Wɔ Mexico nye Central America no, kasa asekyerɛfo bɛyɛ 290 a wɔwowɔ aman esia do kyerɛ Bible ho nwoma ahorow ase kɔ kasa bɔbor 60 mu. Ebɛnadze ntsi wɔyɛ dɛm edwumadzen yi? Siantsir nye dɛ, sɛ nkorɔfo nsa kã Bible ho nwoma ahorow wɔ kasa wɔtse ase yie no mu a, nna obotum akã hɔn akoma paa.​—1 Corinthfo 14:9.

Mbrɛ ɔbɛyɛ ma kasa asekyerɛ edwuma no etu mpon no, wɔama kasa asekyerɛfo bi a nna wɔyɛ edwuma wɔ Jehovah Adasefo edwumayɛbea nkorbata a ɔwɔ Mexico City no etu akɔ mbea a wɔkã hɔn kasaa no. Ebɛn kwan do na iyi aboa? Kasa asekyerɛfo no nye kurow no mufo a wɔkã kasa a wɔreyɛ ho edwuma no nya nkitahodzi kɛse. Na iyi ma ɔyɛ mberɛw dɛ wɔbɛkyerɛ nwoma ahorow no ase akɔ kasa a n’ase tse nnyɛ dzen koraa mu.

Kasa asekyerɛfo no tse nkã dɛn wɔ dɛm nsesã yi ho? Federico a ɔkyerɛ nwoma ase kɔ Guerrero Nahuatl kasa mu no kã dɛ: “Wɔ mfe du a medze tsenaa Mexico City no nyinara mu no, ebusua kortsee na muhun dɛ wɔrekã me kasaa no bi. Naaso seseiara dze, ɔtse dɛ ma obiara kã kasa no bi wɔ nkurow a ɔbembɛn hɛn kasa asekyerɛ edwumayɛbea no!”

Karin a ɔkyerɛ nwoma ase kɔ Low German kasa mu wɔ edwumayɛbea a ɔwɔ Mexico kurow bi a wɔfrɛ no Chihuahua no kã dɛ: “Mennonfo a menye hɔn tse kurow kor mu no aboa me ma minyim mbrɛ mprɛmprɛ hɔn kasaa a wɔkã no tse. Yɛtse kurow ketseaba bi mu, na ha ara so na yɛyɛ edwuma yi. Sɛ moto m’enyiwa hwɛ ntokura mu a, mutum hu nkorɔfo a wobenya kasa asekyerɛ edwuma a yɛreyɛ no do mfaso no.”

Neyfi, a seseiara ɔtse bea a wɔkyerɛ kasa ase wɔ Mérida a ɔwɔ Mexico no kã dɛ: “Sɛ yɛyɛ Bible adzesũa wɔ Maya kasa mu a, ɔma yehu nkasafua a n’ase tse yɛ dzen ma nkorɔfo a wɔkã Maya no. Ntsi aber a yɛrekyerɛ kasa no ase no, yɛhwehwɛ mbrɛ yɛbɛkyerɛ dɛm nkasafua no ase wɔ akwan a ɔyɛ mberɛw dɛ wɔbɛtse ase no do.”

Ebɛn mfaso na hɔn a hɔn nsa kã nwoma a wɔakyerɛ ase no nya? Susũ nhwɛdo kor pɛr yi ho: Kasa a wɔdze twaa Elena no funuma nye Tlapanec, na ɔdze mfe bɛyɛ 40 na akɔ Jehovah Adasefo nhyiamu ahorow ase daa. Naaso nna ɔnntse dza wɔkã wɔ nhyiamu ahorow no ase, osiandɛ nna wɔyɛ no wɔ Spanish kasa mu. Ɔkãa dɛ, “Nna ma minyim ara nye dɛ, mepɛ dɛ mokɔ asafo nhyiamu ahorow no ase kɛkɛ.” Aber a Elena dze nwomaba ahorow a ɔwɔ Tlapanec kasa mu no sũaa Bible no ekyir no, ɔdɔ a ɔwɔ ma Nyankopɔn no yɛɛ kɛse ara ma ohyiraa noho do maa Jehovah na wonumaa no wɔ 2013. Elena se, “Meda Jehovah ase dɛ ɔaboa me ma matse Bible no ase.”