Hɛn mfonyintwafo yɛ dɛn twa mfonyin ahorow a ɔma hɛn nwoma ahorow no mu yɛ fɛw na ɔsan so ma hɛn nsɛm a yɛakyerɛw no mu da hɔ no? Ma yɛmfa mfonyin a ɔda Awake! a ɔbae wɔ September 2015 mu no n’enyim no nyɛ nhwɛdo, mfa nkyerɛkyerɛ ɔkwan a wɔfa do yɛ mfonyin ahorow no mu. a

• Wɔdorɔwee. Yɛwɔ binom a wɔdorɔw mfonyin wɔ Ɔweɔn-Aban Adzesuabea a ɔwɔ Patterson wɔ New York no. Hɔn a wɔdorɔw yi dzii kan kenkaan asɛm a wɔato dzin “A Balanced View of Money” no, na wɔdorɔdorɔɔw mfonyin ahorow bi a ɔbɛfata asɛm no. Wowiei no, wɔdze mfonyin ahorow a wɔadorɔdorɔw no kɛmaa Akwankyerɛ Kuw no ne Nsɛnkyerɛw Egyinatukuw no. Na Nsɛnkyerɛw Egyinatukuw no paaw dza wɔadorɔw no mu kor dɛ wonkotwa ho mfonyin.

• Bea a wotwaa mfonyin no. Dɛ nkyɛ wobotwa mfonyin no wɔ bank ankasa bi mu no, hɔn a wotwa mfonyin no dze Ɔweɔn-Aban Adzesuabea no n’asa kor bi yɛɛ dɛ bank, nna wotwaa mfonyin no wɔ hɔ. b

• Hɔn a wɔwɔ mfonyin no mu. Hɔn a wɔwɔ mfonyin no mu no nyinara yɛ Jehovah Adasefo nkotsee. Wɔhyɛɛ da faa nyimpa a wofifi aman asorɔtow do na ɔsosor hɔn amambra, ama aayɛ dɛ gyama wɔwɔ bank ankasa bi a nyimpa ahorow ahorow wɔ hɔ mu. Wɔyɛ iyinom ho kyerɛwtohɔ, mbrɛ ɔbɛyɛ a wɔmmfa nyimpa kor yi ara nndzi dwuma mpɛn pii wɔ hɛn nwoma ahorow mu.

• Ndzɛmba a wɔdze yɛe. Dwumadzibea a Wɔdorɔw Mfonyin no dze ɔman fofor hɔn sika dzii dwuma, na annkɛyɛ dɛ gyama bank no wɔ United States. Hɔn a wotwa mfonyin no hwɛe hun dɛ ndzɛmba a wɔdze bedzi dwuma no nyina bɛma mfonyin no edzi mu, na biribiara aayɛ nokwar. Craig a ɔyɛ mfonyintwafo no kãa dɛ: “Yɛmmfa biribiara nntow kyakya.”

• Ahosiesie. Wɔ dɛm bank mfonyin yi mu no, wɔmaa hɔn a wɔwɔ mfonyin no mu no ankasa dze hɔn ntar bae bɛhyɛe. Naaso, sɛ mfonyin no fa abakɔsɛm bi ho anaa ohia dɛ wɔhyɛ atar soronko bi a, ɔnodze Dwumadzibea a Wɔdorɔw Mfonyin no bɛyɛ nhwehwɛmu na wɔaama nkorɔfo no nsa akã dɛm atar no. Hɔn a wosiesie afofor ho no siesie hɔn a worubotwa hɔn mfonyin no ho ma ɔnye ber, asɛm anaa tebea a wɔrekã ho asɛm wɔ mfonyin no mu no hyia. Craig kã dɛ: “Osiandɛ ndɛ mfonyintwa mfir no twa mfonyin ma n’enyim da hɔ yie paa no ntsi, no ho hia dɛ yɛma biribiara yɛ pɛpɛɛpɛr. Sɛ adze ketseketse bi mpo annkɔ yie a, ɔbɛsɛɛ mfonyin no nyina.”

• Mfonyintwa ber. Mfonyintwafo no hwɛe hun dɛ kan a ɔwɔ dan no mu hɔ no bɛma bank ho mfonyin no asɛ ewiaber. Ansaana mfonyintwafo no botwa mfonyin biara no, ɔsɛ dɛ wɔhwɛ hu dɛ kan a ɔwɔ dan mu hɔ no fata (dɛ bi a ɔrekyerɛ ewia ne kan, bosoom ne kan, anaa kandzea fofor bi ne kan no). Ɔsɛ dɛ mfonyintwafo no hwɛ hu dɛ kan a ɔwɔ dan mu hɔ no nye dza wɔakã ho asɛm wɔ nkyekyɛmu no mu no hyia. Ɔsɛ dɛ wɔsan hwɛ hu dɛ kan a ɔwɔ mfonyin no mu no nye nkãtse anaa tsebea a mfonyin no rekã ho asɛm no hyia. Craig kãa dɛ: “Wɔ video mu no, ibotum dze mfonyin pii akyerɛkyerɛ tsebea bi mu. Naaso wɔ mfonyintwa mu dze, mfonyin kor noara na ɔsɛ dɛ edze kyerɛkyerɛ tsebea no mu. Ntsi ohia paa dɛ kan no yɛ dza ɔfata.”

• Wɔyɛɛ mfonyin no yie. Ekyir yi, hɔn a wɔyɛ mfonyin yie no siesiee ndzɛmba bi wɔ mfonyin no mu. Wosiesiee mfonyin no wɔ ɔkwan bi do a ɔremma obi nnhu ɔman kor a wɔdze hɔn sika dzii dwuma no. Ɔwɔ mu dɛ nna abow no nye ntokura no hɔn ndua no yɛ kɔkɔɔ dze, naaso wɔyɛɛ mfonyin no yie ma kɔla no daan green​—ma ɔnye magazine no n’enyim kɔla no hyiae.

Sɛ yɛdze mfonyintwa edwuma a yɛyɛ wɔ Patterson no to nkyɛn a, wɔ hɛn edwumayɛbea nkorbata a ɔwowɔ wiadze n’afã ahorow nyina mu no​—mbea asorɔtow tse dɛ Australia, Brazil, Canada, Germany, Japan, Korea, Malawi, Mexico, nye South Africa​—yɛwɔ mfonyintwafo pii wɔ hɔ a yebotum akã akyerɛ hɔn ma wɔaayɛ mfonyin ho edwuma ma yɛdze ayɛ hɛn nwoma ahorow. Wɔ bosoom biara mu no, Dwumadzibea a Wɔdorɔw Mfonyin wɔ Patterson no dze mfonyin bɛyɛ 2,500 kã hɔn mfonyin ahorow a wɔakora do wɔ kɔmpiwta do no ho. Wɔdze dɛm mfonyin ahorow yi mu pii ba hɛn Ɔweɔn-Aban nye Awake! magazine ahorow no mu. Wɔ mfe 2015 mu no, yɛkyekyɛɛ Ɔweɔn-Aban nye Awake! magazine ahorow no dodow bɔbor ɔpepem 115. Yɛto nsa frɛ wo dɛ bɛsera hɛn edwumayɛbea a ɔwɔ Patterson wɔ New York no, anaa hɛn edwumayɛbea nkorbata a ɔwɔ wiadze ne mfɛndzanan nyina no mu biara, na eehu pii akã ho.