Nyimpa mpempem pii kɔ nserahwɛ wɔ Jehovah Adasefo hɔn edwumayɛbea a ɔwɔ United States nye hɔn wiadze nyina edwumayɛbea tsir a ɔwɔ New York State no afe biara. Wɔfrɛ dɛm mbea yi Bethel, ɔyɛ Hebrew dzin a ɔkyerɛ “Nyankopɔn ne fie.” Nyimpa pii tu kwan fi mbea ahorow kɔ hɔ kɔhwɛ mbrɛ yesi tsintsim nwoma, mbrɛ yesi yɛ hɛn edwuma, na binom so kɔ kɛsera hɔn anyɛnkofo a wɔyɛ edwuma wɔ hɔ no. Ɔbarimba bi dze, nna ɔawe ataa do dɛ obotu kwan akɛsera Bethel.

Marcellus yɛ Jehovah Dasenyi a ɔtse Anchorage, Alaska, U.S.A. Mfrenhyia kakra a etwa mu no, ɔayar mbubui ma onntum nnkasa papa. a Hwiir mu na ɔtse, na ɔwɔ dɛ obi boa no wɔ ne daa daa adzeyɛ nyina mu. Ɔmmfa ho dɛm nsɛndzendzen ahorow yi nyina no, nna ɔwɔ ɔpɛ a no mu yɛ dzen dɛ ɔbɔkɔ akɛsera Bethel. Annkyɛr koraa nna n’adaaso yi baa mu.

Corey yɛ Marcellus ne nyɛnko, na ɔno na ɔboaa no ma ɔyɛɛ akwantu no ho nhyehyɛɛ. Dza ɔkã nye dɛ, “Nna ɔawe ataa do dɛ ɔbɔkɔ dɛm nserahwɛ yi. Ɔfrɛ da biara bisa me mbrɛ akwantu no ho nhyehyɛɛ no si rokɔ. Marcellus nntum nnkasa papa, nsɛm a otum kã ara nye ‘Nyew’ anaa ‘Oho.’ Dɛm ntsi sɛ ɔfrɛ a, nna ɔwɔ dɛ mibisa no nsɛm nkorkor nkorkor.” Nna dɛm kwan yi do na wɔfa do twetwe nkɔmbɔ:

“Ana epɛ dɛ meba wo hɔ?”

“Oho.”

“Ana epɛ dɛ mefrɛ dɔkota ma wo?”

“Oho.”

“Ana epɛ dɛ ihu mbrɛ Bethel akwantu no ho nhyehyɛɛ si rokɔ?”

“Nyew.”

“Sɛ ɔgye do dɛm a, nna ɔwɔ dɛ mekã mbrɛ akwantu no ho nhyehyɛɛ si rokɔ kyerɛ no. M’enyi gyee papaapa dɛ otumii dur dɛm botae yi ho.”

Nna ɔwɔ dɛ Marcellus dzi nsɛndzendzen pii ho dwuma ansaana oetum etu kwan akɔ nserahwɛ no. Osiandɛ ne sikasɛm nnkɔ yie na ɔyɛ ɔkɔhweaban ntsi no, otsĩaa sika mfrenhyia ebien mbrɛ ɔbɛyɛ a obotum etua akwantu a ne tsentsen yɛ kilomita 5,400 (akwansin 3,400) dze kɔ New York no ho kaw. Nkyii so, osiandɛ n’apɔwmudzen nndzi mu ntsi, nna ɔwɔ dɛ onya obi a obotum nye no akɔ. Iyi nyinara ekyir no, nna ɔwɔ dɛ no dɔkota pen do ansaana ɔaakɔ. Nyame nkyɛ adze, dɛm nhyehyɛɛ yi nyina tɔr mu nda kakraabi ansaana ber no rosõ ma ɔaakɔ.

Ber a Marcellus dur New York no, ɔkɔr nserahwɛ wɔ Brooklyn, Patterson, nye Wallkill edwumayɛbea hɔ. Ohun mfir akɛse a wɔdze tsintsim mbuukuu nye Bible ahorow, na osũaa mbrɛ yesi yɛ hɛn edwuma no ho adze pii. Nkyii so, ohun ndzɛmba a wɔada no edzi a wɔato dzin “The Bible and the Divine Name” (Bible no na Nyankopɔn Dzin No) nye “A People for Jehovah’s Name” (Ɔman ma Jehovah ne Dzin). Bio so, onyaa anyɛnkofo pii aber a nserahwɛ no rokɔ do no. Ɔyɛ nserahwɛ a no werɛ nnkefir da!

Nyimpa pii a wɔkɔ nserahwɛ wɔ Bethel no enyi gye araa ma wonnhu nsɛm a wɔnkã mfa nkyerɛ hɔn enyisɔ. Naaso, ber a wobisaa Marcellus dɛ oenya mbɔdzen a ɔbɔe tuu kwan kɔr nserahwɛ wɔ Bethel no do mfaso no, dɛ mbrɛ osi kasa no, dɛmara na oyii ano, dɛ: “Nyew. Nyew. Nyew!”

Dɛ mbrɛ Bethel nserahwɛ hyɛɛ Marcellus dzen no, dɛmara so na obotum ahyɛ ɔwo nye w’ebusua dzen. Wɔdze enyigye gye ahɔho a wɔkɔ nserahwɛ wɔ hɛn edwumayɛbea a ɔwɔ wiadze nyina no. Yɛto nsa frɛ wo dɛ bra bɛsera hɛn.