Mbrɛ ɔbɛyɛ a nyimpa pii benya Bible a n’ekyir yɛ dzen nye deluxe Bible no, Jehovah Adasefo ahyehyɛ efir fofor wɔ beebi a wotsintsim hɔn nwoma ahorow wɔ Ebina, Japan.

Asaasewosow nye tsunami a osii wɔ Japan wɔ March 11, 2011 no maa wodunduum kandzea wɔ ɔman no mu. Iyi bɛyɛɛ nsɛndzendzen maa Adasefo no wɔ dwuma a nna wɔpɛ dɛ wodzi yi ho.

Ɔmmfa ho ɔhaw kɛse a wohyiae no, wɔhyɛɛ dwumadzi yi ase wɔ September 2011 mu. Bɛyɛ abosoom ebiasa ntamu no, wodzii kan dze efir fofor yi tsintsiim New World Translation Bible no wɔ Chinese kasa mu.

Efir fofor yi ne tsentsen yɛ bɛyɛ mita 400 (anamɔn 1,312). Efir yi tsintsim Bible, ɔkeka si enyi, ɔdze n’ekyir dura ho, omiamia do, na ɔhyehyɛ gu ndaka ahorow mu. Iyi ekyir no wɔsɔw ndaka no ano na wɔhyehyɛ gu pallet ahorow do.

Nhyehyɛɛ pa nye koryɛ kã ho bi na ɔmaa dwumadzi no kɔr do yie no. Dɛ nhwɛdo no, nna ɔsɛ dɛ wɔdze efir no ho ndzɛmba gu ndaka mu, wɔsɔw ano, na wɔdze gu kɔnteena 34 mu na wɔdze fa po do fi Europe dze kɔ Japan.

Enuanom du a wɔwɔ United States Jehovah Adasefo edwumayɛbea hɔ no tuu kwan kɔr Japan kɔboae ma wɔhyehyɛɛ efir no. Binom tsenaa hɔ abosoom esia, na wɔkyerɛkyerɛɛ enuanom a wɔwɔ Japan mbrɛ wobesi dze efir no ayɛ edwuma, na wɔaahwɛ do yie.

Efir fofor yi maa edwumakuw ahorow a wotsintsim nwoma wɔ Japan no ho boow hɔn. Wɔ March 19, 2012 no, edwumakuw no mu nyimpa bɔbor ɔha bae bɔhwɛɛ efir fofor a wɔdze tsintsim Bible yi, na ɔkaa hɔn akoma yie.

Wɔmaa obiara New World Translation Bible a wɔdze efir fofor yi etsintsim no kor ma ɔdze kɔr fie.

Japan edwumayɛbea no abɛkã hɛn edwumayɛbea a ɔwɔ United States nye Brazil no ho ma woritsintsim Bible ahorow a n’ekyir yɛ dzen ama Jehovah Adasefo a wɔwɔ wiadze nyina no.

Adasefo nye hɔn a wofi ndwumakuw afofor mu a wɔboae ma wɔhyehyɛɛ efir no dze enyigye bɔɔ mu yɛɛ edwuma. Odwumayɛnyi kor a ɔnnyɛ Ɔdasefo no kãa dɛ: “Hom abɛyɛ tse dɛ m’ebusuafo.”

Da a odzi ewiei wɔ dwumadzi no ase no, odwumayɛnyi fofor a ɔno so nnyɛ Ɔdasefo kãa dɛ: “Edwuma a odzi hɔ a mebɛyɛ no bɛyɛ dzen papaapa ama me, osiandɛ ɔnnkɛyɛ dɛw tse dɛ mbrɛ Watchtowerfo dze tse no!”