Jesus kãa dɛ wɔbɛkã Ahendzi no ho asɛmpa akyerɛ nkorɔfo wɔ asaase nyina do. (Matthew 24:14) Ofitsi afe 1909 reba no, Jehovah Adasefo akyerɛ hɔn Christianfo nwoma ahorow a wotsintsim no ase akɔ Spanish kasa mu, na iyi boa nyimpa a wɔwɔ wiadze nyina ma wɔtse Ahendzi no ho asɛmpa no wɔ kasa a wɔdze twaa hɔn mfunuma mu. Wɔ wiadze nyina no, kasa a wɔdze twaa nyimpa dodowara mfunuma nye Chinese kasa, na Spanish kasa na otsĩa ebien. Nyimpa a wɔkã Spanish kasa wɔ wiadze nyina dodow yɛ bɛyɛ ɔpepem ahaenum.

William kã Spanish kasa asekyerɛ kuw no ho, na dza ɔkã nye dɛ, “Spanish yɛ kasa a wɔkã wɔ aman ahorow pii do a hɔn amambra gu ahorow. Hɛn botae nye dɛ yɛbɛkyerɛ kasa ase yie mbrɛ ɔbɛyɛ a ɔbɛkã akenkamfo a ɔsor aman a wofi mu, hɔn nwomasua, nye hɔn gyinabew no akoma.” Mbrɛ ɔbɛyɛ a yebotum akyerɛ kasa ase yie ma akenkamfo a wogu ahorow yi aatse ase no, Adasefo a wofi aman tse dɛ Argentina, Colombia, El Salvador, Guatemala, Mexico, Puerto Rico, United States, Uruguay, Venezuela, nye hɔn a wofi Spain ankasa na wɔdze hɔn ayɛ kasa asekyerɛ kuw no mufo.

Mfe pii a etwa mu no, nna Jehovah Adasefo kyerɛ nwoma ase kɔ Spanish kasa mu wɔ United States. Nna Adasefo a wɔyɛ kasa asekyerɛfo a wɔwɔ Argentina, Mexico, nye Spain na wɔboa dɛm edwuma yi. Naaso, wɔ afe 1993 mu no, woyii Spanish kasa asekyerɛ kuw no kɔr Puerto Rico. Iyi boaa kasa asekyerɛfo no ma wɔyɛɛ edwuma bɔɔ mu wɔ bea kor.

March 2012 mu no, wosii gyinae dɛ wɔnsan nyi Spanish Kasa Asekyerɛ Edwumayɛbea no nkɔ bea fofor. Dɛm aber yi dze, nna Jehovah Adasefo edwumayɛbea a ɔwɔ Spain no na wɔdze kasa asekyerɛ edwuma no bɔkɔ. Edward kã dza osii ho asɛm dɛ, “Nna nnyɛ edwumayɛfo no, ankorankor hɔn ndzɛmba ahorow, nye edwindadze a yɛdze yɛ edwuma nkotsee na ɔwɔ dɛ yɛdze kɔ, na mbom nna ɔwɔ dɛ yɛdze adze fofor bi a ɔsom bo ma hɛn papaapa so kã ho kɔ. Ɔno nye hɛn kasa asekyerɛ nwomakorabew no.” Nhwehwɛmu nwoma bɛyɛ 2,500 na ɔwɔ nwomakorabew yi mu, na Bible ahorow a wɔakyerɛ ase kɔ Spanish kasa mu ɔhaha pii so kã ho.

Spanish Kasa Asekyerɛ Edwumayɛbea no mufo no dur hɔn edwumayɛbea fofor a ɔwɔ Spain no wɔ May 29, 2013 mu, na Spain Bethel ebusua no mufo dze enyigye gyee hɔn. Nna kasa asekyerɛfo no dze hɔn nhwehwɛmu nwoma ahorow, nye hɔn edwindadze etwa kwan afa Atlantic Po kɛse no do akɔ Spain. Osian nhyehyɛɛ pa nye edwumadzen a wɔyɛe ntsi, hɔn a wɔkenkan nwoma a Adasefo no kyerɛ ase kɔ Spanish kasa mu no ennhu osiakwan biara wɔ nwoma no ne tsintsim mu. Edward kã dɛ, “Ahendzi no ho asɛmpa a nkorɔfo bɛtse no nye adze a oye kyɛn biara, dɛm ntsi yɛpɛ dɛ nyimpa pii a wɔkã Spanish kasa kenkan hɛn nwoma no.”