Jehovah Adasefo dze adansi edwuma etsitsir ebien bi rehyehyɛ do wɔ United States. Edwuma yi rokɔ n’enyim, na ndaase nkã edwumayɛfo a wofi ɔman n’afã ahorow nyina mu a woetu hɔnho akyɛ roboa edwuma no.

Wallkill, New York: Adasefo a hɔn dodow bor 1,600 na wɔyɛ edwuma wɔ ha, na ɔyɛ bea tsitsir a wotsintsim nwoma ma Jehovah Adasefo wɔ United States. Mbrɛ ɔbɛyɛ a wɔbɛtserɛw edwuma a wɔyɛ wɔ Wallkill no mu no, edwumayɛfo a hɔn mu pii yɛ etuhoakyɛfo no risi aborɔsan a ɔtoa do ebiasa a wɔdze bɛyɛ ɔfese ahorow, bea a wɔdze kar besisi, nye aborɔsan a ɔtoa do ebiasa a edwumayɛfo bɛtsena mu. Odur mfe 2012 no, nna edwumayɛfo no esi dan a wɔdze adansi edwuma no ho ndzɛmba bogugu mu dada, na wɔatserɛw edzidzibea no mu mbrɛ ɔbɛyɛ a obotum afa nyimpa 200 akã ho.

Jehovah Adasefo wɔ edwumayɛbea akɛse ahorow wɔ aman pii do a Brazil, Germany, nye Mexico kã ho, na wɔfrɛ dɛm mbea yi nkorbata edwumayɛbea. Adzesuabea a ɔwɔ Patterson, New York, nye ɔfese ahorow a ɔwɔ Brooklyn, New York no kã Jehovah Adasefo edwumayɛbea ahorow no ho. Sɛ wowie ntserɛwmu edwuma a ɔrokɔ do wɔ Wallkill no a, hɔ bɛyɛ Jehovah Adasefo edwumayɛbea a ɔsõ kyɛn biara wɔ wiadze nyina.

Warwick, New York: Adan akɛse a worisi wɔ ha no na ɔbɛyɛ Jehovah Adasefo hɔn wiadze nyina edwumayɛbea tsir. Woedwuruw adan a hwee nnyi mu a nna osisi asaase no do nyina egu. Adasefo no enya asaase bi wɔ Tuxedo, New York. Ofi Warwick dze kɔ hɔ yɛ kilomita 10 (akwansin 6). Dɛm bea yi na wɔdze mfir nye adansi no ho ndzɛmba besisi. Etumfo a wɔhwɛ Warwick kurow no do no agye nsunsuando a adansi edwuma no benya wɔ kurow no do no ato mu. Sɛ wonya gye adansi edwuma no ho nhyehyɛɛ a wɔadorɔw no to mu a, wɔdze akwambisa krataa bɔkɔ akɛgye tum krataa a wɔdze besi dan no. Naaso seseiara a yɛrekasa yi dze, Jehovah Adasefo wiadze nyina edwumayɛbea tsir no da ho ara wɔ Brooklyn, New York.