Mfonyin ahorow a ɔyɛ fɛw pii wɔ Jehovah Adasefo hɔn nwoma ahorow nye dza ɔkã ho no mu, na iyi ma nsɛm a yɛakyerɛw no mu da hɔ. Naaso mber bi a abɛsɛn kɔ no, nna ɔnntse dɛm. Nna mfonyin nnyi Zion’s Watch Tower a wodzii kan yɛe wɔ afe 1879 mu no mu. Wɔ mfe pii a abɛsen kɔ mu no, nna mfonyin nkorkor bi pɛr na ɔwɔ hɛn nwoma ahorow no mu, na ɔno mpo no, nna kɔla nntaa nnyi mu.

Sesei dze, mfonyin ahorow pii wɔ hɛn nwoma ahorow nye dza ɔkã ho no mu. Yɛwɔ hɛnankasa hɛn mfonyintwafo nye hɔn a wɔdorɔw. Iyinom na wɔyɛ mfonyin ahorow a yehu no wɔ hɛn nwoma ahorow nye wɛbsaet no do no mu dodowara. Ɔgye nhwehwɛmu a ɔkɔ ekyir na yeetum ayɛ mfonyin ahorow a ɔkyerɛkyerɛ abakɔsɛm nye Bible mu nokwasɛm a no ho hia mu.

Dɛ nhwɛdo no, hwɛ mfonyin a ɔwɔ nkyɛn ha yi. Opue wɔ buukuu a wɔato dzin “Bearing Thorough Witness About God’s Kingdom” no ne tsir 19 mu. Asɛm a ɔwɔ mfonyin no mu no sii wɔ tsetse Corinth. Bible mu nwoma a ɔnye Asomafo Ndwuma no ne tsir 18 kyerɛkyerɛ mu dɛ, wɔdze ɔsomafo Paul kegyinaa dza wɔfrɛ no bema anaa asɛndzii egua no enyim. Nhwehwɛmufo nam famututu ho ndzɛmba do yɛɛ nhwehwɛmu, na wohun mbrɛ nna asɛndzii dan a wɔdze marble esi a Paul kegyinaa enyim wɔ Gallio enyim no tse, no kɔla nye beebi a nna osi. Afei, wɔdze nhwehwɛmu a wɔyɛe no ho nsɛm maa hɔn a wɔdorɔw no. Bio so, nhwehwɛmufo no maa hɔn a wɔdorɔw no hun mbrɛ nna asomafo no aber do Romefo no ntarhyɛ tse, na ama wɔaadorɔw ambrado Gallio a ogyina mfinimfin hɔ no dɛ obi a ɔhyɛ ahentar. Ɔhyɛ ntar ebien, kor yɛ sortar. Afei, dza ɔhyɛ wɔ do no yɛ atar huu bi a wɔdze kɔla a ɔyɛ serdaa ato ano. Ɔsan so hyɛ mpaboa bi a wɔfrɛ no calcei. Nhwehwɛmufo no bohun dɛ, obotum aba dɛ sɛ Gallio gyina bema no do a, n’enyim kyerɛ anee-etsifi afamu. Iyi maa nyia ɔdorɔwee no hun mbrɛ ɔsɛ dɛ mfonyin no yɛ.

Yɛhyehyɛ nhwehwɛmu biara a yɛyɛe nye no ho mfonyin a yɛdorɔwee no gu hɔ, na ama yaasan dze edzi dwuma bio. Wɔ mfe pii a abɛsen kɔ mu no, nna yɛdze mfonyin ahorow a yɛayɛ no hyehyɛ nduraho (envelope) mu, na yɛkyerɛw nwoma kor a opuei wɔ mu no ne dzin wɔ do. Nna wɔhwɛ asɛntsitsir a mfonyin no kã ho asɛm no na wɔdze hyehyɛ gu hɔ. Aber a nna mfonyin yi a wɔahyehyɛ no rodɔɔ sõ no, afei dze nna mfonyin no bi no hwehwɛ abɛyɛ dzen.

Afe 1991 mu no, yɛyɛɛ kɔmpiwta do dwumadzi bi a ɔkora hɛn mfonyin ahorow no do ma hɛn. Wɔfrɛ dɛm kɔmpiwta do dwumadzi yi Image Services System. Mprɛmprɛ yi, ɔakora mfonyin ahorow bɔbor 440,000 do. Sɛ yɛdze mfonyin ahorow a yɛdze edzi dwuma wɔ hɛn nwoma ahorow mu no to nkyɛn a, dɛm kɔmpiwta do dwumadzi yi kora mfonyin afofor mpempem pii so do ama yɛdze eedzi dwuma wɔ hɛn nwoma nye dza ɔkã ho a yɛbɛyɛ no daakye no mu.

Dɛm kɔmpiwta do dwumadzi yi kora mfonyin no ho nsɛm pii do. Dza ɔkora do no bi nye: ber a wɔyɛɛ mfonyin no, nwoma anaa adze pɔtsee a wɔdze mfonyin no dzii dwuma wɔ mu, adze biara a ɔwɔ mfonyin no mu no ne dzin, nye ber pɔtsee a mfonyin no rekã ho asɛm. Sesei dze, sɛ yɛrohwehwɛ mfonyin dze ayɛ nwoma fofor bi a yɛreyɛ a, yɛmmberɛ ho koraa, na iyi aboa hɛn papaapa.

Ɔtɔfabi a yetua mfonyin ahorow a yɛgye fi mfonyin eguadzibea no no ho kaw. Dɛ nhwɛdo no, bi a yehia ekyin-woraba a wɔfrɛ no Saturn no ho mfonyin bi dze akã hɛn Awake! no mu asɛm bi ho. Hɔn a wɔhwehwɛ mfonyin ma hɛn no botum ehu mfonyin bi a ɔfata wɔ beebi, ntsi yɛnye mfonyin no wura no bedzi nkitaho dɛ yɛpɛ dɛ yɛdze no mfonyin no dzi dwuma. Sɛ ɔba no dɛm a, binom dze ma hɛn kwa dze kyerɛ enyisɔ ma hɛn wiadze nyina Bible nkyerɛkyerɛ edwuma no. Afofor so dze, wɔma yetua ho kaw anaa yɛkyerɛw hɔn dzin dɛ hɔn na wɔdze mfonyin no maa hɛn. Sɛ yɛnye mfonyin no wuranom wie mfonyin no ho asɛm kã a, nna yɛdze edzi dwuma wɔ hɛn nwoma anaa adze pɔtsee a yɛpɛ dɛ yɛdze dzi dwuma wɔ mu no mu. Yɛsan so kora mfonyin no do wɔ kɔmpiwta do.

Ndɛ, mfonyin pii wowɔ hɛn nwoma nye dza ɔkã ho no mu. Dɛ nhwɛdo no, wɔ hɛn Borɔfo wɛbsaet no do no, ibohu ɔfã bi a wɔato dzin Illustrated Bible Stories; afei so yeetsintsim nwomaba ahorow a mfonyin a ɔyɛ fɛw pii wɔ mu a bi so wɔ hɛn wɛbsaet yi do, tse dɛ Tsie Nyankopɔn nwomaba no. Nwomaba ahorow yi dze nsɛmfua kakraabi kyerɛkyerɛ nsɛm etsitsir pii mu. Dɛm nwoma ahorow yi nye hɛn ndzɛmba a aka nyinara, dza yetsintsim o, dza ɔwɔ intanɛt do o, ne nyinara twe adwen si Bible no do.