Nzame a nga takh é mvong bôr Émvemvam Abraham naa éé bo ayong daa, ye kee be nkol metsing. A nga luè ayong te naa “Israël” ye bo naa ébo be baghle nya n’yebe ye medzô mèñ (Bya 147:19, 20). Éde, Israël a nga yiane so biboran akal bôr be ya meyong mese.​—A lang Atargha 22:18.

Nzame a nga top Bisraëlite naa be tobe bengaa bèñ. N’lang weba wa lere mbemba be mam bia ñong éyong bia bèè metsing mèñ (Deuteronome 4:6). A kôre ye Bisraëlite, bôr be fe be mbe yeghe a yem nya Nzame.​—A lang Ésaïe 43:10, 12.

Niène éyong é nga lôt, ane Israël a nga dzimele é mvam Nzame. Éde Jehôva a nga sanghle ayong te y’ékôan bechrétien (Matthieu 21:43 ; 23:37, 38). Abong di, be nya bechrétien ébo be sanghle-yang Bisraëlite ane Bengaa bèñ.​—A lang Bisè Mintôl 15:14, 17.

Yésu a nga takh beyeghe bèñ naa be kanghle, ye bo naa baa fe be bo bôr be ye meyong mese me ya si beyeghe (Matthieu 10:7, 11 ; 24:14 ; 28:19, 20). Ésèñ te é ntoo ngul melu ma, éyong amangha émo é ntoo bebéñ. Ave si é tobe, a tare yen ane Jehôva aa kôan bizuk bibôt bi ye meyong mesese akal nya mbunan, ve éyong dzi (Melere 7:9, 10). Be nya bechrétien be ne ntaghan naa ba vehan ayokh ye volan. Si ése ngura, Bengaa Jehôva ba buan ayeghle daa da so a Bible été bisulan bieba.​—A lang Behébreu 10:24, 25.

Mimbu 1870, ôyôm abek beyeghe be ya Bible, be nga tugha bera yem be bebela be ya Bible bôr be nga bem mane vwèn. Éyong be wokh-ang naa Yésu a nga takh ékôan bechrétien naa é kanghle, éde be nga sum ésèñ minkanghle ya Édjiè Nzame sise ngura. Mbu 1931, é wo be nga ñong éyôla Bengaa Jehôva.​—A lang Bisè Mintôl 1:8 ; 2:1, 4 ; 5:42.

Ntet mimbu ôsua, bikôan bechrétien bi mbe mesi mesi bi nga buane melepgha é tsin ékôan é nga yebe naa Yésu é nye a ne Ndjiè ye ékôan (Bisè Mintôl 16:4, 5). Melu maa fe, Bengaa Jehôva ba buan melepgha ma so Tsin Ékôan. Nsama bemvene wa bira yem ésèñ te, éwo wa vole mintem bikôan ba konghlan, ba kulu ye kap mebak mese ba belane me akal a yeghe Bible a lôr minkobe tang 600. Éde ba ve 100 000 bikôan ayokh da so a Bible été ye lere be zen sise ngura. Bikôan bi te, bi bele befam be ne nkoghan akal ésèñ bemvene ng’ane alo’o da ndeng. Ba baghle nkuna mintôma Nzame y’ényeghe.​—A lang 1 Pierre 5:2, 3.

Bengaa Jehôva be ne ntaghan naa ba kanghle mbemba mefuèñ me ya Bible ye bo beyeghe. Aval mintôl mi nga bo, bia ke minkanghle menda-menda (Bisè Mintôl 20:20). Bia sile é bôr ba nyeghe bebela ye n’nem ôse naa be yeghe Bible. Ve bii se ki foghe ve ékôan. Bi ne fe nda bôr é bele Ésaa a ne ényeghe. Bi ne bekal ye bendôm ba woghan ôlun (2 Bethessalonisien 1:3). Akal be ne ntaghan naa ba ve Nzame n’nem mbeng ye vole é bôr bevokh, bewume Jehôva be ne é nda bôr da dang ning mevakh été a si va.​—A lang Bya 33:12 ; Bisè Mintôl 20:35.