Nyew! Bible no fi Nyankopɔn, “nyia ɔkyekye abrɛfo werɛ no” hɔ. (2 Corinthfo 7:6) Ɔwɔ mu dɛ Bible no nnyɛ nwoma a ɔkyerɛkyerɛ mbrɛ nyimpa n’adwen si yɛ edwuma no mu dze, naaso aboa nyimpa pii a nna wɔpɛ dɛ woku hɔnho no. Afotusɛm a ɔwɔ mu no botum aboa ɔwoara so.

•  Ebɛn afotu na Bible no dze ma?

•  Ana Bible no ka nyimpa bi a nna wɔpɛ dɛ wowu ho asɛm?

•  Sɛ inya adwen dɛ epɛ dɛ iku woho a, ebɛn kyerɛwnsɛm ahorow na obotum aboa wo?

•  Sɛ wo nyɛnko bi ka dɛ “mepɛ dɛ muku moho” a, ebɛnadze na ɔsɛ dɛ eyɛ?

•  Na sɛ meyɛɛ m’adwen dɛ nkyɛ muruku moho so ɛ?

• ● Ka mbrɛ isi tse nka no ho asɛm.

   Dza Bible no ka: “Ɔnyɛnko dɔ aber nyinara, na onua dze, wɔwo no ma abɛbrɛsɛ.”​—Mbɛbusɛm 17:17.

   Dza ɔkyerɛ: Sɛ dadwen hyɛ hɛn do a, yebehia afofor hɔn mboa.

   Sɛ edze wo haw no hyɛ woho, na annka ho asɛm annkyerɛ obiara a, ɔbɛyɛ dzen ama wo dɛ ibegyina ano. Naaso sɛ eka mbrɛ isi tse nka ho asɛm kyerɛ afofor a woho bɔtɔ wo kakra, na ibohu mbrɛ ibesi edzi wo haw no ho dwuma.

   Sɔ iyi hwɛ: Ka wo haw no ho asɛm kyerɛ obi ndɛ. Obotum ayɛ wo busuanyi anaa wo nyɛnko bi a egye no dzi. a Afei so, mbrɛ isi tse nka no, ibotum akyerɛw ato hɔ.

• ● Hwehwɛ mboa fi oduyɛfo hɔ.

   Dza Bible no ka: ‘Hɔn a wɔtse apɔw no, wonnhia oduyɛfo, na mbom hɔn a wɔyar no a.’​—Matthew 9:12.

   Dza ɔkyerɛ: Sɛ yɛyar a ɔwɔ dɛ yɛhwehwɛ mboa fi oduyɛfo hɔ.

   Sɛ obi nya adwen dɛ ɔpɛ dɛ oku noho a, obotum aba dɛ oenya adwenmuhaw. Adwenmuhaw tse dɛ yarba fofor biara, ntsi mma w’enyi nnwu wɔ ho, n’ano edur wɔ hɔ.

   Sɔ iyi hwɛ: Hwehwɛ mboa fi dɔkta bi a ɔwɔ ho nyimdzee hɔ ntsɛmara.

• ● Kaa dɛ Nyankopɔn dwen woho.

   Dza Bible no ka: “Ana nsorɔm enum wɔnntɔn nngye mpowa ebien? Naaso hɔn mu kor ara enyi mmpa no do wɔ Nyankopɔn enyim. . . . Mma hom nnsuro: hom som bo kyɛn nsorɔm pii.”​—Luke 12:6, 7.

   Dza ɔkyerɛ: Esom bo ma Nyankopɔn.

   Ɔtɔfabi a ebɛtse nka dɛ ayɛ ankonam, naaso kaa dɛ Nyankopɔn hu dza erefa mu no. Sɛ mpo enya adwen dɛ epɛ dɛ iku woho a, kaa dɛ ɔdwen woho. Ndwom 51:17 ka dɛ “Nyankopɔn, akoma a abobɔ na abotow no, ɔwo erommpow. Osiandɛ Nyankopɔn dɔ wo ntsi ɔmmpɛ dɛ ibowu.

   Sɔ iyi hwɛ: Hwehwɛ dase ahorow a ɔwɔ Bible no mu a ɔkyerɛ dɛ Nyankopɔn dɔ wo. Dɛ mfatoho no, hwɛ nwoma a wɔdze sua Bible a wɔato dzin Bɛn Yehowa ne tsir 24 no.

• ● Bɔ Nyankopɔn mpaa.

   Dza Bible no ka: ‘Hom ntow hom dadwen nyina nkyen Nyankopɔn do, osiandɛ ɔdwen homho.’​—1 Peter 5:7.

   Dza ɔkyerɛ: Nyankopɔn to nsa frɛ wo dɛ fi w’akoma mu ka dza ɔhaw wo no nyina ho asɛm kyerɛ no.

   Nyankopɔn botum ama wo ahoɔdzen a edze begyina ɔhaw no ano, na ɔaama w’asomu adwe wo. (Philippifo 4:6, 7, 13) Sɛ ifi w’akoma nyina mu bɔ no mpaa dɛ ɔmboa wo a, ɔbɔboa wo.​—Ndwom 55:22.

   Sɔ iyi hwɛ: Ndɛ, bɔ Nyankopɔn mpaa. Bɔ ne dzin Jehovah no wɔ wo mpaabɔ mu, na ka mbrɛ isi tse nka ho asɛm kyerɛ no. (Ndwom 83:18) Serɛ no dɛ ɔmma wo ahoɔdzen a edze begyina wo haw no ano.

• ● Dwendwen daakye ho enyidado a Bible no ka ho asɛm no ho.

   Dza Bible no ka: “Enyidado a yɛwɔ no dɛ ɔkra ne sekyɛ a ɔnntsɛw na otsim.”​—Hebrewfo 6:19.

   Dza ɔkyerɛ: Tse dɛ hɛmba a osi nsu do a mframa ridzi no akɔnaaba no, dɛmara na mbrɛ isi tse nka no botum ayɛ. Naaso enyidado nsɛm a ɔwɔ Bible no mu no botum ama eegyina w’anan do.

   Dɛm enyidado yi nnyɛ adaaso bi ara kɛkɛ, na mbom ogyina anohoba a Nyankopɔn abɔ dɛ obeyi biribiara a ɔma yedzi yaw efi hɔ no do.​—Nyikyerɛ 21:4.

   Sɔ iyi hwɛ: Sua enyidado a Bible no ka ho nsɛm ho adze pii wɔ nwomaba a wɔato dzin Asɛmpa A Ofi Nyankopɔn Nkyɛn! ne tsir 5 no mu

• ● Yɛ biribi a w’enyiwa gye ho.

   Dza Bible no ka: “Enyigye akoma yɛ edur pa.”​—Mbɛbusɛm 17:22.

   Dza ɔkyerɛ: Sɛ yɛyɛ ndzɛmba a ɔma hɛn enyi gye a, obotum aboa ma yeenya akomatɔyamu anaa hɛn dadwen do atsew.

   Sɔ iyi hwɛ: Yɛ biribi a w’enyiwa gye ho. Dɛ mfatoho no, tsie ndwom anaa kenkan biribi a ɔbɛhyɛ wo nkuran. Ibotum so edzi agor bi. Sɛ eyɛ biribi kakrabaa bi mpo ma afofor a, w’enyi bɛgye papaapa.​—Asomafo Ndwuma 20:35.

• ● Hwɛ w’apɔwmudzen yie.

   Dza Bible no ka: “Honam mu mbɔdzen ho [wɔ] mfaso.”​—1 Timothy 4:8.

   Dza ɔkyerɛ: Sɛ yɛtsentsen hɛn apɔw mu, yɛda yie, na yedzi edziban pa a yenya do mfaso.

   Sɔ iyi hwɛ: Fa minitsi 15 bi kotu mpasar.

• ● Kaa dɛ mbrɛ yesi tse nka wɔ ndzɛmba a osisi wɔ hɛn asetsena mu no ho tum sesa.

   Dza Bible no ka: “Hom nnyim dza ɔbɛba ɔkyena.”​—James 4:14.

   Dza ɔkyerɛ: Sɛ dadwen bi hyɛ wo do, na ɔyɛ wo dɛ irunntum nnyɛ ho hwee mpo a, kaa dɛ ɔronnko wo do daa.

   Sɛ ndɛ ɔtse dɛ mbrɛ wo haw no agye egua mpo a, ɔkyena obotum akɔ. Ntsi hwehwɛ akwan ahorow a ibotum afa do egyina ano. (2 Corinthfo 4:8) Ɔhaw biara a erefa mu no botum efi hɔ, naaso sɛ iku woho a irunntum nntwe nnsan.

   Sɔ iyi hwɛ: Bible no ka nyimpa binom a hɔn abaw mu bui araa ma nkyɛ nna wɔpɛ dɛ wowu no ho asɛm. Kenkan hɔnho nsɛm, na hwɛ mbrɛ ekyir yi hɔn tsebea no sesaa koraa wɔ kwan bi do a nna hɔn enyi nnda. Ma yensusu hɔn mu binom ho.

 Nyew. Bible no ka nyimpa ahorow bi a wɔ kwan bi do no wɔkaa dɛ, “Mepɛ dɛ mowu” ho asɛm. Nyankopɔn anntsea hɔn, mbom ɔboaa hɔn. Obotum aboa ɔwoara so.

Elijah

•  ● Nna ɔno nye woana? Nna Elijah yɛ nkɔnhyɛnyi a ɔwɔ akokodur. Naaso, nna ɔtɔfabi a ɔnoara so n’abaw mu bu. James 5:17 ka dɛ nna “Elijah yɛ nyimpa a ɔwɔ hɛn su kor yi ara bi.”

•  ● Nna ebɛnadze ntsi na ɔpɛ dɛ owu? Mber bi Elijah bɔɔ hu, na ɔtsee nka dɛ ɔayɛ ankonam na mfaso biara nnyi no do. Ntsi ɔserɛɛ dɛ: “Ewuradze, yi mo nkwa.”​—1 Ahemfo 19:4.

•  ● Ebɛnadze na ɔboaa no? Elijah kaa mbrɛ osi tse nka ho asɛm kyerɛɛ Nyankopɔn. Ebɛn kwan do na Nyankopɔn hyɛɛ no dzen? Nyankopɔn kyerɛɛ Elijah dɛ ɔdwen noho na ɔsan so maa ohun dɛ ɔwɔ tum so. Nkyii so Nyankopɔn maa Elijah hun dɛ no do wɔ mfaso, na oyii ɔbarimba bi a ne yamu ye dɛ ɔmboa Elijah.

•  ▸ Kenkan Elijah ho asɛm: 1 Ahemfo 19:2-18.

Job

•  ● Nna ɔno nye woana? Nna Job yɛ ɔbarimba sikanyi bi a ɔwɔ ebusua, na ɔdze nokwardzi soom Nyankopɔn.

•  ● Nna ebɛnadze ntsi na ɔpɛ dɛ owu? Job n’asetsena danee butuwii. N’egyapadze nyina fii ne nsa. Atoyerɛnkyɛm bi sii ma ne mba nyina wuwui. Yarba yayaayaw bi so bɔɔ no. Ekyir yi, wotwaa asɛm yayaayaw too no do dɛ ɔnoara na ɔakɛfa ne haw no nyina aba. Job kaa dɛ: “Mo nkwa afon me; memmpɛ dɛ metsena ase daa.”​—Job 7:16.

•  ● Ebɛnadze na ɔboaa no? Job bɔɔ Nyankopɔn mpaa, na ɔkaa ne haw no ho asɛm kyerɛɛ afofor. (Job 10:1-3) Job ne nyɛnko bi a wɔfrɛ no Elihu a nna ɔwɔ tsema no boaa Job ma onyaa ne tsebea no ho adwen pa. Dza ɔsen ne nyina no, Job gyee afotu na mboa a Nyankopɔn dze maa no no too mu.

•  ▸ Kenkan Job ho asɛm: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moses

•  ● Nna ɔno nye woana? Nna Moses yɛ tsetse Israelman no kandzifo. Nna ɔyɛ nkɔnhyɛnyi a odzi nokwar.

•  ● Nna ebɛnadze ntsi na ɔpɛ dɛ owu? Nna Moses n’edwuma so. Nkorɔfo kasaa tsiaa no mpɛn pii na iyi maa n’abaw mu bui. Ntsi ɔtotɔɔ serɛɛ Nyankopɔn dɛ: “Oku mbom na ku me.”​—Nkanee 11:11, 15.

•  ● Ebɛnadze na ɔboaa no? Moses kaa mbrɛ nna osi tse nka ho asɛm kyerɛɛ Nyankopɔn. Nyankopɔn boaa Moses na ɔtseew n’adzesoa no do.

•  ▸ Kenkan Moses ho asɛm: Nkanee 11:4-6, 10-17.