Nzame aa sili bobebôr bese naa be yire nye bebéñ ye meyaghlan (Bya 65:2). Ve daa, aa bèè ki, da yili naa aa yebe ki, meyaghlan mesese. Bia tam ñong éfônan meyaghlan é môr a ndeghle ngal, me ne bo keghe kuiñ ébe Nzame (1 Pierre 3:7). Nté mbokh fe, ane é ma ayong Israël é mbe mban a bo abé, Nzame aa mbe keghe mo wokh. Ve dzam daa, Nzame aa bèè meyaghlan be bo minsem ba dzôban abé ba bo, mben mi ne minsem minen. É ne fe bebela naa meyaghlan me ne bia édeda éban.​—A lang Ésaie 1:15 ; 55:7.

Deghe éngengeng Ye Nzame aa wokh meyeghlan mese ?

Meyaghlan me n’éé éban a mbunan été ; ve bia yiane yaghlan foghe ve mvele waa étam, Jehôva (Matthieu 4:10; 6:9). Éde fe, bi fiang bo bebo minsem, bi ne yaghlan ye éyôla Yésu, amu Yésu a nga wu akal minsem mia (Jean 14:6). Jehôva aa kômô ki naa be baalan meyaghlan ye nlô, nge ki a lang mo ntsilan a kalare été. Aa kômô naa meyaghlan maa me so bia a n’nem.​—A lang Matthieu 6:7 ; Bephilippien 4:6, 7.

Mvele waa a wokh fe meyaghlan bia bo a n’nem été (1 Samuel 1:12, 13). Aa kômô naa bi yaghlan éyong ésese: kikiri ye ngoghe ase, éyong wa dzi y’éyong wa tuban minzukh, y’é mam mese mevokh.​—A lang Bya 55:22 ; Matthieu 15:36.

A yire Nzame bebéñ déé se ki ébubu a bo, amu bia ning é zang bôr be ne keghe buini Nzame, y’é ba bevokh ba pweghle é ngakh dzéñ naa si da ye tobe a mvoghe été (2 Timothée 3:1, 4 ; 2 Pierre 3:3, 13). Akal te éde bi ne de ashèñ naa bi  wulu nsama mbokh ye é bôr bia be bo bi ne n’yebe Nzame mbokh, naa bi vaghan ayokh.​—A lang Behébreu 10:24, 25.

E wulu nsama mbokh ye é bôr ba nyeghe Nzame da vole bia naa bi yire Nzame bebéñ. Bisulan Bengaa Jehôva bia ve bia mbemba biyong bia ve naa bi buan é ngul da so mebun é bôr bevokh.​—A lang Beromain 1:11, 12.

Ô ne yire Nzame bebéñ, éngeng wa fas é mam wa yeghe é Kalare wèñ été. Fasghe mimboan myèñ, melepgha mèñ, ye mengakh mèñ. Aval nfasane te ye meyaghlan, da ye ve naa a yeme mbeng y’ényeghe ye n’yeman Nzame wia, ô vem.​—A lang Josué 1:8 ; Bya 1:1-3.

Ô se ki yire Nzame bebéñ keghe naa wa tobe nye mebun, nge ki naa wa bunu nye. Ve daa abunu é ne ane élok wa yiane ve medzim naa é vem. Wa ve abunu dwiè medzim naa é vem éyong ô ne mban a fas bidokh bimam bi ye abunu dwiè.​—A lang Matthieu 4:4 ; Behébreu 11:1, 6.

Jehôva aa wokh é bôr ba nyeghe nye ôlun. A ne kame be y’é dzam a sese é ne bo naa be dzimle abunu deba ye ayane éning é ne mbèmbèè deba (Bya 91:1, 2, 7-10). Aa ve naa be bo nkyel ye mbia mefulu me ne ndaman é mvoghe dzeba ye mevakh meba. Aa yeghle bo aval be ne yem ning.​—A lang Bya 73:27, 28 ; Jacques 4:4, 8.