Estonia Enya “Nkɔenyim Soronko Bi”

BƆ

Wɔ mfe 2014 mu no, wɔpaaw New World Translation of the Holy Scriptures a wɔayɛ no wɔ Estonian kasa mu no dɛ, ɔfata dɛ onya Kasa a Wɔdze Edzi Dwuma Yie wɔ Afe no mu ho Abawdobɔdze (Language Deed of the Year Award) no bi wɔ Estonia. Wɔ ndzɛmba 18 a wɔpawee no mu no, New World Translation of the Holy Scriptures no na ɔtɔɔ do ebiasa aber a wɔtoow aba no.

Wɔpaaw dɛm Bible nkyerɛase fofor yi a woyii no edzi wɔ August 8, 2014 mu no dɛ, ɔfata dɛ onya abawdobɔdze a kasa ho ɔbemfo Kristiina Ross a ɔwɔ Institute of the Estonian Language no dze mae no. Ɔkãa New World Translation no ho asɛm dɛ “ne kenkan yɛ mberɛw na ɔyɛ dɛw so.” Ɔdze kãa ho dɛ: “Edwumadzen a wɔyɛe dze yɛɛ dɛm Bible yi no ama Estonian kasa asekyerɛ edwuma no enya nkɔenyim kɛse.” Rein Veidemann a ɔyɛ Estonia nwoma nye amambra ho ɔbemfo no frɛɛ nkyerɛase fofor yi dɛ ɔyɛ “nkɔenyim soronko bi.”

Wodzii kan tsintsiim Bible mu no nyinara wɔ Estonian kasa mu wɔ afe 1739 mu, na ofitsi dɛm aber no wɔayɛ nkyerɛase afofor so pii wɔ dɛm kasa yi mu. Sɛ dɛm dze a, ebɛnadze ntsi na New World Translation no yɛ “nkɔenyim soronko bi”?

Wɔakyerɛ ase pɛpɛɛpɛr. Wɔ Estonian Bible bi a wɔagye dzin a wotsintsiim no wɔ afe 1988 mu no mu no, wɔabɔ mbɔdzen akyerɛ Nyankopɔn ne dzin no ase dɛ “Jehoova” (Jehovah) bɔbor mpɛn 6,800 wɔ Hebrew Kyerɛwnsɛm (Ahyɛmu Dadaw) no mu. a New World Translation wɔ Estonian kasa mu no so yɛ dɛmara nye dza ɔbor dɛm mpo. New World Translation no dze Nyankopɔn ne dzin no dzi dwuma so wɔ Christianfo Greek Kyerɛwnsɛm (Ahyɛmu Fofor) no mu wɔ mbea ahorow a ngyinado wɔ hɔ dɛ opue hɔ no.

No mu da hɔ. Aso wɔakyerɛ New World Translation no ase pɛpɛɛpɛr ma no mu so san da hɔ anaa? Bible asekyerɛnyi Toomas Paul a wobu no yie no kyerɛwee faa New World Translation no ho wɔ Eesti Kirik (Church of Estonia) dawurbɔ krataa no mu dɛ, “wɔakyerɛ ase pɛpɛɛpɛr akɔ Estonian kasa mu ma no mu so ada hɔ.” Ɔdze kãa ho dɛ: “Mubotum akã no kofee dɛ iyi nye ber a odzi kan a obi etum edu dɛm botae yi ho.”

Worinya Estonian nkyerɛase no do mfaso

Mbrɛ Estoniafo no sii yɛɛ hɔn adze wɔ New World Translation no ho no yɛ ahobow ankasa. Ɔman no ne redio stehyɛn bi hyɛɛ da dze minitsi 40 yɛɛ dwumadzi bi maa dɛm Bible fofor yi. Asɔfo na asɔrmba pii nye Jehovah Adasefo edzi nkitaho dɛ wɔpɛ Bible fofor yi bi. Skuul bi a ɔwɔ Tallinn a wɔagye dzin yie no serɛɛ dɛ, wɔmma hɔn New World Translation no dodow 20 ma wɔmfa ndzi dwuma wɔ hɔn adzesua kor bi mu. Estoniafo enyi gye nwoma ho paa, na Jehovah Adasefo so enyi agye dɛ wɔakyerɛ nwoma a ɔsen biara ase pɛpɛɛpɛr ma no mu so ada hɔ akɔ Estonian kasa mu.

a Aber a Ain Riistan a ɔyɛ eguamutsenanyi ma Ahyɛmu Fofor ho Adzesua wɔ University of Tartu, kyerɛɛ mbrɛ ɔyɛe a Estoniafo hyɛɛ ase dɛ wɔrobɔ Nyankopɔn ne dzin no dɛ “Jehoova” wiei no, ɔdze n’asɛm no baa ewiei dɛ: “Mususu dɛ dɛm kasafua Jehoova no fata yie paa ndɛ. Ɔmmfa ho beebi a dzin no fi no, ɔdze . . . ntseasee a no mu dɔ na no ho hia paa abrɛ mbusuasantsen pii—Jehoova yɛ Nyankopɔn a ɔsomaa ne Ba ma ɔbɛgyee adasamba nkwa no ne dzin.”