Mbuae a Bible no dze ma

 Nna Daniel yɛ Jewnyi nkɔnhyɛnyi soronko bi a ɔtsenaa ase bɛyɛ mfe 600 ekyir ansaana wɔrowo Jesus Christ. Nyankopɔn boaa no ma otumii kyerɛɛ daa ahorow ase, ɔmaa onyaa enyido-adzehu ahorow, na ɔdze no sunsum krɔnkrɔn no boaa no ma ɔkyerɛɛw Bible mu nwoma a ne dzin da do no.​—Daniel 1:17; 2:19.

Ebɛn nsɛm na osii wɔ Daniel n’asetsena mu?

 Daniel nyinii wɔ Judah ahenman no mu. Nna ha na Jerusalem kurow no na Jewfo hɔn asɔrfi no wɔ. Afe 617 A.H.B. no, Babylonhen Nebuchadnezzar bɔtoow hyɛɛ Jerusalem do, na ɔdze “asaase no do etsitsir” kɛyɛɛ nkowaa wɔ Babylon. (2 Ahemfo 24:15; Daniel 1:1) Wɔfaa Daniel so kaa hɔn ho kɔr Babylon. Obotum aba dɛ, dɛm aber no nna onndzii mfe 20 mpo.

 Wɔdze Daniel na mberantsɛ afofor (a Shadrach, Meshach, na Abednego ka ho) no kɔr Babylon ahemfie na wɔkɛmaa hɔn ntsetsee. Wɔyɛɛ dɛm ama woeetum dze hɔn edzi dwuma wɔ Babylon ahenman no mu. Mpanyimfo a wɔwɔ Babylon ahenman no mu no yɛe ara dɛ Daniel na n’anyɛnkofo baasa no bɛyɛ biribi a hɔn Nyankopɔn mmpɛ. Naaso wodzii Jehovah, hɔn Nyankopɔn no nokwar. (Daniel 1:3-8) Wɔmaa hɔn ntsetsee mfe ebiasa, na ɔno ekyir no aber a Ɔhen Nebuchadnezzar hun nyansa na nyimdzee a wɔwɔ no, ɔkaa dɛ: “Woye mpɛn du sen nkongyaayifo na nkaberkyerfo a wɔwɔ n’ahenman mu no nyinara.” Ɔhen no yii Daniel na n’anyɛnkofo no dɛ wɔnsom wɔ ahemfie hɔ.​—Daniel 1:18-20.

 Mfe bi ekyir aber a nna Daniel edzi bɛyɛ mfe 90 no, wɔfrɛɛ no kɔr ahemfie hɔ. Dɛm aber no nna Belshazzar na oridzi hen wɔ Babylon. Ɔkaa kyerɛɛ Daniel dɛ ɔnkyerɛ nkyerɛwee bi a ɔyɛ hu a ogu ban ho no ase. Nyankopɔn boaa Daniel ma otumii kyerɛɛ ase. Ɔkaa dɛ Medo-Persia Ahenman no bɔtow ahyɛ Babylon do. Dɛm da anafua no ara na wɔtowee hyɛɛ Babylon do.​—Daniel 5:1, 13-31.

 Afei, Medo-Persia bedzii Babylon do tum na wɔmaa Daniel tum wɔ Medo-Persia Ahenman no mu. Ekyir yi nna Ɔhen Darius pɛ dɛ dzibew a ɔdze ama Daniel no, ɔdze bi ka no ho. (Daniel 6:1-3) Nna ahenman no mu mpanyimfo binom enyi ber Daniel, ntsi wɔbɔɔ pɔw dɛ woboku no. Wɔdze no kɔtoo ngyatabɔn mu, naaso Jehovah gyee no. (Daniel 6:4-23) Wɔaka kakra ma Daniel ewu no, ɔbɔfo bi yii noho kyerɛɛ Daniel. Ɔbɔfo no kaa kyerɛɛ Daniel mpɛn ebien dɛ “wɔdɔ no kɛse.”​—Daniel 10:11, 19.

 Fa w’enyi hwɛ dza yɛreka ho asɛm yi wɔ Bible drama a wɔato dzin Daniel​—Ɔdaa Gyedzi Edzi No Nkwa Nda Nyina. Video yi wɔ mu afa ahorow ebien.