Aber a Nyankopɔn bɔɔ ɔbarimba na ɔbaa a wodzi kan no, ɔkaa hɔn beenu no bɔɔ mu dɛ awarfo. Nna ɔpɛ dɛ sɛ ɔbarimba na ɔbaa war a, wɔka hɔn ho bɔ mu dzendzenndzen na wɔhyehyɛ hɔn ebusua.​—Genesis 1:27, 28; 2:18.

 Nyankopɔn pɛ dɛ awarfo nya enyigye. (Mbɛbusɛm 5:18) Bible no ma yehu akwankyerɛ na afotusɛm ahorow a ɔbɔboa awarfo ma hɔn awar aasɔ.

Dza yɛbɛka ho asɛm

•  Ebɛnadze na Nyankopɔn ahyehyɛ afa awar ho?

•  Ebɛnadze nye awar mu ntsetsewmu na awargyaa?

•  Ehwɛ a, ɔsɛ dɛ wɔdze awar bi hyɛ mbra ase ansaana Nyankopɔn agye ato mu?

•  Ebɛn asodzi na Nyankopɔn dze ama okun na ɔyer?

•  Ehwɛ a, ndɛ Nyankopɔn pɛ dɛ awarfo wo mba?

•  Bible no besi dɛn aboa me ma m’awar aasɔ?

•  Kyerɛwnsɛm ahorow a ɔka awar ho asɛm

 Ahyɛse pɛɛ a Nyankopɔn hyehyɛɛ awar no, ɔyɛɛ no dɛ banyin kor na basia kor na wɔnka hɔn ho mbɔ mu dɛ awarfo. (Genesis 2:24) Nyankopɔn kyir awardodow. Ɔmmpen do dɛ ɔbarimba nye ɔbarimba anaa ɔbaa nye ɔbaa bɛda, na ɔsan so kyir mpona awar so. (1 Corinthfo 6:9; 1 Thessalonicafo 4:3) Jesus hyɛɛ n’ekyirdzifo dɛ wondzi Nyankopɔn n’ahyɛdze a ɔfa awar ho no do pɛpɛɛpɛ.​—Mark 10:6-8.

 Nyankopɔn n’enyi do no, awar dze, wɔnnkɔ nnsan. Sɛ ɔbarimba na ɔbaa war a, dza ɔkyerɛ nye dɛ wɔahyɛ bɔ dɛ wobedzi hɔn ho nokwar kesi dɛ owu bɛtsetsew hɔn ntamu. Nyankopɔn hwɛ kwan dɛ hɔn mu biara bedzi dɛm bɔhyɛ no do.​—Mark 10:9.

 Ɔtɔfabi a, biribi ntsi okun anaa ɔyer botum egya no hokafo hɔ kakra. Iyi tum si ber a ohia dɛ hɔn mu kor dzi n’ebusua no mu asodzi ahorow bi ho dwuma ntsɛntsɛm no. Naaso Bible no nnhyɛ awarfo nkuran dɛ sɛ ɔhaw bi ba hɔn awar no mu a, wɔbɛtsetsew awar no mu ma awar no aasensɛn hɔ. Mbom ɔhyɛ awarfo nkuran dɛ sɛ worihyia ɔhaw ahorow wɔ hɔn awar mu a, ɔsɛ dɛ wɔbɔ mu siesie hɔn ntamu.​—1 Corinthfo 7:10.

 Ndwamanyɛ nkotsee na obi botum egyina do egyaa no kun anaa ne yer na ɔasan awar fofor. (Matthew 19:9) Dɛm ntsi sɛ ɔnnyɛ ndwamanyɛ ntsi na woesi gyinae dɛ wɔbɛtsetsew hɔn awar no mu anaadɛ wobegyaa awar a, Kyerɛwnsɛm no mmpen do dɛ hɔn mu biara nye nyimpa fofor bɛhyehyɛ awar anaa ɔbɔwar obi fofor.​—Matthew 5:32; 1 Corinthfo 7:11.

 Nyankopɔn pɛ dɛ Christianfo dzi aban ne mbra a ɔfa awar ho no do. (Titus 3:1) Nyankopɔn pɛ dɛ awar yɛ nkabɔmu a ɔtsena hɔ daa, ntsi sɛ awarfo bi dze hɔn awar no hyɛ mbra ase a, ɔkyerɛ dɛ wobu aban no, na Nyankopɔn ne nhyehyɛɛ a ɔfa awar ho no so, wɔgye to mu. a

•   Dza ɔsɛ dɛ awarfo yɛ. Ɔsɛ dɛ kun na yer nyina dodɔ hɔn ho na wobu hɔn ho so. (Ephesusfo 5:33) Ɔnnsɛ dɛ wɔdze nda mu nkitahodzi kam hɔn ho hɔn ho, na ɔsɛ dɛ wɔkɔ do ara dzi hɔn ho nokwar wɔ biribiara mu. (1 Corinthfo 7:3; Hebrewfo 13:4) Sɛ wɔwɔ mbofra a, ɔyɛ hɔn beenu no nyina hɔn asodzii dɛ wɔbɔbɔ mu atsetse hɔn.​—Mbɛbusɛm 6:20.

   Ndwuma a ɔsɛ dɛ awarfo yɛ dze hwɛ hɔnho nye fie ndwuma a wɔbɛyɛ no, Bible no nnhyɛ da ara nnka ho asɛm pii. Hɔnankasa botum ahwɛ dza wɔyɛ a ɔbɔboa hɔn ebusua no na wɔayɛ no dɛm.

•   Dza ɔsɛ dɛ okun yɛ. Bible no ka dɛ “okun no yɛ ne yer no ne tsir.” (Ephesusfo 5:23) Okun yɛ ne yer no ne tsir osiandɛ ɔno na ɔsɛ dɛ ɔma n’ebusua akwankyerɛ na osisi gyinae a ɔbɔboa ne yer na ne mba.

   Ɔsɛ dɛ okun hwɛ dɛ n’ebusua no wɔ dza wobedzi na dza wɔbɛhyɛ. Afei so, ɔsɛ dɛ ɔboa hɔn ma hɔn enyi gye na wɔbɛn Nyankopɔn. (1 Timothy 5:8) Suban pa a ɔyer no wɔ no, ɔsɛ dɛ okun no kyerɛ ho enyisɔ na ɔnye no yɛ edwuma bɔ mu. Sɛ okun no ribesi gyinae bi a, ɔsɛ dɛ obisa ne yer no n’adwenkyerɛ. Sɛ ɔyɛ dɛm a nna oridzi ne yer no nyi. (Mbɛbusɛm 31:11, 28) Bible no ka dɛ ɔsɛ dɛ okun fi ɔdɔ mu dzi n’asodzi ahorow ho dwuma.​—Colossaefo 3:19.

•   Dza ɔsɛ dɛ ɔyer yɛ. Bible no ka dɛ ɔsɛ dɛ ‘ɔyer dzi no kun nyi.’ (Ephesusfo 5:33) Dwumadzi ahorow a Nyankopɔn dze ahyɛ okun no ne nsa no, sɛ ne yer fi ahobrɛadze mu gye to mu a, ɔma Nyankopɔn n’enyi gye paa.

   Ɔyer n’asodzi nye dɛ ɔbɔboa no kun ma oeesisi gyinae pa na ɔaboa no ma oeedzi asodzi a Nyankopɔn dze ahyɛ ne nsa no ho dwuma yie. (Genesis 2:18) Bible no kamfo ɔyer a odzi n’asodzi ho dwuma yie no.​—Mbɛbusɛm 31:10.

 Oho. Ɔwɔ mu, Nyankopɔn hyɛɛ n’asomfo binom a wɔtsenaa ase wɔ tsetseberdo no dɛ wɔnwo mba. (Genesis 1:28; 9:1) Naaso Christianfo nnhyɛ dɛm mbra yi ase. Jesus annhyɛ n’ekyirdzifo no dɛ wɔnwo mba, na dɛmara so na n’ekyirdzifo a wodzi kan no annhyɛ obiara dɛ ɔnwo mba. Awarfo no ankasa botum esi gyinae dɛ wɔbɔwo mba anaa wɔronnwo mba.

 Afotusɛm pii wɔ Bible no mu a obotum aboa hɔn a wɔawar fofor no ma hɔn awar aasɔ. Sɛ awarfo dze afotusɛm a ɔwɔ Bible mu no yɛ edwuma a, ɔremma etsim-na-aka-me biara mmba hɔn awar no mu. Sɛ wohyia nsɛndzendzen ahorow so a, Bible mu afotusɛm botum aboa hɔn ma woeesiesie.

 Bible mu afotusɛm botum aboa awarfo ma  . . .

•   wɔaada ɔdɔ mapa edzi akyerɛ hɔn ho.​—1 Corinthfo 13:4-7; Colossaefo 3:14.

•   wɔaatse hɔn ho ase.​—1 Corinthfo 10:24.

•   wɔaayɛ aso etsie hɔn ho.​—James 1:19.

•   woeebu hɔn ho.​—Romefo 12:10.

•   wɔdze bɔn akyekyɛ hɔn ho.​—1 Peter 4:8.

•   woeedzi hɔn ho nokwar.​—Mark 10:9.

•   woeenya hɔn ho abotar.​—Ephesusfo 4:2, 3.

•   wɔaabɔ mu ayɛ adze.​—Ɔsɛnkafo 4:9.

•   wɔaayɛ dza ɔbɛma hɔn awar asɔ.​—Ndwom Mu Ndwom 8:7.