Wɔama Jehovah Adasefo baakron a wɔwɔ Australia abɔdzin krataa dze ada hɔn ase wɔ mbrɛ wɔdze “mboa soronko” ama adaduafo a wogu Australia efiadze akɛse no mu kor no ho. Adasefo no nyaa abawdobɔdze no fii Curtin Immigration Detention Centre a ɔbɛn Derby wɔ Western Australia no. a

Dapɛn biara no, Adasefo no kɛsera adaduafo no ketsie hɔn suahũ ahorow, na wɔnye hɔn kyɛ Bible mu awerɛkyekyer nye enyidado nsɛm. Christopher Riddoch a ɔhwɛ efiadze hɔ nyamesom na amambra ho nsɛm do no kãa dɛ; “Obiara tum hu no ntsɛmara dɛ hɔn nserahwɛ no enya adaduafo no do nkantando pa.” Ɔdze kãa ho dɛ, ohu dɛ adaduafo no ndzeyɛɛ na hɔn enyim yɛbea sesã, na hɔn enyigye so yɛ kɛse. Na ɔse ɔdze iyinom nyinara ho nkamfo ma nyimpa a “wonyim dɛ nyimpa afofor bi wɔ hɔ a ɔsɛ dɛ wɔkyerɛ hɔnho enyigye no.”

Mr. Riddoch san kãe so dɛ, abɔdzin krataa a wɔdze maa Adasefo no yɛ biribi kakraabi a wɔdze reda hɔn ase. Ɔse, osiandɛ “wɔama nyimpa a wɔhyɛ hɛn ase no asetsena etu mpon.” Ɔdze kãa ho bio dɛ, Adasefo no “hyɛ hɔn ebusua, hɔn asafo no, nye hɔn gyedzi enyimnyam.”