Ansaana ebɛkra Enyifurafo Bible (Braille) efi Jehovah Adasefo hɔ no, hwɛ hu dɛ ewɔ no ho dan wɔ hɔ. New World Translation Bible mu no nyina​—a wɔayɛ no wɔ Borɔfo, Spanish, nye Italian Enyifurae kasa (Braille) ahorow mu​—no wɔ afã ahorow 18 rokɔ 28, na obehia adaka a annyɛ yie koraa no ne tsentsen bɛyɛ mita ebien (6 ft 5 in)!

Yɛwɔ enyifurafo nwoma ahorow bi so a ɔnodze ɔnngye kwan kɛse tse dɛ Bible a woekrukye no. Tse dɛ dza wɔfrɛ no Braille note takers no, onyifuranyi no botum emia biribi ma nsɛmfua no amema do na asan akɔ famu ama oeetum akyerɛw ne nsɛm, na ɔaakenkan nsɛm a wɔakyerɛw dadaw no. Enyifurafo botum dze dza wɔfrɛ no screen readers no so edzi dwuma dze ahwehwɛ nwoma bi na wɔaabɔ no mu nsɛm no etsie.

Afei so, Adasefo no ayɛ kɔmpiwta do dwumadzi bi a otum sesã akyerɛw kɔ enyifurafo kasa (Braille) ahorow pii mu. Wodzi kan yɛ adakaba bi wɔ kɔmpiwta do. Na wɔhyehyɛ kasa pɔtsẽe bi no mu nsɛm a wɔpɛ dɛ wɔsesã no nye Braille akyerɛw no wɔ adakaba no mu. Afei, kɔmpiwta do dwumadzi yi ma nsɛm no dan dɛm kasa no n’enyifurafo kasa. Ɔsan so yɛ nwoma no wɔ ɔkwan bi do a ɔma ne kenkan no yɛ mberɛw ma enyifurafo no. Dɛm kwan yi a wɔfa do ma kɔmpiwta yɛ edwuma a nkyɛ ɔsɛ dɛ nyimpa yɛ yi boa ma wɔyɛ Braille nwoma ahorow wɔ kasa biara a ɔwɔ Braille akyerɛw no mu, a Braille Bible mpo kã ho. Na kasa ahorow a wonnyi dza wɔfrɛ no Roman akyerɛw no mpo kã ho.

Bɔbor mfe 100 nye yi no, Jehovah Adasefo ayɛ Bible ho nwoma ahorow ama enyifurafo wɔ kasa ahorow 19 mu. Ɔwɔ mu dɛ hɔn a hɔn enyi gye ho no botum enya nwoma ahorow yi bi a bo biara nnda do dze, naaso nyimpa pii fi hɔn pɛ mu yi ho ntoboa.

Mber bi a abɛsen kɔ no, nna sɛ woyi nwoma fofor bi edzi wɔ Jehovah Adasefo ehyiadzi ase a, wɔkã kyerɛ etsiefo no dɛ wobotum akra Braille dze no ekyir yi. Naaso wɔ afe 2011 no, United States edwumayɛbea nkorbata no yɛɛ nhwehwɛmu wɔ asafo ahorow no mu hwɛe dɛ ebɛn ehyiadzi ahorow na enyifurafo bɔkɔ bi, na enyifurafo nwoma bɛn (embossed paper, electronic note taker, anaa electronic screen reader) na hɔn enyi bɛgye ho.

Wɔdze enyifurafo nwoma ahorow no monaa ehyiadzi mbea ahorow a enyifurafo bɔkɔ hɔ no, na iyi maa enyifurafo no nye etsiefo nkaa no nyinara nyaa hɔn nwoma no wɔ ber kor mu. Aber a onyifuranyi biara ewie n’ehyiadzi wɔ dapɛn kor ekyir no, wɔdze elɛtrɔnik dze fa e-mail do mona no.

Ɔdasefo bi a n’enyi efura kãa dɛ: “Nna ɔyɛ ho kwan kɛse ma me dɛ menye obiara benya nwoma no abɔ mu. Ndwom 37:4 kã dɛ Jehovah bɛma hɛn hɛn akoma n’ebisadze. Na ɔayɛ dɛm dapɛn ewiei a otwaa mu yi!” Ɔfofor so hyɛɛ ase dɛ orusũ, na ɔkãa dɛ: “Nna wɔredwen mo ho paa. Yɛda Jehovah ase dɛ wɔrohwɛ hɛn do yie.”