“Mepɛ dɛ ekɔ Columbia Studios a ɔwɔ New York City no na ekɔtow hɛn ndwom no mu kor wɔ hɔ. Wɔbɛkyer ndwom no egu apaawa do. Mma nnkã dza erekɛyɛ no ho asɛm nnkyerɛ obiara.”

William Mockridge dzii dwuma a ɔyɛ dzen a onua Charles Taze Russell a dze maa no no ho dwuma wɔ afe 1913 ewiei mu hɔ. Nyimpa binom frɛ dɛm ndwom no “The Sweet By-and-By,” nna gramophone nkotsee na wotum dze bɔ ndwom no. Ekyir yi, onua William nyaa no ntsee dɛ dɛm ndwom yi na wɔdze bobue “Photo-Drama of Creation” video no ano. Nna Bible mu ɔkasa nye ndwom a wɔakyer a ɔbata mfonyin nye sene a kasa nnyi mu ho na wɔdze ayɛ dɛm video yi. Wodzii kan yii “Photo-Drama” video yi wɔ New York City wɔ January 1914 mu.

Ndwom a onua William towee no ka ndwom bɔbor 50 a nna hɔn a wokyinkyim phonograph no mfunuma no bɔ no ho wɔ mbea ahorow a woyii “Photo-Drama” video no wɔ Borɔfo kasa mu no. Nyimpa binom na wɔtoow ndwom no mu dodowara, naaso nkorkor bi a William nedze no ka ho dze, Bible Esuafo no na wɔhyehyɛe, na woyii no mu nsɛm no fii hɔn ndwom nwoma no mu kor a wɔfrɛ no Hymns of the Millennial Dawn no mu.

Jehovah Adasefo dze ndwom a hɔn a wɔnnyɛ Adasefo na wɔhyehyɛe no edzi dwuma wɔ hɔn som mu mfe pii. Sɛ no ho behia a, wɔsesa no mu nsɛm no ma ɔnye Kyerɛwnsɛm no mu ntseasee a wɔwɔ no hyia.

Dɛ nhwɛdo no, ndwom kor a wɔbɔe ber a nna woriyi “Photo-Drama” video no kitsa asɛntsir a ɔnye dɛ “Our King Is Marching On.” Woyii ndwom yi fii ndwom a wɔato dzin “Battle Hymn of the Republic” no mu. Nsɛm a odzi kan wɔ “Battle Hymn” no mu nye dɛ: “M’enyi ehu Ewuradze ne ba ho enyimnyam.” Bible Esuafo no sesaa nsɛm no ma wɔtoow no dɛ: “M’enyi botum ehu Ewuradze ne mbae ho enyimnyam.” Bible Esuafo no gye dzi dɛ Jesus Christ ne ba nye ne mbae wɔ ber pɔtsee bi mu no ka tum a obedzi no ho. Nsesa a wɔyɛe wɔ ndwom no mu no daa dɛm ntseasee yi edzi.​—Matthew 24:3.

Ber a wotsintsiim nwoma a wɔato dzin Singing and Accompanying Yourselves With Music in Your Hearts wɔ afe 1966 mu no, woyiyii ndwom a wonyae fii ɔsom afofor mu nye dza hɔn a wɔnnyɛ Adasefo na wɔhyehyɛe no nyina fii mu. Wɔ dɛm afe no mu ara no, Jehovah Adasefo hyehyɛɛ asankubɔfo ma wotwaa ndwom nwoma no mu ndwom 119 no nyina. Asafo ahorow no dze ndwom a woetwa no dzii dwuma wɔ hɔn nhyiamu ase, na Adasefo binom so dze enyigye bɔɔ ndwom yi bi wɔ hɔn efi mu.

Afe 2009 mu no, Jehovah Adasefo tsintsiim ndwom nwoma fofor a wɔato dzin Sing to Jehovah (Tow Ndwom Ma Jehovah). Wɔakyer no mu nsɛm a wɔdze ndze atow no egu apaawa do wɔ kasa pii mu. Jehovah Adasefo hyɛɛ ase twaa ndwom ahorow a wɔayɛ no video maa mbofra wɔ afe 2013 mu. Ndwom no mu kor n’asɛntsir nye dɛ Pray Anytime (Bɔ Mpaa Aber Biara). Hɔn a wɔkɔ jw.org wɛbsaet no do tum twe ndwom ahorow ɔpepem pii bosoom biara.

Nyimpa pii akyerɛ ndwom ahorow yi ho enyisɔ. Ɔbaa bi a wɔfrɛ no Julie kyerɛɛw asɛm bi faa Sing to Jehovah (Tow Ndwom Ma Jehovah) ho dɛ: “Ndwom a wɔayɛ no fofor yi yɛ dɛw papa! Sɛ metse ankonamyɛ nka a, mobɔ ndwom no mu dza ɔda mbrɛ metse nka wɔ m’akoma mu no edzi. Dza efi mu aba nye dɛ, menye Jehovah ntamu anyɛnkofa no mu ayɛ dzen, na mesi nketse dɛ medze m’akoma nyina bɔsom no.”

Video a wɔato dzin Pray Anytime (Bɔ Mpaa Aber Biara) no enya maame bi a wɔfrɛ no Heather ne mba a woedzi mfe esuon nye akron no do tum. Maame yi kyerɛɛw dɛ, “Ndwom no aboa hɔn ma woehu dɛ nnyɛ anapa anaa aber a wɔnye hɛn wɔ hɔ nko na wobotum abɔ mpaa, na mbom ber biara a wɔtse nka dɛ wɔnye Jehovah bɛkasa so.”