Mfe pii nye yi na nkorɔfo akasa etsia Jehovah Adasefo osiandɛ wɔnngye bɔgya ntsi. Siantsir a wɔnngye bɔgya no gyina Bible no mu ahyɛdze a ɔkã dɛ ‘hom nyi homho mfi bɔgya ho’ no do. Ɔtɔfabi a, adatserfo binom nngye dɛm ahyɛdze yi nnto mu, osiandɛ wosusu dɛ wɔpɛ hɔn ayarfo hɔn eyiedzi, na dɛm ahyɛdze yi do dzi runntum mmboa hɔn.​—Ndwuma 15:29.

Naaso, nyimpa binom a hɔn ho awea wɔ eduyɛ mu kɔ do bɔ mfaso a ɔwɔ akwan ahorow a wɔfa do sa yarba a wɔmmfa bɔgya nndzi dwuma wɔ mu no ho dawur.

Amandzɛɛbɔ soronko bi a ɔfa bɔgya ho wɔ Stanford University School of Medicine hɔn nwoma bi a wɔfrɛ no Stanford Medicine Magazine, Spring 2013 dze no mu. Amandzɛɛbɔ no ne fã kitsa asɛm bi a wɔato dzin dɛ “Against the Flow​—What’s Behind the Decline in Blood Transfusions?” Asɛm no ne kyerɛwfo nye Sarah C. P. Williams, dza ɔkãe nye dɛ: “Bɔbor mfrenhyia du a etwa mu no, nhwehwɛmu pii a wɔayɛ da no edzi dɛ bɔgya a wɔdze dzi dwuma wɔ asopitsi ahorow wɔ wiadze yi mu no dɔɔ sõ piinara. Iyi bor dodow a ohia a wobotum dze asa ayarfo yarba ber a wɔreyɛ hɔn oprehyɛn nye ber a wɔda ayarmpa do no.”

Kyerɛwfo no twee adwen sii asɛm a Patricia Ford, M.D., ɔfabafo nye kwankyerɛfo a ɔda The Center for Bloodless Medicine and Surgery ano wɔ Pennsylvania Asopitsi no kãe no do. Dɔkota Ford kãa dɛ: “Wɔakyerɛkyerɛ adɔkotafo dɛ bɔgya nye adzetsitsir a ɔgye nyimpa nkwa, ntsi sɛ nyimpa nnyi bɔgya dodow bi wɔ no mu a ɔbɔhwer no nkwa . . . Ɔtse dɛm wɔ tsebea ahorow pɔtsee bi mu dze, a naaso wɔ tsebea ahorow pii mu no, iyi nntse dɛm koraa wɔ ayarfo dodow no ara hɔn afamu.”

Dɔkota Ford a ɔhwɛ Jehovah Adasefo bɛyɛ 700 afe biara no sanee kãa dɛ: “Eduyɛfo pii a menye hɔn edzi nkɔmbɔ no gye dzi dɛ sɛ wɔanngye bɔgya a, ayarfo piinara bɔhwer hɔn nkwa. Bi a nkyɛ mubotum enya nsusui a ɔtse dɛm. Naaso, dza mokɔr do sũaa ntsɛntsɛm nye dɛ sɛ edze ndzɛmba ahorow bi gugu akwan mu a, ibotum asa dɛm ayarfo yi yarba a eremmfa bɔgya nndzi dwuma wɔ mu.”

August 2012 mu no, Archives of Internal Medicine nwoma no tsintsiim nhwehwɛmu bi a wɔdze mfrenhyia 28 yɛe a ɔfa ayarfo a wɔyɛɛ hɔn akoma oprehyɛn wɔ asopitsi bi mu no ho. Jehovah Adasefo a wɔwɔ mu no, hɔn ho tɔɔ hɔn ntsɛntsɛm kyɛɛn ayarfo a wɔgyee bɔgya no. Ber a wɔyɛɛ ntotoho no, ɔbɛdaa edzi dɛ adasefo no ennhyia nsɛndzendzen ahen biara wɔ asopitsi hɔ, wɔtsee apɔw ntsɛm, na wɔtsenaa ase bɔbor mfrenhyia 20 kyɛɛn ayarfo a wɔmaa hɔn bɔgya no.

Asɛm bi a wotsintsimii wɔ The Wall Street Journal mu wɔ April 8, 2013 mu no kã dɛ: “Mfe pii nye yi na wɔayɛ ayarfo bi a hɔn gyedzi ntsi wɔnngye bɔgya oprehyɛn a wɔamma hɔn bɔgya. Ndɛ, asopitsi pii resa nkorɔfo yarba wɔ dɛm kwan yi do . . . Adɔkotafo a wɔbɔ oprehyɛn a wɔmmfa bɔgya nndzi dwuma wɔ mu ho dawur no kã dɛ, sɛ wɔdze kaw a no do tsew a wɔbɔ wɔ bɔgya a wɔtɔ, wɔkora do, wɔhohor mu, wɔhwehwɛ mu, na wɔdze ma ayarfo no ho to nkyɛn a, oprehyɛn a ɔtse dɛm so ma esian a ɔwɔ bɔgya a wɔdze ma mu nye ɔhaw ahorow a ɔma ayarfo dzi nda dodow bi wɔ asopitsi hɔ no do tsew.”

Ɔnnyɛ nwanwa dɛ Robert Lorenz a ɔhwɛ bɔgya ho nsɛm do wɔ Cleveland Asopitsi no kã dɛ: “Sɛ ema ɔyarfo bi bɔgya a, inya atsenka bi dɛ eresa no yar . . . Naaso, obowie ekyir no nna ku na iruku no.”