Ɔwɔ mu dɛ Bible no nnka “nyinsen a wotu gu” ho asɛm, naaso ɔma yehu Nyankopɔn n’adwen wɔ nkwa ho a abofra a ɔhyɛ ne na ne yamu so ka ho.

 Nkwa yɛ akyɛdze a ofi Nyankopɔn hɔ. (Genesis 9:6; Ndwom 36:9) Obu nkwa nyina dɛ ɔsom bo a abofra a ɔhyɛ ne na ne yamu no nkwa so ka ho. Ntsi sɛ obi hyɛ da ara kum abofra a ɔhyɛ yafun mu a, ɔtse dɛ dza oekum nyimpa ara pɛ.

 Nyankopɔn maa Israelfo no Mbra dɛ: “Sɛ mbanyin roko, na wopira onyinsemfo, ma ɔpon ɔba, na mbusu bi ammba ekyir dze a: brabo na wɔngye no, dɛ mbrɛ ɔbaa no no kun dze bɔto no do no; na ontua no dɛ mbrɛ ntsɛmbuafo no bɛkyerɛ no. Na sɛ mbusu bi ba ekyir a, ɔnodze fa nkwa hyɛ nkwa ananmu.”​—Exodus 21:22, 23. a

•  Ebɛn aber na nyimpa no nkwa hyɛ ase?

•  Ana Nyankopɔn dze obi a oetu nyinsen egu pɛn no bɔn bɛkyɛ no?

•  Sɛ maame anaa abofra bi a ɔhyɛ yafun mu no nkwa da esian mu a, aso ɔyɛ bɔn dɛ wobotu nyinsen no egu?

 Sɛ ɔbaa nya fa yafun ara pɛ a, Nyankopɔn bu no dɛ abofra no no nkwa ahyɛ ase. Nyankopɔn ma yehu wɔ n’Asɛm Bible no mu dɛ, abofra a ɔhyɛ yafun mu no so yɛ nyimpa. Ma yensusu nhwɛdo ahorow yi ho, na yebohu dɛ, mbrɛ Nyankopɔn bu abofra a wɔawo no no nkwa no, dɛmara na obu abofra a ɔhyɛ yafun mu no so no nkwa.

•   Nyankopɔn no sunsum maa Ɔhen David kaa dɛ: “W’enyiwa hun me ber a meyɛ bɔgyatɔw nko no.” (Ndwom 139:16) Nyankopɔn hun David dɛ ɔyɛ nyimpa ansaana wɔrobɔwo no.

•   Afei so, ansaana wɔrobɔwo nkɔnhyɛnyi Jeremiah no, nna Nyankopɔn nyim dɛ daakye bi ɔdze dwumadzi soronko bi bɛhyɛ ne nsa. Nyankopɔn see no dɛ: “Ansaana moween wo yafun mu no, nna minyim wo, na ansaana irifi awotoa mu efir no, nna metseew wo ho; mahyɛ wo nkɔnhyɛnyi mama amanaman.”​—Jeremiah 1:5.

•   Dza ɔka ho bio nye dɛ, Greek kasafua a Bible kyerɛwfo Luke a ɔsan so yɛ oduyɛfo no dze dzii dwuma aber a ɔreka abofra a ɔhyɛ yafun mu ho asɛm no, dɛm kasafua no ara na ɔdze dzii dwuma aber a ɔreka abofra a wɔawo no no ho asɛm no.​—Luke 1:41; 2:12, 16.

 Hɔn a woetu nyinsen egu pɛn no, Nyankopɔn botum dze hɔn bɔn akyɛ hɔn. Adwen a Nyankopɔn wɔ wɔ nkwa ho no, sɛ hɔn so nya bi a ɔnnsɛ dɛ wɔma dza wɔayɛ dada no kɔ do haw hɔn. “Ayamuhyehyɛ na adom ahyɛ [Jehovah] ma . . . Dɛ mbrɛ anee na boka ntamu war no, dɛmara so na ɔama yɛnye hɛn mbrato ntamu awar.” b (Ndwom 103:8-12) Sɛ obi ayɛ bɔn bi etwa mu, anaa mpo dɛ oetu nyinsen egu pɛn, na sɛ onu noho nokwar mu a Jehovah dze no bɔn bɛkyɛ no.​—Ndwom 86:5.

 Sɛ yɛhwɛ dza Bible no ka fa abofra a ɔhyɛ yafun mu no nkwa ho a, sɛ abofra no anaa ne na no nkwa ho reba asɛm a ɔno nnkyerɛ dɛ ɔsɛ dɛ wɔhyɛ da ara tu nyinsen no gu.

 Sɛ ɔbaa bi n’awoo mu yɛ dzen, na ɔsɛ dɛ wɔgye maame no na ne ba no hɔn mu kor nkwa a, ebɛn gyinae na ɔsɛ dɛ wosi? Ɔwɔ mu dɛ asɛm yi nntaa nnsi, naaso sɛ ɔba no dɛm a, awarfo no ankasa na ɔsɛ dɛ wosi nyia wɔbɛgye no nkwa no ho gyinae.