Mberantsɛ na nkataasia a wɔwɔ Jehovah Adasefo edwumayɛbea wɔ United States no dze hɔn ber nye hɔn ahoɔdzen hor ndzɛmba pii a sɛ wɔka bɔ mu a no mu dur yɛ ton 1,800 afe biara wɔ hɔn ɔfese ahorow a ɔwɔ Brooklyn, Patterson, nye Wallkill, New York. Ndzɛmba no dodow nkotsee mpo yɛ ahobow ara yie. Dza ɔma adzehor yi yɛ soronko nye dɛ, ndzɛmba asorɔtow pii na edwumayɛfo no yɛ ho edwuma.

Ofitsi Dwowda kesi Fida no, edwumayɛfo a wɔtsetse United States Bethel adan mu no dze ndzɛmba bɔbor 11,000 kɔ Bethel adzehorbea hɔ. Ndzɛmba dodow a wɔdze kɔ hɔ no yɛ ntar 2,300, trawsa 650 nye ndzɛmba afofor pii tse dɛ sɔks, ntar a wɔhyɛ wɔ ase nye T-hyɛɛt. Bio so, wɔdze ndzɛmba afofor 900 a wɔmmfa nsu nnhor kɔ ma wɔyɛ ho edwuma.

Nnyɛ iyinom nko, wɔdze ndweratam pii so ba a mpadotam, entuho, kuntu, ntar a hɔn a wɔsom wɔ edzidzi ase hyɛ nye ntangow pii kã ho. Ɔwɔ dɛ wɔhor iyinom nyina, wɔhata ma ɔwo, na wɔdze kɛma no wuranom. Ndzɛmba tse dɛ ntangow dze wɔboa ano hor ne nyina bɔ mu, naaso wɔhor serekye abɔkɔnmu nye blouse nkorkor nkorkor.

Edwumayɛfo a wɔwɔ adzehorbea hɔ no hwɛ atar biara a wɔdze ba hɔ no dɛ bi a ne fã bi atsew anaa bɔton bi etu ayew a. Sɛ ɔwɔ dɛ wosi bɔton fofor a, wɔdze efir anaa hɔn nsa bɛyɛ. Sɛ ɔwɔ dɛ wɔpam atar no ne fã bi so a, obi a onyim adzepam na ɔbɔhwɛ ayɛ.

Wɔdze efir bi yɛ ahyɛnsewdze soronko wɔ atar biara ho mbrɛ ɔbɛyɛ a wobohu ntar mpempem yi mu biara no wura. Dɛm ahyɛnsewdze yi ma ɔyɛ mberɛw dɛ wobeyiyi ntar no ber a wɔahor ewie, wɔatow, na wɔdze akɛma no wuranom a wɔyɛ United States Bethel ebusua no mufo no.

Edwumayɛfo a hɔnho akokwaa no tsetse edwumayɛfo afofor a wɔdze hɔn ba adzehorbea hɔ no. Wobotum atsetse odwumayɛnyi a ɔyɛ fofor no ma woeesũa edwuma ahorow bɛyɛ 20. Edwuma kor a annhwɛ a ibobu no dɛ ɔyɛ tootooba naaso ɔgye ber ana obi noho akokwaa ne yɛ mu nye nkekaa a woyi fi ntar mu. Ɔsɛ dɛ odwumayɛnyi a ɔyɛ fofor no nya nyimdzee a no mu dɔ wɔ tam ahorow ho, nye mbrɛ tam ahorow yɛ ber a wɔfa kwan ahorow do yɛ ho edwuma no.

Tajh ayɛ edwuma afe kor na fã wɔ adzehorbea hɔ, ɔkãa edwumayɛfo a ɔnye hɔn yɛ edwuma no ho asɛm dɛ, “Anyɛnkofa a ɔwɔ hɔ no yɛ soronko, ɔyɛ enyigye dɛ enye nyimpa a ɔsor mbea a wofi bɔbɔ mu ayɛ edwuma.” Shelly so yɛ edwuma wɔ adzehorbea hɔ, dza ɔkã nye dɛ, “Ɔyɛ ho kwan dɛ ebɔboa hɛn Bethel ebusua no mufo ma hɔn ahosiesie edzi mu.”