Ndaansa yi, mbabun a woku hɔnho no dodow akɔ sor paa wɔ aman ahorow bi do. Ebɛnadze ntsi a? Ehwɛ a, wo ba botum enya adwen a ɔtse dɛm anaa?

Dza yɛrebɛka ho asɛm

•  Ebɛnadze ntsi na ɔsɛ dɛ awofo ma mbabun a woku hɔnho no ho asɛm hia hɔn?

•  Ibesi dɛn ehu dɛ wo ba enya adwen a ɔtse dɛm?

•  Ebɛnadze na ibotum ayɛ dze aboa wo ba a woeenya adwen a ɔtse dɛm no?

 Ofi 2009 kesi 2019 no, mbabun a wɔwɔ ntoado skuul wɔ United States no mu ɔha mu nkyekyɛmu eduanan na nna adwendwen ahyɛ hɔn do. Na wɔ dɛm mfe no ara mu no, mbabun a wokum hɔnho no dodow kɔr sor paa  a

 “Ndɛ, ɔsor ɔhaw a ɔbabun biara hyia . . . Na mbrɛ osi ma dɛm haw ahorow no ripira hɔn no yɛ awerɛhow dɛ.”​—Vivek H. Murthy, U.S. Surgeon General.

 Bible mu afotusɛm: ‘Sunsum a wɔabotow dze, ɔma ahoɔdzen do tsew.’​—Mbɛbusɛm 17:22.

 Ma yensusu dza odzidzi do yi ho nhwɛ.

•   Tsebea ahorow. Obi nye wo ba esi mu, ɔadaadaa no anaa no dɔfo bi ewu anaa? Sɛ dɛm a, nngye nndzi dɛ bi a wo babaa no refa yaw bi mu b naaso w’adwen mmbaa do?

•   Ndzeyɛɛ. Ehwɛ a, wo babaa no atwe no ho efi n’anyɛnkofo anaa n’ebusuafo ho anaa oegyaa ndzɛmba bi a n’enyi gye ho no yɛ? Ndzɛmba ahorow bi a nna nkyɛ ɔsom bo paa ma no no, seseiara ɔdze ne nyinara akyekyɛ anaa?

•   Nsɛm ahorow a ɔka. Ɔyɛ a wo babaa no ka owu ho asɛm anaa ɔka nsɛm bi tse dɛ, “meewu mpo a nkyɛ oye” anaa? Ɔyɛ a ɔka dɛ ɔmmpɛ dɛ ɔyɛ adzesoa ma wo anaa?

   Ɔwɔ mu dɛ, nsɛm a ɔtse dɛm no botum ayɛ ‘nsɛm a ɔyɛ hatuhatu.’ (Job 6:3) Naaso bi a ne nsɛm ahorow a ɔka no mu bi botum akyerɛ dɛ ohia mboa. Dɛm ntsi sɛ wo ba ka biribi dɛ ɔpɛ dɛ owu a, fa no enyibersɛm.

 Sɛ wo babaa no ka dɛ ɔyɛ a ɔtse nka dɛ onku no ho a, ibotum ebisa no dɛ, “Adwen ber na kwan a ebɛfa do ayɛ dɛm no ho anaa?” Mbuae a ɔdze bɛma wo no na ɔbɛkyerɛ enyibersɛm a ɔwɔ dza ɔreka no mu.

 “Dɛ awofo no, ɔyɛ a yɛmmpɛ dɛ yebisa hɛn mba nsɛm osiandɛ yesuro dɛ mbuae a wɔdze bɛma hɛn no rennyɛ hɛn dɛw. Naaso, sɛ wɔreka mbrɛ wosi tse nka no ho asɛm akyerɛ hɛn a, ɔnodze ɔbɛyɛ papa dɛ yɛbɛma hɔn kwan ma wɔakasa.”​—Sandra.

 Bible mu afotusɛm: “Nyimpa akoma mu apam tse dɛ esubun; Na nyia ɔwɔ ntseasee no na ɔbɔtow.”​—Mbɛbusɛm 20:5.

•   Nya abotar tsie wo ba no. Odzi kan no, kamfo no dɛ oetum aka mbrɛ osi tse nka no ho asɛm akyerɛ wo. Afei ibotum aka dɛ: “Mepɛ dɛ muhu dza ɔrokɔ do wɔ w’asetsena mu. Ntsi ka biribi kyerɛ me, ndaansa yi ndzɛmba rokɔ dɛn?” anaa ibotum ebisa no dɛ: “Ibotum aka mbrɛ isi tse nka no ho asɛm akyerɛ me anaa?”

   Mbuae biara a wo ba no dze bɛma wo no, nya abotar tsie no. Mma mmbɔ n’asɛm no nngu ntsɛmara anaa mma mmper woho nnka dza “ɔbɔboa no.”

   Bible mu afotusɛm: “Nyimpa biara nyɛ ntsɛm ntsie, nyɛ nyaa nkasa, nyɛ nyaa mfa ebufuw”​—James 1:19.

•   Yɛ nhyehyɛɛ a ɔbɔbɔ wo ba no ho ban. Boa wo ba no ma onhu dza odzidzi do yi na ɔnkyerɛw nto hɔ:

   Dza ɔbɔbɔ wo ba no kɔkɔ. Ebɛn tsebea na ohyia anaa ebɛn ndzɛmba na ɔdwendwen ho a ɔma ɔtse nka dɛ onku noho?

   Ndzɛmba a obotum aboa wo ba no. Boa wo babaa no ma ɔnyɛ ndzɛmba a ɔbɔboa no ma oeyi n’adwen efi ne haw no do anaa dza ɔbɔboa no ma oeyi adwen a ɔnye dɛ onku noho no efi ne tsirmu.

   Nyimpa a wobotum aboa wo ba no. Boa wo babaa no ma onhu nkorɔfo a wobotum aboa no aber a ɔwɔ ɔhaw bi mu no. Hɔn mu bi botum ayɛ ɔwoara ɔwofo no, panyin bi a ɔgye no dzi, obi a ɔhwɛ adwen mu anaa edwumakuw bi a wɔboa nkorɔfo a wonya adwen dɛ wonku hɔnho no.

   Bible mu afotusɛm: ‘Mbɔdzembɔfo nhyehyɛɛ bowie yie.’​—Mbɛbusɛm 21:5.

•   Ma w’enyi nda hɔ. Sɛ ihu dɛ wo ba no ne haw no akɔ famu mpo a, kɔ do ara fa w’enyi dzi n’ekyir.

   “Aber a me ba banyin no kaa kyerɛ me dɛ ɔnntse nka bio dɛ onku noho no, nna modwen dɛ noara nye no. Naaso saana meredaadaa moho. Sɛ obi wɔ ɔhaw a ɔtse dɛm a, biribi botum esi mpofirmu ma ɔasan enya adwen dɛ onku noho bio.”​—Daniel.

   Boa wo ba no ma onhu nokwasɛm a ɔfa mbrɛ osi tse nka no ho dɛ: Dɛm atsenka no botum atsew akɔ. Nwoma bi a wɔfrɛ no The Whole-Brain Child kaa dɛ: “Atsenka tse dɛ wimu tsebea.” Na ɔdze kaa ho dɛ: “Sɛ nsu rotɔ a, nyansa nnyim dɛ yɛbɔkɔ ekegyina mu na yaaka dɛ ɔronntɔ. Dɛmara so na nyansa nnyim dɛ yebenya adwen dɛ ewia rommbɔ da.”

•   Ma onhu dɛ no ho hia wo: Ka kyerɛ wo ba no dɛ edɔ no, na ma onhu dɛ obotum dze noho ato wo do. Ibotum so aka dɛ, “Mebɛyɛ dza mubotum biara aboa wo ma egyina ɔhaw a erefa mu no ano.”

   Bible mu afotusɛm: “Ɔnyɛnko dɔ aber nyinara, naaso onua dze, wɔwo no ma abɛbrɛsɛber.”​—Mbɛbusɛm 17:17.