Nyimpa piinara dzi Halloween afahyɛ no wɔ October 31, naaso dɛm afahyɛ yi ho asɛm nnyi Bible no mu. Beebi a Halloween fi bae, nye amandze ahorow a wɔyɛ aber a woridzi dɛm afahyɛ yi nye dza Bible no ka no nnhyia.

Dza yɛrebɛka ho asɛm

•  Beebi a Halloween fi bae nye n’amandze ahorow

•  Ehwɛ a ɔsɛ dɛ beebi a Halloween fi bae no ho hia hɛn anaa?

•  Ebɛnadze ntsi na wɔfrɛ no Halloween?

•   Samhain: The World Book Encyclopedia ka dɛ Halloween fi “tsetse abosonsɔr afahyɛ bi a wɔfrɛ no Samhain a nna Celticfo dzi bɔbor mfe 2,000 a abɛsen kɔ no mu. Nna Celticfo no gye dzi dɛ sɛ odu dɛm aber yi a, ewufo no bɔforafora nyimpa mu, na sɛ woridzi afahyɛ yi a, atseasefo botum akɛsera ewufo.”​—Hwɛ asɛm a wɔato dzin “ Ebɛnadze ntsi na wɔfrɛ no Halloween?”

•   Halloween ntar, tɔfe nye hɔn ndzeyɛɛ ahorow bi: Nhwehwɛmu bi kyerɛ dɛ nna Celticfo binom hyɛ kaakaabotobi anaa ntar a ɔyɛ hu mbrɛ ɔbɛyɛ a sɛ esunsum fi no hu hɔn a, “wobosusu dɛ hɔn so wɔka hɔn ho” amma wɔannhaw hɔn. Binom so ma esunsum no adɔkɔdɔkɔdze dze pata hɔn amma wɔannhaw hɔn. a

   Ofitsi bɛyɛ afe 500 kesi 1500 H.B. hɔ no, Catholic asɔfo a nna wɔwɔ Europe hyɛɛ ase yɛɛ amandze a nna abosonsɔrfo a wɔwɔ hɔ no yɛ no bi. Wɔmaa hɔn asɔrmba no hyehyɛɛ ntar ahorow bi, na wɔkɔr nkorɔfo efie mu kɛgyegyee akyɛdze ahorow mbrɛ ɔbɛyɛ a wɔbɔbɔ mpaa ama hɔn a woewuwu no.

•   Nyɛn na nsamamfo: Iyinom nye esunsum fi nyaa ebusuabɔ akyɛr paa. Buukuu bi a wɔato dzin Halloween Trivia kaa hɔn ho asɛm dɛ wɔyɛ “mbɔnsam a hɔn ho yɛ hu, na wɔnye owu na ewufo enya nkitahodzi bi a wɔama afofor enya owu ho suro.”

•   Nkandzea ahorow bi a wɔsosɔ aber a woridzi Halloween no: Odur mber bi wɔ Britain no, nna nkorɔfo “kɔ efiefi mu kɛgyegye edziban mbrɛ ɔbɛyɛ a wɔbɔbɔ mpaa ama hɔn ewufo no.” Sɛ wɔrekɛgegye edziban no a, ibohu dɛ wɔasɔ kyɛndar esi lantern bi mu, dze akyerɛ dɛ owufo no ne kra aka mfimfim bea.” (Halloween​—From Pagan Ritual to Party Night) Abakɔsɛm binom kyerɛ dɛ nna wɔsɔ kyɛndar si lantern no mu mbrɛ ɔbɛyɛ a ɔbɛpam esunsum fi. Wɔ 1800 mfe no mu no, North Americafo dze eduaba bi a wɔfrɛ no pumpkin a wɔdze bɛyɛ kandzea no sii lantern a nna wɔdze dzi dwuma no ananmu osiandɛ nna ɔnnyɛ dzen dɛ wobenya bi. Afei so nna ɔnnyɛ dzen dɛ wɔdze bɛyɛ kandzea.

 Nyew. Binom wɔ adwen bi dɛ, Halloween yɛ biribi a wɔyɛ dze gyegye hɔn enyi ara kɛkɛ a asɛm biara nnyi ho. Naaso ndzeyɛɛ ahorow a ɔkɔ do aber a woridzi Halloween afahyɛ no nye Bible mu nsɛm nnhyia. Halloween afahyɛ no gyina ator nkyerɛkyerɛ a ɔfa ewufo nye esunsum fi ho no do.

 Hwɛ mbrɛ Kyerɛwnsɛm ahorow a odzidzi do yi ma yehu Nyankopɔn n’adwen wɔ gyedzi a nkorɔfo wɔ wɔ Halloween ho no ho:

•   ‘Mma wonnhu wo mu obi a ɔnye . . . ewufo anaa esunsum dzi nkitaho, anaa ɔyɛ ɔsamanfrɛnyi.’​—Deuteronomy 18:10-12.

   Dza ɔkyerɛ: Nyankopɔn kyir dɛ obi nye ewufo bedzi nkitaho anaadɛ ɔbɛyɛ biribi dze akyerɛ dɛ ɔpɛ dɛ ɔnye ewufo kasa.

•   “Ewufo dze, wonnyim biribiara.”​—Ɔsɛnkafo 9:5.

   Dza ɔkyerɛ: Ewufo runntum nnye atseasefo nnkasa, osiandɛ wonnyim biribiara.

•   “[Mma hom nnye] mbɔnsam nndzi nkitaho. Hom runntum nnom Ewuradze kuraba mu nye mbɔnsam kuraba mu.”​—1 Corinthfo 10:20, 21, New International Version.

   Dza ɔkyerɛ: Ɔnnsɛ dɛ hɔn a wɔpɛ Nyankopɔn ne nhyira no nye mbɔnsam dzi nkitaho.

•   ‘Hom ngyina Abɔnsam ndaadaa no enyim. Osiandɛ yɛnye emumuyɛ esunsum a wɔwɔ sor enya ntokwadzi.’​—Ephesusfo 6:11, 12.

   Dza ɔkyerɛ: Ɔsɛ dɛ Christianfo ko tsia esunsum fi, na ɔnnsɛ dɛ wɔyɛ biribiara dɛ wɔdze rekaa hɔn.