Fida, July 5, 2013 mu no, United States Bethel ebusua no enyi gyee ber a Anthony Morris a ɔyɛ Akwankyerɛ Kuw no munyi no maa nkaabɔ a odzi do yi: “Wɔagye ato mu dɛ yɛntɔn hɛn adan esia a 117 Adams Street nye 90 Sands Street adan akɛse a ɔwɔ Brooklyn no so kã ho. a Adan akɛse 1 kesi 5 a yɛrotɔn no hwehwɛ dɛ, onkodu bɛyɛ August finimfin wɔ afe yi mu no, ɔwɔ dɛ yetu fi mu.”

Nna ɔda edzi pefee dɛ iyi bɛyɛ edwumadzen. Adan akɛse enum yi ne kɛse tse dɛ agoprama akɛse 11 a wɔbɔ bɔɔl wɔ do! Na ndafua 60 ntamu no ɔwɔ dɛ wotu fi adan yi mu!

Wɔdze mfir a wɔdze tsintsim mbuukuu nye dza wɔdze kã mbuukuu femfam ho ayɛ edwuma mfrenhyia pii wɔ Adan akɛse 1 kesi 5 yi mu, naaso wɔ mfe 2004 mu no woyiyii mfir yi kɔr bea fofor wɔ Wallkill, New York.

Ofitsi dɛm aber no reba no, wɔdze adan yi ayɛ bea a wosiesie ndzɛmba wɔ hɔ nye adzekoradan a wɔdze adansi na ɔfese mu ndzɛmba, nye edwindadze a wɔdze boa adansi wɔ United States nye aman afofor do no gugu.

Nna nhyehyɛɛ pa a wɔbɛyɛ no ho hia na ama woeetum etu efi adan no mu wɔ mber a wɔdze ama hɔn no mu. Odzi kan no, wɔkaan ndzɛmba a ɔwɔ adan no mu na wohun dza wobotum atɔn, atow egu, nye dza wɔbɔkora do. Iyi ekyir no, wɔyɛɛ nhyehyɛɛ a odzi mu a wɔdze botu efi adan no mu.

Bethel ebusua no mufo yɛɛ edwumadzen dze boaa adzeyɛ yi. Nkyii so, wɔtoo nsa frɛɛ nyimpa 41 a wɔyɛ etuhoakyɛfo kɔr Bethel ma wɔkɔboae. Nna dɛm etuhoakyɛfo yi fi mbea ahorow wɔ United States man no mu. Hɔn mu dodowara yɛ mberantsɛ esigyafo a wɔwɔ ahoɔdzen. Wɔgyee nsato yi too mu a wɔammpopo hɔn etsir. Wogyaa hɔn ebusuafo, anyɛnkofo nye hɔn edwuma hɔ baa Bethel bedzii adapɛn esia kesi du mbrɛ ɔbɛyɛ a wobotum aboa edwuma no. Dɛm dwumadzi yi kãa hɔn dɛn?

Jordan edzi mfe 21, na ofi Washington State bae. Ɔkãa dɛ: “Muhunii a nkyɛ medze m’akwambisa krataa no baa ntsɛm kyɛɛn dɛm.”

Steven fi Texas bae, na oedzi mfe 21. Dza ɔkãe nye yi: “Metse nka dɛ mekã ebusua kɛse bi ho a no mufo fi wiadze nyina a wɔwɔ enyigye, na wɔyɛ edwumadzen so.”

Justin a oedzi mfe 23 no kyerɛɛw dɛ: “Metse nka dɛ mowɔ akomatɔyamu wɔ Bethel ha. Ɔsor nyansa, ɔdɔ nye ebusuabɔ a odzi mu wɔ Bethel no yɛ ahomka araa yie.”

Adler so edzi mfe 20, na ofi Puerto Rico bae, ɔkãa dɛ: “Nna ɔyɛ dzen ma me dɛ mobɔsoɛr ntsɛm anapa, naaso meetum enya anyɛnkofa a ɔbɛtsena hɔ dabaa.”

William a oedzi mfe 21 kãa dɛ: “Ofitsi mo mbofrase na medze ayɛ mo botae dɛ mobɔkɔ Bethel. Nna mususu dɛ mobɔtɔ mu anaadɛ mebɛyɛ ankonam, saana nnyɛ dɛm na Bethel asetsena tse koraa. Bethel ama meenya suahu a odzi mu wɔ m’asetsena mu! Biribiara nnyi hɔ a mubotum dze atoto Bethelsom ho.”

Ana edwumayɛfo no tumii dzii mber a wɔdze maa hɔn no do? Nyew, wɔdze ndafua 55 tui fir adan no mu.