Wɔhyɛɛ ase yɛɛ Borɔfo Ɔweɔn-Aban a ne ntseasee yɛ mberɛw afe kor dze sɔe hwɛɛ dɛ ɔbɔkɔ dɛn, na wɔdze July 2011 dze no na wɔdze hyɛɛ ase. Mber a wɔdze sɔe hwɛe no aba ewiei, na gyinaesi a ofii mu bae nye dɛ wɔbɔkɔ do ara ayɛ dza ne ntseasee yɛ mberɛw no.

Ofitsi January 2013 no, wɔbɛyɛ dza ne ntseasee yɛ mberɛw no bi so wɔ French, Portuguese, nye Spanish kasa mu.

Wɔyɛɛ dza ne ntseasee yɛ mberɛw no dɛ ɔmboa hɔn a wɔkɔ Borɔfo asafo nhyiamu wɔ Ahendzi Asa do naaso wɔammfa Borɔfo kasa enntwa hɔn mfunuma no.

Ofitsi aber a wɔyɛɛ dza odzi kan no, nkorɔfo akyerɛw nkrataa pii dze abɛkyerɛ ho enyisɔ. Yenyaa kor fii Rebecca a oedzi mfe 64 no hɔ, ɔwɔ Liberia, na ɔannkɔ skuul da. Ɔkyerɛɛw dɛ: “Murusũa akenkan, na ɔtɔfabi a mekenkan Ɔweɔn-Aban no, naaso menntse ase. M’enyi gye dza ne ntseasee yɛ mberɛw no ho dodow. Mekenkan a, metse ase.”

Awofo pii dze dza ne ntseasee yɛ mberɛw no roboa hɔn mba ma woeesiesie hɔnho ama Jehovah Adasefo nhyiamu no mu kor a ɔnye Ɔweɔn-Aban Adzesũa no.

Rosemary a ɔretsetse ne mbanana baasa no kyerɛɛw dɛ: “Nna Ɔweɔn-Aban a menye mbabaawa no sũa no taa yɛ asɛndzendzen ma hɛn. Nna ɔsɛ dɛ yɛdze nkasafua nkyerɛase nwoma hwehwɛ nkasafua pii ne nkyerɛase. Nna yɛgye mber pii hwehwɛ nkasafua ahorow no nkyerɛase ara ma yebowie adzesũa no, nna mbofra no nnhu adzesũa no ne tsir na ne nan. Ndaansa yi dze, yɛdze mber no hwehwɛ kyerɛwnsɛm ahorow no mu, nye mbrɛ ɔfa adzesũa no ho.”