“Ɔkã akoma, okenyan adwen, na tum wɔ mu.”

“Ɔma Bible akenkan no mu nsɛm no yɛ dɛ dza orisi ankasa.”

“Okenyan akoma! Mbrɛana mehu Bible mu nsɛm a matse no mpɛn pii no enyiwa do yie a.”

Iyinom nye nsɛm a nkorɔfo kekãe aber a wotsiee Bible akenkan a ɔnye Matthew wɔ Borɔfo mu a wɔdze egu jw.org wɛbsaet yi do no.

Jehovah Adasefo hyɛɛ ase dɛ wɔreyɛ hɔn Bible akenkan a wɔbɔ tsie a odzi kan no wɔ afe 1978 mu. Mber rokɔ do no, wɔyɛɛ dɛm Bible akenkan a wɔbɔ tsie no ne fã anaa mu no nyinara wɔ kasa ahorow 20 mu.

Aber a woyii New World Translation fofor no edzi wɔ mfe 2013 mu no, nna no ho ebehia dɛ wɔyɛ Bible akenkan a wɔbɔ tsie no fofor. Akenkamfo ebiasa na wɔdze hɔn yɛɛ Bible akenkan a wɔbɔ tsie dadaw no. Naaso wɔ fofor yi mu dze, nyimpa bɔbor 1,000 a wɔwɔ Bible no mu no, wɔafa akenkamfo asorɔtow ama no mu biara.

Sɛ yenya ɔkenkamfo ma nyimpa biara a wɔwɔ Bible no mu no a, ɔboa etsiefo no ma wotwa nsɛm a osisii wɔ Bible no mu no ho mfonyin. Ɔwɔ mu dɛ wɔnnyɛɛ dɛm Bible akenkan yi tse dɛ drama dze, kyerɛ dɛ wɔmmfaa ndwom na dza ɔkekã ho nnhyehyɛɛ mu dze, naaso otum ma asɛm no yɛ dɛ gyama ogu do risi.

Edwuma a akenkamfo pii wɔ mu dɛm no, ɔgye nhyehyɛɛ pa. Odzi kan no, ɔsɛ dɛ nhwehwɛmufo tum hu nyimpa pɔtsee biara a ɔrekasa wɔ Bible no mu no, dza asɛm biara kyerɛ, nye nkãtse a ɔsɛ dɛ ɔda edzi. Dɛ nhwɛdo no, sɛ wɔfa ɔsomafo bi n’anomu asɛm bi kã, na wɔammbɔ ne dzin a, woana ne ndze na wɔmfa ndzi dwuma? Sɛ asɛm no kyerɛ obi a oridzi kyim a, wotum dze ma Thomas; na sɛ ɔkyerɛ obi a ɔper noho so a, wotum dze ma Peter.

Wosusu nyia wɔabɔ ne dzin no ne mfe a oedzi so ho. Sɛ ɔsomafo John rekasa wɔ ne mberantsɛber mu a, wɔdze aberantsɛ ndze dzi dwuma; naaso sɛ ɔsomafo John rekasa wɔ ne nkɔkoraber mu a, wɔdze akɔkora ndze dzi dwuma.

Bio so, nna ohia dɛ wɔpɛ akenkamfo pa. Wɔpaw hɔn mu pii fi Jehovah Adasefo edwumayɛbea nkorbata a ɔwɔ United States no. Wodzi kan dze Awake! magazine bi no mu nsɛm ma akenkamfo a wɔbɔ mbɔdzen ma wokosũa, na afei wɔbɛkenkan ma wɔdze sɔ hɔn hwɛ. Afei so, wɔma wɔkenkan Bible ne fã bi a ɔyɛ nkɔmbɔtwetwe na nkãtse bi tse dɛ ebufuw, awerɛhow, enyigye anaa abagura wɔ mu. Dɛm nsɔhwɛ yi ma wotum hwehwɛ akenkamfo no hɔn mbɔdzembɔ mu hwɛ, na wohu akenkan pɔtsee bi a ɔbɛfata obi.

Sɛ wɔkyekyɛ akenkan no ma akenkamfo no wie a, akenkamfo no ba hɛn ɔfese a wɔkyer ndze wɔ mu no mu bi wɔ Brooklyn anaa Patterson, na wɔbɛkenkan hɔn fã no ma wɔkyer hɔn ndze. Obi wɔ hɔ a ɔhwɛ hu dɛ ɔkenkamfo no kenkan adze no yie, nkãtse ba mu, na ne ndze mu da hɔ. Dɛm nyimpa yi nye ɔkenkamfo no nyinara kitsa akwankyerɛ bi a ɔma wohu beebi a ɔsɛ dɛ wogyina, nye beebi a ɔsɛ dɛ wosi nsɛm do dua. Nyia ɔhwɛ dɛ akenkan no kɔ do pɛpɛɛpɛr no dze New World Translation dadaw no a wɔbɔ tsie no so yɛ nsusudo.

Aber a wɔrekyer ndze no wɔ ɔfese hɔ no, wɔtsentsen ndze no bi. Mbrɛ ɔbɛyɛ ma woeenya biribiara kama no, ɔtɔ ber bi a, hɔn a wɔkyer ndze no tum kekã nkasafua anaa nsɛmfua bi a wɔakyer bɔ mu ama woeenya akenkan mu.

Yennkotum akyerɛ mber tsentsen a ɔbɛgye ma yeewie mfe 2013 New World Translation akenkan a wɔbɔ tsie no nyinara. Naaso sɛ wowie Bible mu nwoma biara a, wɔdze bogu jw.org wɛbsaet yi do, na ibohu biribi wɔ dɛm Bible mu nwoma no ne dzin ho a ɔkyerɛ dɛ ɔyɛ dza wɔbɔ tsie, wɔ ɔfã a wɔato dzin “Books of the Bible” no.