October 7, 2013 mu no, Jehovah Adasefo daa abaɛfor adzeyɛ bi a wɔdze sũa Bible wɔ mobal fon do no edzi. Wɔfrɛ dɛm abaɛfor adzeyɛ yi JW Library app. Dɛm Bible app yi a bo biara nnda do yi ma obi nya Bible ahorow esia wɔ Borɔfo kasa mu. King James Version nye New World Translation of the Holy Scriptures, mfe 2013 dze no kã Bible ahorow yi ho. a

Nyimpa ɔpepem pii dze smart fon ahorow, tablets, anaa mfir a ɔtsetse dɛm dzi nkitaho, na wɔdze yɛ hɔn ndwuma. Dadaada yi, nyimpa dodow a wokitsa mobal fon tum nya ndzɛmba wɔ jw.org do a ɔboa hɔn ma wosũa Bible no. Sɛ dɛm a, ebɛnadze ntsi na wɔyɛɛ JW Library app no?

Odzi kan, sɛ obi dze app no gu no fon do a, onnhia Intanɛt ana oetum dze app no edzi dwuma. Otsĩa ebien, wɔyɛe mbrɛ ɔbɛyɛ a ɔbɛyɛ mberɛw koraa ama obi dɛ ɔbɔhwehwɛ kyerɛwnsɛm no, na oeesũa Bible no yie. Ebɛn kwan do na otum yɛ yie dɛm?

Sɛ ibue JW Library no ber a odzi kan a, dza odzi kan ba nye nwoma ahorow a ɔkã bɔ mu yɛ Bible no. Sɛ efa nwoma ahorow yi mu kor a, dza ibohu nye etsir a ɔwɔ nwoma no mu. Iyi ma itum hu nyiyimu a epɛ anaa asɛm bi a erohwehwɛ wɔ dɛm tsir no mu a emmberɛ ho koraa. Dɛm app yi ma inya nsɛm afofor pii a ɔma Bible no sũa yɛ mberɛw:

• Ase hɔ nsɛm ma ihu mbrɛ woesi akã asɛm no wɔ kwan fofor do nye nsɛm afofor a ɔfa ho

• Kyerɛwnsɛm afofor a ɔnye nyiyimu no hyia

• Ɔfã bi so ma itum hu mpɛn dodow a wɔdze kasafua anaa asɛmfua bi edzi dwuma

• Wɔabɔ Bible mu nwoma biara no mu nsɛm no tɔw wɔ nwoma no ahyɛse

• Wɔayɛ nhyehyɛɛ pon a ɔma ihu Bible mu nwoma biara ne kyerɛwfo, ber na bea a wɔkyerɛwee, nye mber pɔtsee a ɔkã ho asɛm

• Map, nhyehyɛɛ pon, mberbu nye mfonyin afofor pii a ɔyɛ fɛw

Mbrɛ Jehovah Adasefo nwoma nyinara tse no, dɛmara so na JW Library no tse, wɔdze ma kwa a bo biara nnda do. Ntoboa a nkorɔfo fi hɔn pɛ mu yi na wɔdze yɛ dɛm Bible app a bo biara nnda do yi ho edwuma. Nkorɔfo atwe dɛm app yi bɔbor ɔpepem kor dada. (2 Corinthfo 9:7) Ebɛnadze ntsi na wankasa ntwe bi mfa na eehu mfaso a ɔwɔ nwomakorabew soronko a ibotum dze akɔ beebiara yi do?