Haban bi bɛn Wallkill a ɔwɔ New York no n’ekuraase. Haban no wɔ New York City n’etsifi afamu, na ofitsi hɔ dze rokɔ New York City no yɛ kilomita 145 (akwansin 90). Dɛm haban yi edzi dwuma tsitsir bi wɔ Jehovah Adasefo hɔn wiadze nyina Bible nkyerɛkyerɛ edwuma no mu. Wɔfrɛ haban yi Watchtower Farms, na wɔtɔɔ no January 2, 1963, oedzi bɔbor mfrenhyia 50.

David Walker yɛ Jehovah Adasefo no mu kor, na ɔkã ho na wɔhyɛɛ Wallkill edwumayɛ no ase. Aber a ɔrekã siantsir a wɔtɔɔ haban a odzi kan no ho asɛm no, ɔkãa dɛ: “Nna hɔn a wɔyɛ edwuma wɔ Jehovah Adasefo wiadze nyina edwumayɛbea tsir a ɔwɔ Brooklyn wɔ New York no dodow kɔ ara na ɔrokɔ enyim. Ntsi nna no ho hia dɛ yɛhwehwɛ ɔkwan a yebotum afa do ama hɔn edziban a yɛmmbɔ kaw. Sɛ nna obi fi Brooklyn rokɔ beebi a Jehovah Adasefo hɔn haban dadaw no wɔ no a, ɔbɛgye no ndɔnhwer esia kesi awɔtwe. Nna dɛm haban dadaw yi wɔ bea bi a ɔmmbɛn kurow mu wɔ New York. Naaso, nna ofi Brooklyn rokɔ Wallkill no yɛ ndɔnhwer ebien pɛ. Ntsi nna Wallkill yɛ bea a oye dɛ yebenya hɛn haban no wɔ hɔ.” Jehovah Adasefo duaa nduaba nye nduadzewa ahorow bi so wɔ haban yi mu. Nna wɔnyɛn nkokɔ, mpreko, nye anantwi so wɔ dɛm bea yi. Afei so, nna wɔyɛ merekye, kyiis, nye dza ɔkekã ho wɔ hɔ. Mber rokɔ do no, wɔyɛɛ ndzɛmba afofor so wɔ haban no mu.

Mbrɛ Jehovah Adasefo a wɔwɔ wiadze nyina no dodow bui bɔɔ ho wɔ mfe du ntamu no maa wɔyɛɛ dwumadzi tsitsir bi wɔ Wallkill. Sɛ yɛdze nduadzewa ankasa a nna wobotum etwa n’aba wɔ Wallkill hɔ no to nkyɛn a, afei wɔhyɛɛ ase dɛ woritsintsim nwoma ahorow wɔ hɔ, a nna ɔbɔboa ma wɔaayɛ asɛnkyerɛdze kwan do otwa-edwuma a Jesus kãa ho asɛm no. (Matthew 9:​37; Luke 10:2; John 4:​35, 36) Ma yensusu ndwuma ahorow a wɔayɛ no wɔ Wallkill no bi ho nhwɛ.

Nwoma Tsintsim: Wɔ afeha a ɔtɔ do 20 ne finimfin hɔ beebi no, nna wotsintsim Bible ho nwoma ahorow no mu dodowara wɔ nwoma tsintsimbea a ɔwɔ Brooklyn wɔ New York no. Naaso, aber a nna nwoma dodow a nkorɔfo hia no rokɔ n’enyim no, nna Brooklyn nwoma tsintsimbea no nntum nntsintsim nwoma dodow a wohia no bio. Ntsi wɔ afe 1973 mu no, Jehovah Adasefo sii nwoma tsintsimbea kor so wiei wɔ Wallkill. Ofitsi dɛm aber no, wɔatserɛw adan no a tsintsimbea no wɔ mu no mu mpɛn pii. Dza wɔyɛe nnkyɛree koraa no, wɔyɛɛ no wɔ mfe 2004 mu.

Kɔmpiwta Do Dwumadzi: Afe 1979 mu no, wɔmaa Jehovah Adasefo kuw bi a wɔwɔ Wallkill no hyɛɛ ase dɛ wɔreyɛ kɔmpiwta do dwumadzi bi a sesei wɔfrɛ no Multilanguage Electronic Publishing System (MEPS) no. Dɛm kɔmpiwta do dwumadzi yi ma wotum yɛ Bible ho nwoma ahorow wɔ kasa bɔbor 600 mu.

Ntsetsee: Afe 1988 mu no, woyii Ɔweɔn-Aban Gilead Bible Skuul no fii Brooklyn kɔr Wallkill, na skuul no hyɛɛ ase yɛɛ edwuma October 17. Skuul no kɔr do yɛɛ edwuma wɔ hɔ kesii dɛ, wɔ April 1995 mu no, woyii kɔr Watchtower Educational Center a ɔwɔ Patterson wɔ New York no.

Tse dɛ mbrɛ ɔkɔ do wɔ haban biara mu no, wɔ mfrenhyia eduonum a abɛsen kɔ no mu no, yɛayɛ nsesã ahorow wɔ mbrɛ yesi yɛ edwuma wɔ Watchtower Farms no mu. Ne nyinara ekyir no, yɛda ho ara robɔ mbɔdzen dɛ yɛbɛma Jehovah Adasefo a sesei wɔyɛ edwuma wɔ hɛn U.S. Bethel a ɔwɔ New York no edziban papa.

Mprɛmprɛ yi, Jehovah Adasefo risi ɔfese ahorow, adan a wɔtsena mu, nye adan afofor wɔ Wallkill. Afei so wɔreyɛ adan adadaw a ɔwɔ hɔ no fofor. Dɛm edwuma a wɔreyɛ yi nyina bɔboa ma Watchtower Farms no akɔ do dze Bible ho nwoma ahorow ama Jehovah Adasefo a hɔn dodow kɔ ara na ɔrokɔ enyim wɔ dɛm man yi mu no.

David Walker a yeedzi kan akã no ho asɛm no kãa dɛ: “Wɔ mfrenhyia 50 a abɛsen kɔ no mu no, mehu mbrɛ Wallkill adan no hyɛɛ ase ketseketse bi, na afei no mu atserɛw dɛm no. Masan so ehu mbrɛ Wallkill adan yi aboa ma yɛatserɛw Bible mu asɛmpa no mu wɔ wiadze nyina no. Iyi ama m’enyi agye ankasa!”