BIYONG bizing, betsili Bible be mbe béé baalé mam mevoo-mevoo. N’yeneghan Mekalgha melal me nga yiène be tsini naa be baalé bifiè bizing :

Éyong é nga tobe ntsilan. A Israël ye metam ô mvus, abuiñ bôt béé mbe ki be bele mintsilan mi ye abakh metsing. Be mbe béé wokh ane ba lang Atsing fave éyong ayong ngura é mbe déé ke tuban a tabernacle (Deut. 31:10-12). Nté be mbe béé bèè nlanghane, be tele tang abuiñ mewala, abuiñ bidung bii mbe vôm té (Néh. 8:2, 3, 7). Aval metam meté, a baalé bifiè bi ne éban é nga ye vole ayong naa, be simane mam meté ye dzale me bining bieba. A baalé bifiè bizing, é nga ye be vole naa be baghle é boan bemam mézing me ne Atsing Jehôva a nga ve be (Lév. 18:4-22 ; Deut. 5:1).

Aval é nga tobe ntsilan. Ngap 10 ébe ntet ya Bible, é nga tobe ntsilan ane bya ; bi ne lang été, nten Bya, Za Salomon ye Minyamle. Biyong bizing bya bité bii mbe bi bele ékaa, dé mbe déé ngône nlô-adzô ye za, nfa ye naa bebèè be baghle bie ya nlô. Éfônan, bilighane bifiè bia yen nten Bya 115:9-11 : « A Israël, beleghe mebun ébe Jehôva. A ne nkôre wôba y’ében deba. Éé nda-bôt Aaron, beleghane mebun ébe Jehôva. A ne nkôre wôba y’ében deba. Mina, é bôt ba ko Jehôva wong, beleghane mebun ébe Jehôva. A ne nkôre wôba y’ében deba. » Ye mi ne yen nté mbé a baalé bifiè bité, éé mbe vole beyiè bya naa be baghle mesiman ma dang éban min’nem mieba été ?

Amu dzé be nga tsili de. Biyong bizing, betsili Bible be mbe béé baalé minlong bifiè bi nga dang éban. Éfônan, éyong Jehôva a nga kee Bisraélite atsing naa be taa dzi mekî, a nga baalé Moisés akalgha ye atsing té abuiñ biyong. Nzame a nga kômô ngône ôsimane naa, éning é dzôm ése é tèè, é ne mekî été, da yili naa, mekî me ne éning (Lév. 17:11, 14). Abuiñ mimbu ôsu, éyong mintôl ye bemvene be y’a Jérusalem be nga tubane naa ba kikh éé mam bekristen ba yiène saalé naa be taa ve Jehôva n’nem abé, be nga bera ngône ôsimane ye naa, ba yiène kî mekî (Bisè mintôl 15:20, 29).

Amben Bible a baalé bifiè nge ki minlong bifiè bizing, dzam té daa yili ki naa, Jehôva a nga kômô naa, bi bele fulu ya baalé nlong bifiè nge ki bifiè bizing. Éfônan, Yésu a nga dzô naa : « Éyong mia yaghlan, mi taa bo mii baalé bifiè bivoo-bivoo » (Mat. 6:7). Éde, a nga tu mam mézing bi ne ve meyaghlan été, ma wule nsama ye nkômane Nzame (Mat. 6:9-13). Éde, nté bia ke bia dzeng naa bi saalé naa bia baalé bifiè bivoo-bivoo meyaghlan été, bi ne fili ya baalé minlô medzô mevoo-mevoo meyaghlan mèè été (Mat. 7:7-11).

Nkobe Nzame wa baalé bifiè nge ki minlong bifiè bizing, amu é bele mbemba akalgha ya bo de. A ne aval évoo, y’abuiñ meval, é Môra N’yeghle wèè, Jehôva, a belane de naa a yeghle bia akal mbeng wèè (Esaïe 48:17, 18).