Awar mu dze, sɛ awarfo no nngye hɔnho nndzi anaa sɛ hɔn mu biara susu dɛ ne nyɛnko reyɛ biribi wɔ nsumaa mu a, ɔbɛyɛ dzen dɛ awar no begyina. Sɛ ɔba no dɛm a, okun anaa ɔyer bɛyɛ n’adze dɛn amma ɔanntwe kora?

Dza yerubosusu ho

•  Sɛ wɔka dɛ obi rotwe kora a, ɔkyerɛ dɛn?

•  Ebɛn ndzɛmba na obotum ama okun anaa ɔyer bi atwe kora?

•  Sɛ erotwe kora a, ebɛnadze na obotum aboa wo?

•  Aber a ihu dɛ wo hokafo rotwe kora no

•  Nsɛm bi a awarfo botum esusu ho

 Sɛ wɔka dɛ obi rotwe kora a, ɔkyerɛ dɛn?

 Ɔsor tsebea biara nye mbrɛ wɔdze kasafua “akoratwe” dzi dwuma wɔ mu. Sɛ yɛhwɛ dza yerubosusu ho yi mu a, sɛ yɛka dɛ obi rotwe kora a, ɔkyerɛ mbrɛ okun anaa ɔyer bi si tse nka aber a osusu anaa ɔgye dzi paa dɛ obi rekyerɛ no hokafo ho enyigye anaa no hokafo rekyerɛ obi fofor ho enyigye. Sɛ biribi a ɔtse dɛm si wɔ hɛn awar mu a, bi a yebosuro na yɛbɛtse nka dɛ beebi a hɛn awar no rotow kɔ no reyɛ ayɛ hu. Sɛ osian asɛm bi a ɔtse dɛm ntsi yɛtwe kora a, ɔfata na ɔyɛ no kwan do so. Ebɛnadze ntsi a? Osiandɛ, adze yi ara, ɔwɔ dɛ awar ka nyimpa beenu bɔ mu. Na onnyi dɛ awarfo ma mframa mpo fa hɔn ntamu, ne dɛm ntsi ɔsɛ dɛ wɔyɛ dza wobotum biara dɛ wɔremma biribiara ntsetsew hɔn ntamu.

 Bible mu afotusɛm: “Wɔnnda ho nnyɛ beenu bio, na wɔyɛ honankor. Ntsi dza Nyankopɔn dze abɔ mu no, mma nyimpa nntsew mu.”​—Matthew 19:6.

 “Sɛ wo tsirmu nntsen wo wɔ biribi a ɔrokɔ do wɔ w’awar mu ho, na sɛ ehyɛ ase dɛ erotwe kora a, obotum aboa wo ma eehu esian no na ɔbɛka wo ma aayɛ ho biribi ntsɛmara.”​—Benjamin.

 Koratwe gyangyan. Naaso ɔtɔ da a, bi a ibohu dɛ okun anaa ɔyer bi a osusu dɛ no hokafo no rekyerɛ obi fofor ho enyigye ma ɔno ntsi ɔrotwe kora no nnyi ngyinado papa biara. Sɛ obi a ɔawar wɔ ɔdɔ mapa ma no hokafo a, ɔremma ɔnntwe kora a ɔtse dɛm. Osiandɛ mfaso biara nnyi adzeyɛ a ɔtse dɛm do, mbom pira ara na ɔbɛma woepira hɔnho. (1 Corinthfo 13:4, 7) Dr. Robert L. Leahy kyerɛwee wɔ no nwoma bi mu dɛ: “Sɛ obi rotwe kora [na sɛ onnyi ngyinado papa biara] a, mbrɛ obesi ayɛ n’adze no botum asɛɛ awar anaa anyɛnkofa kor no ara a ɔreyɛ dza obotum biara dɛ ɔbɔbɔ ho ban no.” a

 Ebɛn ndzɛmba na obotum ama okun anaa ɔyer bi atwe kora?

 Obotum aba dɛ, mber bi a etwa mu no wo kun anaa wo yer dadaw bi nye wo enndzi no yie anaa oenndzi wo nokwar ma ɔno ntsi isuro dɛ bi a wo hokafo a enye no tse sesei no so bɛyɛ wo dɛmara. Anaadɛ, bi a wo papa faa wo maame n’ekyir anaa wo maame faa wo papa n’ekyir ma hɔn awar sɛɛe, ntsi isuro dɛ dza osii hɔn awar no mu no botum esi wɔ woara so w’awar mu.

 “Aber a musuar no, me papa faa me maame n’ekyir, ntsi ɔda ho ara yɛ dzen ma me dɛ mebɛgye nkorɔfo edzi; iyi haw me paa. Dɛm asɛm yi bubuu me paa, ma ndɛ na ndɛ nyina, ɔwɔ mu ara a nna woeyi ne tsir wɔ m’awar mu, na iyi ma ɔyɛ dzen ma me dɛ mebɛgye mo kun edzi.”​—Melissa.

 Adze fofor so a obotum ama okun anaa ɔyer bi atwe kora nye dɛ: Sɛ etaa tse nka dɛ bi a wo kun anaa wo yer n’enyi nngye woho bio a, ɔrennyɛ dzen dɛ ibenya adwen dɛ hɔn a wɔbɛn wo kun anaa wo yer pɛ dɛ wɔgye wo hokafo no fi wo nsamu ma w’awar no gu. Ibotum ahyɛ ase enya adwen bi mpo dɛ, wo kun anaa wo yer botum egyina asɛm bi a ɔnnyɛ asɛm biara do egyaa wo na ɔaakɔwar obi fofor.

 “Nna mo kun ne nyɛnko bi pɛ dɛ mo kun kɛyɛ ne bestman wɔ n’ayeforhyia ase, na nna ɔbɛkyerɛ dɛ ɔnye ayefor no n’abaawa anaa bridesmaid bɔbɔ anan anantsew anaa ɔnye asaw mpo. Nna me tsirmu nntsen me wɔ ho koraa. Ntsi mamma mo kun annyɛ.”​—Naomi.

 Beebiara a ebɔkɔ no, ɔsor mbrɛ wosi hyia ayefor, ntsi ɔsɛ dɛ Christianfo dze Bible mu afotusɛm yɛ edwuma aber a wɔreyɛ ayefor no. Ntsi sɛ yɛhwɛ mbrɛ Naomi sii yɛɛ n’adze wɔ asɛm yi ho a, aso nna ɔrema n’asɛm ayɛ dzen anaa? Sɛ ɔdwendwen dza osii no ho a, ohu dɛ dɛm kora a ɔtwee no, nna onnyi ngyinado papa biara. Ɔkaa dɛ: “Dɛm aber no, nna metse nka dɛ mo kun enyi nngye moho bio. Nna ɔyɛ me dɛ mo kun dze me toto mbaa afofor ho, naaso iyi nyinara nna saana ɔyɛ mara m’adwen na ɔyɛ me dɛm. Nna asɛm yi nnyɛ nokwar.”

 Dɛ ɔyɛ obi ne ndzeyɛɛ bi na ɔama enya adwen dɛ wo hokafo refa w’ekyir, anaa woara w’adwen na ɔyɛ wo dɛm no, koratwe a ɔtse dɛm no nnyi ngyinado biara. Obotum ama enya adwen dɛ bi a wo hokafo no refa w’ekyir ampaara ampaara, anaa mpo dɛ ebɔbɔ no sombo dɛ ɔreyɛ biribi a ɔtse dɛm. Adwen a ɔtse dɛm a ibenya no botum asɛɛ w’awar, na obotum mpo abɔ wo yarba so.

 Bible mu afotusɛm: “Ahoɔyaw tse dɛ kokoram.”​—Mbɛbusɛm 14:30, Easy-to-Read Version.

 Sɛ erotwe kora a, ebɛnadze na obotum aboa wo?

 Gye wo hokafo no dzi. Mma mmfa w’adwen nnsi ndzɛmba bi a wo hokafo yɛ a ɔma inya adwen dɛ onndzi wo nokwar no do, mbom fa w’adwen si ndzɛmba a ɔyɛ a ɔma egye no dzi no do.

 “Medze m’adwen si mo kun no suban pa ahorow no do. Sɛ muhu dɛ ɔpɛ obi n’asɛm na onya ber ma no a, ɔma muhu no dɛ ɔdwen nyimpa ho, na ɔnnyɛ dɛ adwen bɔn bi ntsi na ɔreyɛ dɛm. Mema ɔtsena m’adwen mu dɛ, ɔsor m’awofo hɔn awar na ɔsor emi so medze, ntsi sɛ hɔndze no sɛɛe a, ɔno nnkyerɛ dɛ medze no so bɛyɛ dɛmara.”​—Melissa.

 Mma ɔnnyɛ wo dɛ dza edze w’adwen rubu anaa irususu no yɛ nokwar. Dr. Leahy sanee kyerɛwee wɔ no nwoma no mu dɛ: “Mpɛn pii no ɔyɛ hɛn dɛ adwen a ɔwɔ hɛn tsirmu no na ɔyɛ nokwar. Osiandɛ yɛgye dzi dɛ biribi yɛ nokwar ara ntsi ɔyɛ hɛn dɛ gyama yɛwɔ ngyinado bi araa ma. Naaso, ɔsɛ dɛ yehu dɛ sɛ yesusu dɛ biribi yɛ nokwar mpo a, ɔno mma ɔnnyɛ nokwar, na dza yɛgye gyina mu dzendzenndzen dɛ ɔno nye hɛn ngyinado no, ebɔhwɛ mu no nna ɔyɛ mbrɛ yesi tse nka ara kɛkɛ.” b

 “Sɛ yehu biribi na yɛdze hɛn adwen bu dɛ bi a hɛn hokafo no reyɛ biribi bɔn bi a, ɔno mpo na obotum akɛfa ɔhaw aba hɛn awar mu no.”​—Nadine.

 Enye wo kun anaa wo yer mbɔ dza ɔhaw wo no ho nkɔmbɔ. Ɔmmfa ho dza wɔama erotwe kora no, ka dza ɔhaw wo no kyerɛ wo hokafo na hom nsusu ho. Sɛ hom yɛ dɛm a, hom bohu mbrɛ hom mu biara bɛyɛ n’adze aber a ɔnye obi fofor robɔ no, amma hom mu biara anntwe kora.

 “Sɛ enye wo hokafo no rususu nsɛm a ɔtsetse dɛm ho a, nya adwen dɛ ɔnnyɛ dɛ wo hokafo no pɛ dɛ ɔyɛ biribi ma ɔyɛ wo yaw na mbom no ɔno so pɛ dɛ ohu dza obotum ayɛ dze abɔ hɔn awar no ho ban. Mma mmfa nnhyɛ w’adwen mu dɛ wo hokafo no reyɛ biribi bɔn wɔ nsumaa mu. Obotum aba dɛ warankasa na edze w’adwen rububu nsɛm bi dze ahaw wo ho ma ɔno ntsi w’enyi nnsɔ dza wo hokafo no yɛ ma wo no. Anaadɛ wo hokafo no n’adwen mmbaa do mpo dɛ onnya adagyer mma wo ndaansa yi.”​—Ciara.

 Bible mu afotusɛm: “Mma obiara nnhwehwɛ nankasa nedze, na mbom ɔnhwehwɛ ne nyɛnko dze [so bi].”​—1 Corinthfo 10:2.