1. Za be bebela ô nga yeghe éyong ô nga sum yeghe Bible ?

 Y’Ô NGENE wa siman é mam mesese ô nga yem éyong ô nga sum yeghe Bible ? Éyong ézing ô nga sighan éyong ô nga yem naa, Nzame a bele éyôla. Éyong ézing, éyong ô nga yem naa Nzame aa dzighi ki bôt ébéñ nduan, é nga sili wô n’nem ôsi. É nga yiène fe wô ve mevakh éyong ô nga yem naa, wa ye bera yen é bôt ô va dzimle ye ning ya be a Paradis a si va.

2. Kaa vuène be bebela be ya Bible ô yegheyang, za mam mefe ô bohang nfa ya vem yazukuiñ éndagha ? (Beéphésien 5:1, 2)

² Nté sese ô nga bira ke wa yeghe Nkobe Nzame, nté té ése, édzing duè akal Jehôva é nga bira vem. Édzing é nga tsini wa a dzale é dzam ô nga yeghe. Ô nga ñong mbemba minkighane mi tsii ébe metsin metsing me ya Bible. Ô nga kôm mefulu, y’abo-dulu duè, amu ô nga kômô ve Nzame n’nem mbeng. Aval ane é moan a vu bebyèñ be ne édzing, ô nga vu Ésaa wônan a ne a dzôp—A lang Beéphésien 5:1, 2.

3. Za minsili bi ne sili bia bebién ?

³ Bi ne sili bia bebién naa : ‘Y’édzing dam akal Jehôva é ne édedèè ngu’u éndagha a lôt éyong me nga duban ? Ave me duban, y’aval ma siman ye bo mam da fônan édi Jehôva, dang-dang nfa ya lere bobedzang ye bekal bam édzing ?’ Nge « édzing mi mbe mii bele atarga » é bohang naa da sibi, mi taa sili mo ôsi. Aval dzam té é nga bo fe bekristen be ye nten mimbu ôsua. Yésu éé dzi ki be lame, mina fe, aa ye ki mina lame (Mel. 2:4, 7). A yem naa, bi ne bera yeghe a wôran édzing bi mbe bi bele atarga, éyong bi nga yem bebela.

4. Za dzam bia ye yen ayeghle di été ?

⁴ Ayeghle di été, bia ye yen aval bi ne k’ôsu ye veme édzing dèè akal Jehôva y’akal é bôt bevoo. Éyong té, bia ye  yen biborane bia, y’é bôt bevoo bi ne bele éyong bia wône édzing dèè.

5-6. Za minzukh Paul a nga tubane mio ésèñ minkanghle dèñ, ve dzé é nga tsini ñe naa a k’ôsu ye sèhane Jehôva ?

⁵ Ntôl Pablo a nga bele mbemba éning ésèñ a nga bo akal Jehôva, ve, a nga tuban abuiñ minzukh a nga yiène dang. Abuiñ biyong a nga bo bura bikena, ve, bii mbe ki ébubu metam meté. Éyong a mbe éé bo bikena bité, biyong bizing Paul a nga tubane « mbia be-mam ashuiñ » ye « mbia be-mam ma so ye minwuwup. » Ya fe naa, metam mézing minzizing mièñ mi nga yit ñe (2 Becor. 11:23-27). Kaa ki vuèn naa, é bobeñang be ya nsisim Paul, béé nga lere ki éyong ésese naa ba yem mbeng Paul a nga bo be nfa ya vole be—2 Becor. 10:10 ; Beph. 4:15.

⁶ Dzé é nga vole Paul naa a k’ôsu ya sèhane Jehôva ? Paul a nga yeghe abuiñ mam nfa aval môt Jehôva a ne, ngalane Mintsili ya é mam a nga yen éning. Paul a nga bele ndzi-n’nem naa Jehôva Nzame a mbe éé dzing ñe (Bero. 8:38, 39 ; Beéph. 2:4, 5). É nga ve naa a bira dzing Jehôva. Paul a nga lere édzing dèñ akal Jehôva « éé sèñ ye minfufup ye k’ôsu ya sèhane bo »—Behéb. 6:10.

7. Aval avé bi ne veme édzing dèè akal Jehôva ?

⁷ Bi ne veme édzing dèè akal Nzame, éyong bia tugha yeghe Nkobe wèñ. Nté wa lang Bible dzenghe naa ô yem é dzam kada éfus da yeghle wa nfa Jehôva. Silighe wamièn naa : ‘Aval avé éfus di da lere naa Jehôva a dzing ma ? Za mekalgha éfus té da ve me naa me dzing Jehôva ?’

8. Aval avé meyaghlan me ne bia vole a veme édzing dèè akal Nzame ?

⁸ Aval évoo bi ne veme édzing dèè akal Jehôva, é ne a yaghlane ñe mban ya n’nem ôsese (Bya 25:4, 5). Nfa wèñ, Jehôva ñ’a ye yalane meyaghlane mèè (1 Jean 3:21, 22). Khanh, kal dzèè y’Asia, a dzô naa : « Ôsusua me nga dzing Jehôva amu me nga yeghe a yem ñe, ve, éyong me nga yen aval a yalane meyaghlane mam, édzing dam é nga bira vem. Dzam té, é nga ve ma nkômane y’a bo é dzam da ve ñe n’nem mbeng b. »

9. Aval avé Timothée a nga lere naa a veme édzing dèñ akal bobeñang ye bekal bèñ ?

⁹ Ayôm mimbu niène a nga bo moan kristen, Paul a nga tubane étong fam é too éyôla naa Timothée. Timothée a mbe éé dzing Jehôva ya bôt. Paul a nga dzô Bephilipppien naa : « Méé bele ki é môt a bele mefulu ane ééméñ [éma Timothée] éñi a bira bis é mam ma daghe mina » (Beph. 2:20). Paul aa kobe ki é mam Timothée a ne bo nfa a kômane mam nge ki a kobe a bôt été, ve Paul a mbe yen édzing Timothée a mbe a bele akal bobeñang ya bekal bèñ. Kaa bisô naa, bôt be ye bikôan Timothée a nga k’a fep, be nga kômô naa asoo dèñ é kuiñ avôô—1 Becor. 4:17.

10. Aval avé Anna ye n’nôm be nga lere édzing be nga wôran akal é bobeñang beba ?

¹⁰ Bia fe, bi ne dzeng meval bi ne vole bobedzang ya bekal bèè be ne bekristen (Behéb. 13:16). N’yeneghan é dzam é nga bo Anna, éñi bi nga tu ayeghle ô mvus. Niène mura ôkôs ô nga lôt, éñe ye n’nôm be nga ke daghe nda bôt moan Bengaa, ane be nga yen naa ndzii ye nda bôt té ô mana tsam. Ya dzam té, nda bôt té déé mbe ki é bele bitôp bi ne nfuban. Anna a dzô naa : « Bi nga toa bitôp bieba, bi mane  bi sôp, a kua ye ba bio. Ébe bia, a mbe moan dzam, ve, amu bi nga bo de, é nga ve naa bi bo mbemba memvuiñ yazukuiñ ému. » Édzing Anna ye n’nôm be nga lere bobeñang ye bekal beba, é nga tsini be naa be bo dzam—1 Jean 3:17, 18.

11. (a) Za dzam é bôt bevoo be ne wôran é tam sese bia lere be édzing dèè ? (b) Aval ane nten Minkana 19:17 wa lere de, aval avé Jehôva a ñong mam éyong bia lere é bôt bevoo édzing ?

¹¹ Éyong bi ne mbemba fulu ye lere é bô bevoo édzing, be ne yen mengu’u bia ve nfa ya yen ye bo mam ane Jehôva. Éyong ézing ba ye dzing ba yen é mbemba fulu bia lere be, a lôt aval biaa simane ki de. Khanh, éñi bi va tare tu ayô, a simane y’édzing é bôt be nga vole ñe. A dzô naa : « Ma bira yem mbeng akal é bobedzang be nga k’a ma minkanghle. Be nga zu me ñong a nda ye bane ma naa me ke dzi ye be ye tugha daghe naa me yem ñii é nda dzam éyong bi nga man. Éndagha, me woghang naa a mbe abuiñ ésèñ akal deba. Be nga bo fe de ya mevakh. » Bebela a ne naa, môt asese aa ye ki bia mane ve akiba akal é mam bia bo be. Nfa y’é bôt be nga vole ñe Khanh a dzô naa : « Ma kômô be ve akiba akal é mbemba be-mam be nga bo ma, ve, maa yem ki fe é vôm besese ba tobe éndagha. Édi é ne mbeng é ne naa, Jehôva ñ’a yem, éde ma yaglane ñe naa a yaane be akal dam. » É dzam Khanh a dzô é ne bebela. Jehôva a yen é boan be-mam mesese bia bo akal é bôt bevoo, amben me ne édedèè avitsang. A ñong de ane atunegha é ne édedèè tang nden y’ane é mvôla a ye bulan—A lang Minkana 19:17.

12. Aval avé bobedzang be ne lere édzing deba akal ékôan ? (A daghe fe bivaghle).

¹² Nge ô ne fam, aval avé ô ne lere é bôt bevoo naa wa dzing be ye kômô be vole ? Étong moadzang a too éyôla naa Jordan a  nga sili mvene é dzam a ne bo naa a bira vole bobeñang be y’ékôan. Mvene a nga saghe ñe akal aval a vemang yezukuiñ éndagha, ôsu vèè, a ve ñe ayôm melepgha nfa aval a ne bo abuiñ mam mefe. Éfônan a nga sili Jordan ng’a ne bo éé so ya tam a Nda ékôan ye ve é bôt bevoo mbôlô, a yalane bisulan, a kanghle éyong ésese y’angôs minkanghle dèñ, ye dzeng meval a ne be vole. Éyong Jordan a nga bo de, éé dzi ki bo v’a yeghe minféféñ mi-mam, a nga yeghe fe a bira dzing bobeñang ye bekal bèñ. Jordan a nga yeghe naa éyong moadzang a bo amvene, aa sum ki ya vole é bôt bevoo ; ndaane de, a k’ôsu ya vole be—1 Tim. 3:8-10, 13.

13. Aval avé édzing é nga tsini moadzang a too éyôla naa Christian naa a bera sèñ ane mvene ?

¹³ A ne ki yè nge mi nga sèñ ane amvene nge ki mvene ? Jehôva a simane ésèñ mi nga bo melu mvus, y’édzing é nga tsini mina naa mi bo de (1 Becor. 15:58). A yen fe édzing mia tsini naa mia lere. Moadzang ézing a too éyôla naa Christian a nga wokh n’nem mintèñ éyong be nga vèè ñe ane mvene. Ve, a dzô naa : « Me nga kikh naa, ma bo é dzam ésese me ne bo naa me sèhane Jehôva y’édzing, a bo naa me bele meyem nge ki kaa. » Niène tam é nga lôt ane be nga bera ñe tele mvene. Christian a yebe naa : « A bera sèñ ane mvene é nga ve ma ôyôm wong. Ve, me nga kikh naa, nge Jehôva ngalan é mvam dzèñ a likh me naa me bera sèñ ane mvene, ma ye de bo amu édzing me bele akal dèñ y’akal bobedzang ye bekal bam. »

14. Za ayeghle mia ñong y’é dzam kal dzèè ya Georgia nge ki Georgie a dzô ?

¹⁴ Be-bo bisèñ Jehôva ba lere fe édzing deba é bôt be too be minfeng (Mat. 22:37-39). Éfônan, Elena, kal dzèè ya Georgia nge ki Georgie, a dzô naa : « Atarga, é  dzam étam é nga tsini me naa me kanghle a mbe édzing dam akal Jehôva. Ve, nté sese édzing dam akal Ésaa wom a ne a dzôp é nga ke da vem, édzing dam akal bôt daa fe é nga vem. Me nga dzeng naa me yem minzukh be nga tubane mio, ye minlô-medzô mii mbe name min’nem mieba. Nté sese me mbe méé bira siman aval té, nté té sese, nkômane wom ya vole be, ô mbe wéé vem »—Bero. 10:13-15.

15-16. Aval ane bia yen de évaghle da lere é dzam é nga boban, za biborane bia so éyong bia lere é bôt bevoo édzing ?

¹⁵ Éyong bia lere é bôt bevoo édzing, s’ébe étam ba buane de. Ôyôm tam niène ôkoan COVID-19 ô nga sum, moadzang ézing a too éyôla naa Paolo ya ngal be nga vole abuiñ bekal bèè be ne min’nôm a belane é b’aparatos beba nfa ya bo minkanghle. É kal dzèè, é mbe ñe ndzukh naa a belan aparato dèñ, a nga yemang de bo éndagha. A mbe belane de naa a bane é bôt bèñ Ésesang ôsiman awu Yésu. Bôt mewôm mesaman be y’été be nga tobe Ésesang ôsiman awu Yésu ngalane videoconferencia ! Kal dzèè ye bôt be y’é nda-bôt dzèñ besese be nga buane ye mengu’u Paolo ba ngal be nga ve. Ôsu vèè, kal dzèè a nga tsili Paolo naa : « Akiba amu ô nga yeghle bia min’nôm. Maa ye ki vuèn nté mbé Jehôva a bis bia y’é ngu’u sese ô nga ve naa ô vole bia. »

 ¹⁶ Aval minlang mité mi nga ve Paolo mura ayeghle. Mi nga yeghle ñe naa édzing da dang mura dzam a lôt n’yeman nge ki akeng. A dzô naa : « Me mbe ndeghe bikôan. Ému wi, ma wokh naa, amben bebèè be vuèneyang mintun me nga ve be, ve, be ngene ba siman é mam me nga bo naa ma vole be. »

17. Za nfe a ye buane éyong bia lere édzing ?

¹⁷ Éyong bia lere é bôt bevoo édzing bia bebién bia ñong biboran biaa mbe ki bii yane. Jonathan, éñi a ning a Nueva Zelanda nge ki Nouvelle Zélande a ban dzam té. Ngogho ézing y’é môs Sábado nge ki Samedi, a nga yen mpwaghe mefan éé kanghle ésala ayô. Jonathan a nga kikh naa a ye kanghle ye mpwaghe mefan té be sábado ba zu ôsu vèè. Éé dzi ki yem nté mbé émién a nga buane mboan édzing a nga lere tam té. Jonathan a yebe naa, « Metam meté, méé mbe ki méé dzing ésèñ minkanghle. Ve, éyong me nga yen ane mpwaghe mefan té a yeghle ye yen nté mbé ésèñ minkanghle dèñ é nga wulu ñe mbeng, me nga sum naa ma dzing ésèñ minkanghle. Moadzang té a nga bo fe angom é ne m’édedèè élat, a vole m’a vem nfa ya nsisim, a dzing minkanghle ye yit Jehôva bebéñ. »

18. Za dzam Jehôva a kômô naa bi bo ?

¹⁸ Jehôva a kômô naa bia besese bi veme édzing dèè akal éñe y’é bôt bevoo. Aval bi va yen de, bi ne wône édzing dèè akal Jehôva éyong bia lang Nkobe wèñ, a binane wô, ye yaghlane ñe mban. Bi ne veme édzing akal bobedzang ye bekal bèè éyong bia ve be avole da yiène. Nté sese édzing dèè da ke da vem, nté sese té, bia ye yit Jehôva y’é nda-bôt dzèè ya nsisim bebéñ. Bia ye fe buane memvuiñ meté mbèmbèè !