Aber a wɔkãa mfe esuon bɔɔ mu no, Jehovah Adasefo tsintsimbea a ɔwɔ Mexico no na wonyaa Edwumakuw a Hɔn ho Tsew Paa abɔdzin krataa (Clean Enterprise certificate) no.

Wɔ September 26, 2012 no, Mexico aban no maa Jehovah Adasefo no abɔdzin krataa soronko bi dze bɔɔ hɔn abaw do, “osian mbrɛ wotu hɔn ho kyɛ na wosiesie hɛn atsenae na wɔbɔ ho ban no ntsi.”

Edwumakuw a Hɔn ho Tsew Paa nhyehyɛɛ no boa edwumayɛbea ahorow ma wotu mpon wɔ mbrɛ wɔbɔ hɛn atsenae ho ban no mu. Jehovah Adasefo dze hɔn ho hyɛ nhyehyɛɛ yi mu afe biara, ɔmmfa ho dɛ wɔmmfa hɔn ahyehyɛdze no mmpɛ sika no. Hɛn tsintsimbea a ɔwɔ Mexico no ne kasamaafo bi kãa dɛ: “Mbrɛ ɔbɛyɛ na yeenya Edwumakuw a Hɔn ho Tsew Paa abɔdzin krataa no, ɔsɛ dɛ yɛma adanse a ɔkyerɛ dɛ hɛn edwumayɛ na dza yɛdze gu mframa mu no nye atsenae ho mbra hyia wɔ afã ahorow esuon mu: mframa, nsu, nwura a ofi hɛn efie mu, nwura a obotum epira obi, bambɔ, enyinam ahoɔdzen, nye atsenae ho ntsetsee. Wɔnnhyɛ edwumakuw biara dɛ wɔmfa hɔn ho nhyɛ nhyehyɛɛ yi mu. Yefi hɛn pɛ mu na yɛdze hɛn ho hyɛ mu.”

Jehovah Adasefo a wɔwɔ wiadze nyina no yɛ dza wobotum biara dze hwɛ dɛ wɔnnkɛsɛɛ asaase fɛfɛɛfɛw yi a yɛtse do no.