Wɔ Spain no, Jehovah Adasefo kɛserasera adaduadan ahorow 68, na ndaduafo bɛyɛ 600 na wɔnye hɔn sũa Bible no.

Adasefo no mu kor a ɔkɔ dɛm nseraa no bi nye Miguel, a ɔdze mfe 12 kɛdaa efiadze ansaana ɔrebɛyɛ Ɔdasefo no. Ndɛ, ɔsan kɔ efiadze dapɛn biara. Ɔrekɛpɛ ebɛn? Ɔpɛ dɛ ɔkɔboa afofor ma wɔsesã hɔn asetsena, dɛ mbrɛ wɔboaa ɔno so no.

Bɔbor mfe awɔtwe nye yi no, Miguel akɔ do nye adaduafo pii esũa Bible no. Ɔkã dɛ: “M’enyi gye dɛ moboa adaduafo a wogu efiadze a nna meda no. Sɛ muhu dɛ wɔpɛ dɛ wɔdze hɔnho fi dɛm emumuyɛ suban no ho a, ɔma m’enyi gye dodow.”

Aber a Miguel dzii mfe anan no, drɔbanyi bi a nna ɔabow dze kaar bɔɔ ne papa kum no. Ntsi nna ne maame a ɔabɛyɛ okunafo no na ɔsɛ dɛ ɔdze ndɔnhwer pii yɛ edwuma dze hwɛ ebusua no.

Miguel nye no nua panyin hyɛɛ ase dɛ wɔrototo skuul mu, afei so nna wobubu mu kɔ nkorɔfo adan nye kaar mu kowia adze. Aber a Miguel dzii mfe 12 no, nna ɔabɛyɛ mbratonyi kakraba. Odzii mfe 15 no, nna ɔtɔn ndubɔn dze dzi sika akɛse. Naaso, osiandɛ heroin nye cocaine a nna no nom aka no hɔ no bo bɛyɛɛ dzen ntsi, ɔkɔr n’enyim wɔ adzewia mu. Ofitsi aber a odzii mfirihyia 16 rokɔ no, wɔdze no too efiadze mpɛn pii, annkyɛr na ɔbɛyɛɛ mbratonyi tsirmuɔdzemfo. Miguel kã dɛ: “Nna megye dzi paa dɛ, sɛ mennwu wɔ efiadze a, ndubɔn dodow boku me. “Nna mabɛyɛ dɛ ɔwansan a efir apa no.”

Naaso wɔ afe 1994 mu a nna Miguel da efiadze no, Miguel ne nyɛnko bi kãa kyerɛɛ Ɔdasefo bi dɛ ɔnkyerɛw Miguel krataa. Miguel bohun wɔ dɛm krataa no mu dɛ, ɔyɛ Nyankopɔn ne tsirmpɔw dɛ ɔbɛsan dze Paradise aba asaase yi do. Ɔkyerɛwfo no hyɛɛ Miguel nkuran dɛ ɔnyɛ nsesã wɔ n’asetsena mu ama sɛ dɛm anohoba yi ba mu a, Miguel eenya enyigye no mu kyɛfã. Miguel se; “Ne nsɛm no kãa m’akoma paa. Dɛm da noara minyaa adwensakyer, na misii gyinae dɛ mubosũa Bible no, ɔmmfa ho dɛ nna minyim dɛ ɔnnkɛyɛ mberɛw koraa ama me no.”

Nna Miguel nyim iyi osiandɛ nna towa nye ndubɔn nom aka no hɔ. Nna iyinom so nnyɛ nã wɔ efiadze hɔ. Adaduafo a ɔnye hɔn gu efiadze hɔ no dze ndubɔn pũapũaa no dabiara da. Miguel bɔɔ mpaa aber nyina dɛ Nyankopɔn mboa no ma onnya ahoɔdzen mfa ngyina ano, na ewiei koraa no ogyinaa ano.

Abosoom ebiasa ekyir no, Miguel hyɛɛ ase dɛ ɔnye adaduafo afofor rekyɛ ne gyedzi ho asɛm no. Afe a odzi hɔ no, woyii no fii efiadze hɔ, na ɔmaa wonumaa no dɛ Jehovah Adasefo no mu kor. Ɔyɛɛ nhyehyɛɛ so dɛ ɔbɔwar, naaso ɔhaw bi soɛree. Aka bosoom kor ma ayefor no edu do no, asɛndzibea bi buu Miguel fɔ dɛ ɔnkɛda efiadze mfe du osian ne nsɛm adadaw bi a nna wonndzii nnwiei ntsi. Naaso mfe ebiasa na fã ekyir no, woyii no fii efiadze hɔ osian no suban pa no ntsi. Afei dze, awar no baa do. Miguel nnsanee nnkɔr mbratofo abrabɔ bɔn no mu bio da.