Amben aval té, Jehôva a kômô naa bi yane ya ôdzibi é tam a kighang naa a ye kôm mam. Amu dzé a kômô naa bi bo de ? Za dzam é ne bia vole naa bi tobe mevakh été nté bia yane ?

AMU DZÉ JEHÔVA A KÔMÔ NAA BI YANE ?

Bible a dzô naa : « Jehôva a yane ya ôdzibi naa a lere mia é môra mvam dèñ, éde, a ye tebe naa a lere mia n’nem éngôngoo. Amu naa Jehôva a ne é Nzame a ne sôsôe. Mvom ébe é bôt besese ba tsini naa ba yane ñe » (Esaïe 30:18). Ôsusua, bifiè Esaïe bité, Nzame a nga tare bi dzô Bejuif be mbe melo (Esaïe 30:1). Ve, abong té ayôm Bejuif bézing be ngene sôsôe, éde bifiè bité bi nga ve be ôyane. Bifiè bivoo-bivoo bité, bia ve fe bebo bisèñ Jehôva be ne sôsôe ému ôyane.

Éde, bia yiène yane y’ôdzibi, amu naa Jehôva émièn ñ’a yane fe y’ôdzibi. A kighang é tam a ye man ye ntukh ému wi, éde a yane naa môs ye awala té be kuiñ (Mat. 24:36). Tam té, da ye tugha lerebane naa, bibôra Satan a bo nfa Jehôva ye é bôt ba sèhane Ñe, bi ne minèè. Éyong té a ye vèè Satan y’é bôt besese be ne é ngam dèñ, ve a ye « [bia] lere n’nem éngôngoo. »

Nté té, Jehôva a ne bo kaa mane vèè minzukh miè, ve a ban bia naa bi ne tobe mvom nté bia yane ñe. Aval Esaïe a nga lere de, bi ne bele mvom nté bia kômô ya n’nem ôsese nge ki bi bele ôyane naa é dzam é ne mbeng é boban (Esaïe 30:18 a). Aval avé bi ne bele mvom ? Émam menii ma, me ne bia vole.

AVAL BI NE TOBE MVOM NTÉ BIA YANE

Simghan é mam me ne mbeng ma boban éning duè. Kéza David a nga yen abuiñ mbimbia bemam éning sese dèñ (Bya 37:35). Ve, a nga tsili naa : « Tobeghe évôô asu Jehôva wéé yane ñe y’ôdzibi. Ô taa wokh abé akal é moan môt a va dzale mbimbia bemam a va kôman » (Bya 37:7). David émièn a nga dzale melepgha meté éyong a nga bem ôsimane wèñ ébe akôrô Nzame a nga kiagh ñe. A nga yem fe mbeng akal é mbemba bemam mesese  Jehôva a nga bo akal dèñ (Bya 40:5). Nge bia fe bia bembe ébe é mam me ne mbeng étéñ dèè, kaa bem ôsimane wèè ébe mbia bemam ma boban bia mifeng, da ye bia bo ébubu naa bi yane Jehôva.

Kobeghe é mam me ne mbeng nfa Jehôva, éyong ésese. É môt a nga tsili Bya 71, ngeng ézing David, a nga dzô nfa Jehôva naa : « Ma ye tsini naa ma yane ; Ma ye wô tugha bera ve ôlughu » (Bya 71:14). Aval avé a mbe éé lughu Jehôva ? A mbe éé kobe é bôt bevoo adzô Jehôva ye yiè ñe bya bi ôlughu (Bya 71:16, 23). Ane David, bi ne bele mevakh nté bia yane Jehôva. Bia lughu ñe ngalane minkanghle miè, minlang miè, y’é bya bia yiè bisulan. Éyong éfe wa ye bera yiè bya bi ôlughu, ye wéé se tame bembe ébe ayilgha ye bifiè bia kuiñ été, y’aval bia ve wô mevakh ?

Lighe naa bobeñong ye bekal buè be saghe wa. Éyong David a nga tubane minzukh a nga dzô Jehôva naa : « Ézizang besôsôe bebo bisèñ buè, ma ye bele ôyane ébe éyôla duè » (Bya 52:9). Besôsôe bobedzang ye bekal bèè be ne fe bia saghe, se ki fave bisulan ye mikanghle, ve ya fe éyong bia lôt mbemba biyong ye be (Bero. 1:11, 12).

Wôneghe ôyane wiè. Bya 62:5 a dzô naa : « Ma yane Nzame me too évôô amu naa ôyane wom wa so ébe ñe. » É ne édedèè éban naa bi bele ôyane ô ne édedèè ngu’u, dang-dang nge amanegha daa so ki é tam bi va yane de. Bia yiène bele ndzi-n’nem naa mengiagh Jehôva ma ye dzalban é tam a va kikh de, amben da sili naa bi tsini naa bia yane de ayap. Bi ne wône ôyane wèè éyong bia yeghe Nkobe Nzame. Éfônan, simghan é mam mesese Bible a nga dzô, me dzalbaneyang, aval betsili Bible be nga tsili faa ane be nga woghan, ye aval Jehôva a tugha mane k’a lere aval môt a ne (Bya 1:2, 3). Ya fe naa, bia yiène tsini naa bia « dzaa ñe nfufup nsisim wèñ » nfa ya tsini naa bia bele mbemba élat ya Jehôva, nté bia yane naa, é ngiagh dèñ nfa éning é ne mbèmbèè é dzalban (Jude 20, 21).

Ane David, m’beleghane ndzi-n’nem naa, Jehôva a baghle é bôt besese ba yane Ñe ye lere be édzing dèñ é ne sôsôe (Bya 33:18, 22). Tsinighe naa wa yane Jehôva y’ôdzibi, wéé bembe ébe é mam me ne mbeng éning duè, wéé lughu ñe, wéé dzeng naa bobeñong ye bekal buè be saghe wa, ye tsini naa wa baghle ôyane ô ne ngu’u.