki lame ayong dèñ é mbe dé bembe naa da bo ñe melo. Amben ayong dèñ é nga bo mbimbia minsem, a nga tsini naa a dzing de mbèmbèè. A nga tsini fe naa a lôm bekule medzô naa be vole bôr be ye ayong dèñ, naa be dzôban ye naa be tsen aval ba ning. Éfônane té, da yeghle bia naa, Jehôva, « Éñi a fas min’nem » a ye tsini naa a ve mengu’u naa a vole é môr a va bo nsem ônen, nfa ye naa a dzôban (Mink. 17:3). N’yeneghan aval a bo de.
AVAL JEHÔVA A VOLE BEBO-MINSEM NAA BE DZÔBANE MINSEM MIEBA
8. Za dzam Jehôva a nga bo naa, a vole Caín naa a dzôban ? (Atarga 4:3-7) (A daghe fe évaghle).
8 Caín a mbe é moan ôsua Adam ba Ève. Bebyèñ bèñ be nga ve fe ñe nkômane ya bo é dzam é ne abé. Nfa wèñ Bible a dzô naa : « Mimboane mièñ mi mbe abé » (1 Jean 3:12). Éyong ézing, dzam té da tugha lere amu dzé Jehôva « éé dzi ki yebe Caín ye atunegha dèñ » éyong a nga ve de. Ndaane naa a tsen mbia abo-dulu dèñ, « Caín a nga bira wokh abé, ye sili asu ôsi ye ôlun. » Za dzam Jehôva a nga bo ôsu vèè ? A nga kobe Caín (A lang Atarga 4:3-7). Baghlane naa, Jehôva a nga kobe ye Caín ye mbemba bifiè, ye dzô ñe naa, a ye borane ñe nge a bo é dzam é ne mbeng. Jehôva a nga bame fe Caín naa, nge a tsini naa a wokh ôlun, da ye ñe ve naa a bo é dzam é ne abé. Édi é ne éngôngoo é ne naa, Caín a nga tep melepgha be a nga ve ñe. Éé dzi ki likh naa Jehôva a vole ñe naa a dzôbane minsem mièñ. Ye Jehôva a nga sim naa a vole bôr naa be dzôban, amu naa Caín éé dzi ki ñe bèè ? Kaa dzôm !
Jehôva a nga dzeng naa a vole Caín naa a dzôban, ye dzô ñe naa, nge a dzôban, a ye borane ñe (A daghe abong 8)
9. Aval avé Jehôva a nga vole David naa, a dzôbane nsem wèñ ?
9 Jehôva a mbe é bira dzing kéza David. A nga luè fe ñe naa « é môr n’nem wom wa dzing » (Bisè mintôl 13:22). Ve, David a nga bo mbia minsem, a lang été, nsem évakh ye wiñ fe môt. Aval ane Atsing Moisés é nga dzô de, David a nga yiène wu (Lév. 20:10 ; Nla. 35:31). Ve, Jehôva a nga kômô ñe vole naa a dzôbane minsem mièñ b. A nga lôm nkule medzô Nathan naa a ke yen kéza té, amben a ke kuane naa, David éé be ki lere naa a dzôbane minsem mièñ. Nathan a nga belan éfônane da yiène naa a name n’nem David. Amu dzam té é nga bira ñe name, éde David a nga dzôban (2 Sam. 12:1-14). A nga tsili dzia ézing é nga lere naa a mbe é dzôbane ye n’nem ôsese (Bya 51, encabezamiento nge ki suscription). Dzia té, é voleyang abuiñ bebo-minsem ye tsini be naa be dzôbane minsem mieba. Ye daa ve bia mevakh a yem naa, ye édzing, Jehôva a nga vole mbo-ésèñ wèñ David, naa a dzôban ?
10. Za dzam mia wôran a yem naa, Jehôva a ne ôdzibi ye bia, ye fe naa a dzame bia ?
10 Jehôva a fem nsem meval mesese (Bya 5:4, 5). Ve dèè, a yem naa bia besese bi ne bebo-minsem, éde, ye édzing a bele akal dèè, a top naa a vole bia naa bi lumane nsem. A ne mban a dzeng naa a vole, amben mbo-nsem a dang bo abé, naa a dzôbane minsem mièñ ye yir ñe bébéñ. Dzam té da ve bia n’nem mbeng a yem naa, Jehôva a kômô bia vole ! Éyong bia binan ôdzibi ye é fulu ndjiane Jehôva, bia bele nkôman ô ne ngu’u naa bia sèhane ñe sôsôe, ye dzôban avôô éyong bi va bo nsem. Éndagha, bi nga zuhang yen é dzam Yésu a nga yeghle beyeghe bèñ nfa adzôbane minsem.
É DZAM YÉSU A NGA YEGHLE BEYEGHE BÈÑ NFA ADZÔBANE MINSEM
11-12. Za éfônan Yésu a nga belane de, naa a yeghle bia nté mbé Jehôva a ne nkoghane naa a dzame bia ? (A daghe évaghle é ne ).
11 Ntet mimbu ôsua ye melu mèè, éde é tam Mesías a nga yiène so é nga kuiñ. Aval bi nga yen de ayeghle é nga man, Jehôva a nga belane Juan ndu-bôt ye Yésu Krist naa a yeghle bôt amu dzé é ne éban naa môr a dzôbane nsem (Mat. 3:1, 2 ; 4:17).
12 Nté sese a nga bo ésèñ minkanghle dèñ, Yésu a nga yeghle bebèè bèñ, é fulu ndjiane Jehôva, Ésaa wèñ. Yésu a nga ve môra ayeghle té, éyong a nga belane nlang é ndôma é nga dzimi. Étong moan fam té, é nga top naa da kôrô é nda ésaa, ye bo mbimbia be-mam mézing. Ve, niène ôyôm tam é nga lôt, « a nga bera sum fas a mvoa été » éde a nga bulan a nda. Aval avé ésaa a nga ñong ñe ? Yésu a nga dzô naa, nté ndôma té « é mbé dé zu ôyap, ésaa a nga yen ñe, ane a nga kué ñe éngôngoo. Éde a nga ke mbii ébe ñe, ye wubane ñe ye édzing. » Ndôma té, a mbe é kômô dzaa ésaa nge a ne bera zu a nda, ve, ésaa a nga luè ñe naa « ndôma dzam », ye bera ñe tele étéñ dèñ a nda-bôr été. Ésaa a nga dzô naa : « A nga dzimi, abong di a bera yeneban » (Luc 15:11-32). Éyong Yésu a mbe é ning a dzôp été, kaa naa a zu a si va, bebela a ne naa, a nga yen ane Ésaa wèñ a nga lere aval n’nem éngôngoo té ébe abuiñ bebo-minsem be nga dzôban. Nlang Yésu a nga kanghle bia vèè alé, wa tugha bia fôlô ye lere nté mbé Ésaa wèè, Jehôva, a ne n’nem éngôngoo !
Ésaa ye éfônan é moan a nga dzimi Yésu a nga belane de, a ke mbii naa a ke wuban é moan wèñ a nga dzimi, amu ñil té a va bulan a nda (A daghe mebong 11-12)
13-14. Za dzam ntôô Pedro a nga yeghe nfa adzôbane minsem, ye naa, za dzam a nga yeghle é bôr bevoo nfa té ? (A daghe fe évaghle).
13 Ntôô Pedro a nga yeghe abuiñ mam ébe Yésu nfa adzôbane minsem ye fulu ndjiane. Pedro a nga bo abuiñ minsem, ve, Yésu a mbe a bele nkômane naa a djii ñe. Éfônan, niène Pedro a nga dzô ébe biyong bilal naa aa yem ki Nti, ane dzam té é nga ve naa a bira dzôban (Mat. 26:34, 35, 69-75). Ve, niène Yésu a nga wômô, a nga lereban ébe Pedro, éyong ézing, éyong a mbe étam (Luc 24:33, 34 ; 1 Becor. 15:3-5). Kaa bisô naa, tam té, Yésu a mbe é yem naa, Pedro a mbe é dzôbane minsem mièñ, éde a nga kômô ñe ban naa a djiiyang ñe (A daghe Marc 16:7 ye nota de estudio « y a Pedro » nge ki note d’étude « et à Pierre »).
14 Ye é mam mesese me nga biaane ñe, Pedro a mbe yeghle é bôr bevoo, é dzôm é mbe adzôban ye fulu ndjiane. Ôyôm tam ôsu, niène fet Pentecostés nge ki Pentécote é nga lôt, Pedro a nga tebe môra ntun akal Bejudíos béé nga bunu ki, é lere be naa be nga wiñ Mesías. Ve, a nga saghe fe be ye édzing, é dzô be naa : « Dzôbeghane ye bulan ô mvus, nfa ye naa minsem mienan mi tobe ntsaman, ye naa, metam me ne avuèñ me so ébe Jehôva émièn » (Bisè mintôl 3:14, 15, 17, 19). Pedro a nga lere vèè naa, a dzôban da ve naa, mbo-nsem a bulan ô mvus, a tsen mbia mimboan ye mesimane mèñ, ye bele abo-dulu da ve Nzame n’nem mbeng. A nga lere fe naa, Jehôva a ye mane tsam minsem mieba nge ki a ve naa, minsem mieba mi mane dzang. Abuiñ mewôm mimbu ôsu, Pedro a nga ban bekristen naa : « Jehôva [. . .] a ne ôdzibi ya mina amu aa kômô ki naa môr ézing a tobe ntsaman, ve, a kômô naa bôr besese be dzôbane minsem mieba » (2 Pierre 3:9). Éyong bia dzôbane minsem miè, amben a ne nsem ônen, da sili bia n’nem ôsi a yem naa, Jehôva a djii bia ye n’nem ôsese !
Ye édzing, Yésu a nga dzame ye saghe ntôô wèñ ô nga dzôban (A daghe mebong 13-14)
15-16. (a) Aval avé ntôô Paul a nga yeghe fulu ndjiane ? (1 Timothée 1:12-15) (b) Za dzam bia ye yen ayeghle da zu ?
15 Saul ya Tarse a nga bo abuiñ mbimbia be-mam. A nga tsible ye nget mindzidzing beyeghe Krist. Abuiñ bekristen be mbe bé yen ñe ane é môr éé se ki tsen, éñi éé se ki vaghle dzôban. Ve Yésu, a mbe é yem naa, Saul a mbe tsen ye dzôbane minsem mièñ. Éñe ye Ésaa, be nga yen mbemba mefulu ébe Saul. Yésu a nga dzô naa : « Môr té éñe a ne é ndak me nga top naa a ke a kanghle meyong éyôla dam » (Bisè mintôl 9:15). Yésu a nga belane fe akengha naa a vole Saul naa a dzôban (Bisè mintôl 7:58–8:3 ; 9:1-9, 17-20). Niène a nga tobe moan kristen, Saul, éñi be nga sughlane luè naa ntôô Paul, a nga lere naa a yem mbeng, akal é mbemba fulu ye n’nem éngôngoo be nga lere ñe (A lang 1 Timothée 1:12-15). Amu a mbe é yem mbeng be nga bo ñe, ntôô Paul a nga yeghle bobeñang ye bekal bèñ naa : « Nzame, ye é môra fulu ndjiane wèñ, a dzeng naa a kee mia ndjiane » (Bero. 2:4).
16 Éyong ézing Paul a nga wokh naa, ékôan ya Corinto nge ki Corinthe é nga likh naa é môr a bele mbia abo-dulu nfa nkehane binong a tsini naa a tobe ékôan été. Za dzam a nga dzô be naa be bo ? Éyong bia lang é dzam a nga dzô, bi ne yeghe aval Jehôva a lere édzing éyong a suru bebo-bisèñ bèñ, ye lere n’nem éngôngoo éyong ba dzôban. Bia yeghe fe aval bi ne ñe vu. Bia ye tugha fakh nlang té, ayeghle da zu.
ZA 33 Kaghe Jehôva mbeghe wiè
a Aval dzam té déé dzi ki bera boban éyong éfe. Ému, Jehôva aa yemle ki é môr n’nôm nge ki ngèè a va bo medzian, naa a tsini alukh ye ñe. Bebela a ne naa, Jehôva a nga dzô Ndôma dzèñ naa, a kôm mam nfa ye naa, é môr a tele aval étéñ té, naa n’nôm nge ki ngèè a va bo medzian, a ne sili naa a vas nge a kômô de bo (Mat. 5:32 ; 19:9).
b A daghe nlô-adzô « ¿Qué significa para usted el perdón de Jehová? nge ki Que signifie le pardon de Jéhovah pour vous ? » a La Atalaya, 15 de noviembre de 2012 págs. 21-23, párrs. 3-10 nge ki La Tour de Garde, 15 novembre 2012 p. 21-23, §3-10.
