Sɛ wo mba regye hɔn ahom, na video anaa buukuu bi da hɔ a, ehwɛ a no mu hendze na wɔbɛfa? Ehwɛ a, fon a wɔdze kɔ intanɛt do anaa buukuu da hɔ a, wɔbɛfa hendze?

 Mfe pii nye yi na osian TV nye video ahorow a nkorɔfo tum hwɛ no wɔ intanɛt do ntsi, wɔayɛ dzen ama nyimpa pii dɛ wɔbɛkenkan adze. Afe 1990 mu no, Jane Healy kyerɛɛw no wɔ no buukuu bi a wɔfrɛ no Endangered Minds mu dɛ “Ber rokɔ do no anhwɛ a, nkorɔfo begyaa akenkan.

 Aber a ɔkaa dɛm asɛm no, bi a nna nyimpa pii hɔn adwen yɛ hɔn dɛ orunntum mmba no dɛm da. Naaso bɛyɛ mfe 30 a abɛsen kɔ yi, akyerɛkyerɛfo binom a wɔwɔ aman ahorow a nkorɔfo taa dze abaɛfor mfir dzi dwuma no, ebohu dɛ ndaansa yi, mbabun piinara na wonntum nnkenkan adze yie tse dɛ mbrɛ nna ɔtse nkan no.

Dza yɛrebɛka ho asɛm

•  Ebɛnadze ntsi na ohia dɛ mbofra kenkan adze?

•  Dza awofo botum ayɛ dze aboa hɔn mba ma hɔn enyi agye akenkan ho

•  Dza awofo ka

•   Sɛ ekenkan adze a, itum twa ndzɛmba ho mfonyin wɔ w’adwen mu. Fa no dɛ erekenkan anansesɛm bi, ibotum ebisa woho dɛ nyimpa a merekenkan hɔnho adze no ebɛn kwan do na wɔfa do kasa? Mohwɛ a, wɔtse dɛn? Ebɛn ndzɛmba na woetwa hɔ ehyia? Nnyɛ biribiara na ɔkyerɛwfo no bɛka ho asɛm ntsi ɔsɛ dɛ ɔkenkamfo no ara twa adze no ho mfonyin na ama akenkan no ayɛ dɛw.

   Maame bi a wɔfrɛ no Laura kaa dɛ: “Video ahorow a yɛhwɛ no, ɔyɛ biribi a obi etwa ho mfonyin wɔ n’adwen mu no na wɔayɛ no video ma yɛhwɛ”. Ɔtoaa do dɛ: “Video bi botum ayɛ fɛw paa dze, naaso akenkan dze ɔyɛ soronko koraa, w’ankasa tum twa nsɛm a obi aka ho mfonyin wɔ w’adwen mu ma ɔyɛ tse dɛ mbrɛ erohwɛ sene.”

•   Akenkan ma mbofra nya suban pa. Sɛ mbofra kenkan adze a, ɔboa hɔn ma wosusu ndzɛmba ho yie na sɛ wohyia ɔhaw bi so a wotum dzi ho dwuma. Afei so, sɛ mbofra rekenkan adze a, ɔnnsɛ dɛ wɔma ndzɛmba twetwe hɔn adwen, sɛ wɔyɛ dɛm a ɔbɔboa hɔn ma woeenya su bi tse dɛ abotar, ahohyɛdo nye ehumbɔbɔr.

   Ehumbɔbɔr? Nyew! Nyimpa bi a wɔyɛ nhwehwɛmu gye dzi dɛ sɛ mbofra to hɔn bo adze kenkan adze a, ɔboa hɔn ma wohu hɔn a wɔrekenkan hɔn ho adze no yie. Na ɔno tum ma mbofra da ehumbɔbɔr edzi kyerɛ afofor wɔ hɔn asetsena mu.

•   Akenkan boa ma yetum dwen ndzɛmba ho kɔ ekyir. Hɔn a wonya abotar kenkan adze no, ɔyɛ a wɔmmfa hɔn akenkan nntu mbirika, na sɛ ɔtɔfabi a wɔsan si do bio mbrɛ ɔbɛyɛ a wɔbɛtse dza wɔrekenkan no ase. Sɛ wɔyɛ dɛm a, ɔnnyɛ dzen dɛ wɔbɛkae dza wɔakenkan no, na wonya do mfaso so.​—1 Timothy 4:15.

   Egya bi a wɔfrɛ no Joseph ebohu dɛ: “Sɛ isie abotar kenkan adze a otum boa wo ma edwendwen dza erekenkan no ho, edze toto dza inyim dadaw no ho, na itum hu mfaso a ɔwɔ dza ekenkanee no do. Mbrɛ akenkan boa ma yetum dwen ndzɛmba ho no nnyɛ dɛm na video tse.”

 Asɛm no korakora nye dɛ: Ɔnnyɛ bɔn dɛ mbofra bɔhwɛ video,naaso sɛ wo mba mmpɛ akenkan a obotum ama wɔahwer ndzɛmba pii.

•   Hyɛ ase ntsɛm. Maame bi a wɔfrɛ no Chloe wɔ mbabanyin beenu. Ɔkaa dɛ, “Aber a hɛn mbofra hyɛ yafun mu no na yɛhyɛɛ ase dɛ yɛrekenkan adze kyerɛ hɔn, na mowoo hɔn no so nna yɛda ho ara kenkan adze kyerɛ hɔn. Ɔyɛ hɛn dɛw paa dɛ yɛyɛɛ dɛm. Ekyir yi, hɔn enyi bɛgyee akenkan ho paa, ma dɛm ntsi sɛ wɔregye hɔn ahom mpo a nna wɔpɛ biribi kenkan.”

   Bible mu afotusɛm: “Ofitsi wo mbofrabermu inyim kyerɛw krɔnkrɔn no.”​—2 Timothy 3:15.

•   Ma ɔnyɛ mberɛw dɛ wo mba botum akenkan adze wɔ fie. Ɔsɛ dɛ hom nya nwoma ahorow wɔ fie mbrɛ ɔbɛyɛ a hom mbofra no enyi bɛgye akenkan ho. Baatan bi a wɔfrɛ no Tamara wɔ mbabanyin baanan. Ɔkaa dɛ: “Hwehwɛ nwoma a wo ba no enyi bɛgye ho na fa gu ne mpa ne nkyɛn”.

   Bible mu afotusɛm: “Tsetse abofra wɔ ɔkwan a ɔwɔ dɛ ɔfa do no do, Na sɛ onyin mpo a, ɔnnkɛdan efi ho.”​—Mbɛbusɛm 22:6.

•   Tsew mber dodow a wɔdze intanɛt dzi dwuma no do. Egya bi a wɔfrɛ no Daniel kaa dɛ, ɔbɛyɛ papa dɛ ebusua no beyi ewimbir kor bi esi hɔ a wɔronnhwɛ TV, na obiara bodum no fon anaa biribiara a wɔdze kɔ intanɛt do no. Ɔdze kaa ho dɛ: “Sɛ ewimbir kor bi mpo na yebenya wɔ dapɛn no mu na sɛ dɛm ber no so a, yedum hɛn TV no na obiara pɛ biribi kenkan. Ɔtɔ da a yɛbɔ mu kenkan anaa obiara kenkan ne dze”.

   Bible mu afotusɛm: ‘Ama hom eetum ehu ndzɛmba ahorow a ohia nyina.’​—Philippifo 1:10.

•   Yɛ nhwɛdo pa. Baatan bi a wɔfrɛ no Karina wɔ mbabaa beenu. Ɔkaa dɛ: “Sɛ ɔyɛ na erekenkan adze akyerɛ wo mba a, ɔyɛ a kenkan no wɔ kwan bi do a wo mba no bohu dɛ w’enyi gye dza erekenkan no ho. Sɛ eyɛ obi a w’enyi gye akenkan ho a, ɔrennyɛ dzen dɛ wo mbofra bosuasua wo.”

   Bible mu afotusɛm: ‘Ma w’enyi nku akenkan ho.’​—1 Timothy 4:13.

 Nnyɛ mbofra nyina na hɔn enyi bɛgye akenkan ho. Naaso sɛ ehyɛ hɔn nkuran a, bi a ɔno bekenyan hɔn ma hɔn enyi agye akenkan ho. David yɛ egya bi a ɔwɔ mbabaa beenu, na ɔno mpo dze, nnyɛ dɛ ɔhyɛɛ ne mbabaa no nkuran kɛkɛ o, mbom ɔyɛɛ biribi a ɔkyɛn dɛm koraa. Ɔkaa dɛ: “Dza me mbabaa kenkan no, ɔnoara bi na mara so mekenkan. Dɛm a meyɛe no boaa me ma muhun ndzɛmba a me mba no enyi gye ho, na iyi maa yenyaa biribi a nna yɛbɔbɔ ho nkɔmbɔ aber nyina. Yɛtseew akenkan kuw bi a nna ɔboa hɛn ma yɛbɔ mu kenkan adze. Mese, nna ɔyɛ enyigye mpo kɛkɛ.”