Nwoma krɔnkrɔn ahorow 66 na ɔka bɔ mu yɛ Bible no. Mfe bɔbor 1,600 na wɔdze kyerɛɛw Bible no. Nsɛm a ɔwɔ Bible no mu nyina fi Nyankopɔn hɔ. Dɛm ntsi Bible no yɛ “Nyankopɔn asɛm.”​—1 Thessalonicafo 2:13.

Dza yɛbɛka ho asɛm

•  Nokwasɛm a ɔfa Bible no ho

•  Ebɛnadze na Bible no ka ho asɛm?

•  Sɛ ehwɛ a, wɔasesa Bible no mu nsɛm anaa?

•  Ebɛnadze ntsi na ndɛ yɛwɔ Bible nkyerɛasee ahorow pii?

•  Woana na ɔkyerɛɛ nsɛm a nna ɔsɛ dɛ wɔkyerɛw wɔ Bible no mu?

•  Nwoma ahorow a ɔwɔ Bible no mu no, bi ayew anaa?

•  Mbrɛ ibesi ehu kyerɛwnsɛm ahorow wɔ Bible no mu

•  Bible mu nwoma ahorow a wɔahyehyɛ

•   Woana na ɔkyerɛɛw Bible no? Nyankopɔn nye Bible no ne Kyerɛwfo. Naaso ɔnam mbarimba bɛyɛ 40 do na ɔkyerɛwee. Hɔn mu binom nye Moses, Ɔhen David, Matthew, Mark, Luke, na John. a Nyankopɔn dze no nsusui maa dɛm mbarimba yi mbrɛ ɔbɛyɛ a wɔbɛkyerɛw ne nsɛm no.​—2 Timothy 3:16.

   Ma yɛnyɛ mfatoho bi: Sɛ edwumawura bi pɛ dɛ ɔdze nkrasɛm kɛma obi a, obotum ama ne kyerɛwfo no akyerɛw dɛm nkrasɛm no. Naaso bi a edwumawura no bedzi kan ama ne kyerɛwfo no ehu nsɛntsitsir a ɔwɔ asɛm a ɔpɛ dɛ ɔkyerɛw no mu. Sɛ owie a, obegya ama ɔkyerɛwfo no akyerɛw krataa no. Ɔwɔ mu dɛ ɔkyerɛwfo no na ɔkyerɛwee dze, naaso no mu nsɛm no yɛ edwumawura no nedze. Dɛmara na asɛm yi so tse. Ɔwɔ mu dɛ Nyankopɔn nam nyimpa bi do kyerɛɛw ne nkrasɛm no dze, naaso ɔno nye Bible no Kyerɛwfo.

•   Sɛ wɔka “Bible” a, ɔkyerɛ dɛn? Wonyaa “Bible” fii Greek kasafua biblia mu, na dza ɔkyerɛ nye “nwoma nkakraba.” Ekyir yi, wɔdze biblia frɛɛ nwoma nkakraba a ɔka bɔ mu yɛ Bible no.

•   Ebɛn aber na wɔkyerɛɛw Bible no? Wɔhyɛɛ ase dɛ wɔrekyerɛw Bible no wɔ afe 1513 A.H.B., na odzii bɔbor mfe 1,600 ansaana wɔrekyerɛw ewie wɔ bɛyɛ afe 98 H.B.

•   Bible a wodzii kan kyerɛwee no wɔ hen? Bible a wodzii kan kyerɛwee no mu biara nnyi hɔ a ndɛ ɔwɔ hɔ. Ebɛnadze ntsi a? Osiandɛ ndzɛmba ahorow a wodzii kan kyerɛɛw Bible no wɔ do no, nna ɔnnyɛ ndzɛmba a ɔkyɛr pii. Nna dɛm ndzɛmba no bi yɛ lɛda nye krataa bi a nna wɔdze haban bi ayɛ. Naaso akyerɛwfo a nna wɔaben tɔɔ hɔn bo ara sanee kyerɛɛw no mu nsɛm no guu ndzɛmba afofor do mbrɛ ɔbɛyɛ a wɔbɔkora do ama nkyirmba eenya bi akenkan.

•   Ebɛnadze nye “Ahyɛmu Dadaw” na “Ahyɛmu Fofor” no? Dza nyimpa pii frɛ no Ahyɛmu Dadaw no yɛ Bible no ne fa bi a wɔkyerɛɛw no mu dodow no ara wɔ Hebrew kasa mu no. b Wɔsan so frɛ no Hebrew Kyerɛwnsɛm. Dza wɔfrɛ no Ahyɛmu Fofor no so yɛ Bible no ne fa a wɔkyerɛɛw no wɔ Greek kasa mu no, na wɔsan so frɛ no Christianfo Greek Kyerɛwnsɛm. c

•   Ebɛn nsɛm na ɔwɔ Bible no mu? Dza ɔwɔ Bible mu no bi yɛ abakɔsɛm, mbransɛm, nkɔnhyɛsɛm, anwensɛm, mbɛbusɛm, ndwom, nye nkrataa.​—Hwɛ “ Bible mu nwoma ahorow a wɔahyehyɛ.”

 Bible n’ahyɛse pɛɛ ma yehu mbrɛ Adze Nyina Do Tumfo Nyankopɔn sii bɔɔ sor na asaase ho nsɛm kakra. Nyankopɔn san so nam Bible no do ada noho edzi akyerɛ hɛn. Ɔama yeehu dɛ ne dzin dze Jehovah, na ɔpɛ dɛ nyimpa nyina hu no yie.​—Ndwom 83:18.

 Bible no ma yehu dɛ woegu Nyankopɔn ne dzin ho fi, na ɔkyerɛ kwan a Nyankopɔn bɛfa do atsew ne dzin no ho.

 Bible no san ma yehu siantsir a Nyankopɔn bɔɔ nyimpa na asaase no, na ɔma yehu kwan a Nyankopɔn bɛfa do eyi amandzehu efi hɔ daakye.

 Afotusɛm pii wɔ Bible no mu a ɔboa hɛn wɔ hɛn da biara da asetsena mu. Dɛm afotusɛm no mu bi na odzidzi do yi:

•   Dza yɛyɛ a ɔbɛma yɛnye afofor ntamu ayɛ kama. “Dɛm ntsi adze biara a hom pɛ dɛ nyimpa yɛ ma hom no, hom nyɛ dɛmara so mma hɔn.”​—Matthew 7:12.

   Dza ɔkyerɛ: Mbrɛ yɛpɛ dɛ afofor nye hɛn dzi no, ɔsɛ dɛ yɛnye hɔn dzi no dɛmara.

•   Mbrɛ yebesi egyina adwendwen ano. “Mma hom nndwendwen ɔkyena ho; na ɔkyena bɔdwendwen nankasa no ho.”​—Matthew 6:34.

   Dza ɔkyerɛ: Ɔnnsɛ dɛ yɛdwendwen dza obesi daakye ho dze haw hɛn ho. Mbom ɔsɛ dɛ yɛdze hɛn adwen si dza yɛrefa mu ndɛ no do.

•   Dza ɔma awar sɔ. “Obiara ndɔ nankasa ne yer dɛ mbrɛ ɔdɔ nankasa noho, na ɔyer so ondzi no kun nyi.”​—Ephesusfo 5:33.

   Dza ɔkyerɛ: Sɛ awarfo nya ɔdɔ na obu ma hɔn ho a, ɔbɛma hɔn awar asɔ.

 Oho. Bible ho abemfo atɔ hɔn bo adze dze tsetse nsaano nkyerɛwee ahorow atoto Bible a ɔwɔ hɔ ndɛ no ho na woebohu dɛ Bible no mu nsɛm nnsesae. Sɛ Bible no mu nsɛm nnsesae a ntseasee wɔ mu, osiandɛ Nyankopɔn pɛ dɛ obiara kenkan n’Asɛm no na ɔtse ase. Dɛm ntsi ɔhwɛɛ hun dɛ wɔrennsesa no mu nsɛm no. d​—Isaiah 40:8.

 Ndɛ nyimpa pii wɔ hɔ a kasa a wodzii kan dze kyerɛɛw Bible no, worunntum nnkenkan anaadɛ wɔrenntse ase. Naaso Bible no wɔ “asɛmpa” bi ma nkorɔfo a wofi “aman nye ebusuakuw nye kasa” ahorow mu no. (Nyikyerɛ 14:6) Iyi ntsi, no ho hia dɛ wɔkyerɛ Bible no ase kɔ kasa ahorow mu ama nkorɔfo eetum akenkan Nyankopɔn n’asɛm no na wɔatse ase yie.

 Akwan ahorow ebiasa bi wɔ hɔ a wotum fa do kyerɛ Bible no ase:

•   Nkasafua a wɔkyerɛ ase tsenn dɛ mbrɛ asɛm no tse no ara.

•   Wɔkyerɛ asɛm no ase mbrɛ ɔbɛyɛ a ntseasee a ɔwɔ asɛm no mu no bɛda edzi. Dza wɔyɛ nye dɛ, wɔfa nkasafua bi a ɔbɛma ntseasee a ɔwɔ tsetse kasa a wɔdze kyerɛɛw Bible no mu no ada edzi.

•   Nsɛmfua ahorow a wɔbɔ no mua mbrɛ ɔbɛyɛ a akenkan no bɛyɛ enyika. Naaso sɛ wɔfa dɛm kwan yi do kyerɛ Bible no ase a, ɔtɔ da a ibohu no nna aba a ɔwɔ asɛm no mu no ayew.

 Sɛ Bible nkyerɛasee bi tum kyerɛkyerɛ Nyankopɔn n’asɛm mu yie ma nyimpa a wɔwɔ hɔ ndɛ tum tse ase a, ɔno ma yehu dɛ dɛm Bible nkyerɛasee no yɛ papa paa. e

 Nyankopɔn nye Bible no ne Kyerɛwfo, ntsi ɔno na ɔkyerɛɛ nsɛm a nna ɔsɛ dɛ wɔkyerɛw wɔ Bible no mu. Odzii kan yii tsetse Israelfo na ‘ɔdze ne nsɛm hyɛɛ hɔn nsa’ na ɔmaa wɔkyerɛɛw Hebrew Kyerɛwnsɛm no.​—Romefo 3:2.

 Oho. Nwoma ahorow a ɔka bɔ mu yɛ Bible no, no mu kor mpo “nnyewee.” Nyimpa binom susu dɛ tsetse nwoma ahorow bi a nna ɔka Bible no ho no, ndɛ woeyiyi efi mu. f Naaso nsɛm a ɔwɔ Bible no mu ma yehu dɛ Bible no yɛ nokwar. (2 Timothy 1:13) Nsɛm ahorow a Nyankopɔn maa wɔkyerɛɛw wɔ Bible no mu no, ne nyina hyia pɛpɛɛpɛ. Naaso tsetse nwoma ahorow a binom ka dɛ ɔka Bible no ho no, yerunntum nnka dɛ ɔnye Bible no hyia. g