Ndaansa yi ara Hugo a oedzi mfe du nyaa Diana Abawdobɔdze (Diana Award) fii Britianfo adɔyɛ edwumakuw bi hɔ, osiandɛ ɔboaa no skuulfo ma wogyinaa mpuw ano.

Hugo kãa dɛ: “Medze abawdobɔdze yi ho enyimnyam ma video a wɔato dzin Beat a Bully Without Using Your Fists no. Mutumii bɛyɛɛ obi a otum gyina mpuw ano paa osian dza musũae fii dɛm video a ɔwɔ jw.org do no mu no ntsi.”

Hugo dzii kan yii Beat a Bully video no kyerɛɛ n’akyerɛkyerɛfo. Hɔn enyi gyee ho, ntsi wɔyɛɛ nhyehyɛɛ a ɔbɛma skuul mbofra no nyinara etum akɔ jw.org. Mbofra a woedzi mfe awɔtwe kesi du wɔ Hugo no skuul no mu pii wɔ hɔ a sesei dze wɔkɔ jw.org do aber biara. Wɔkã dɛ nnyɛ ɔhaw ahorow bi tse dɛ mpuw a wogyina ano nkotsee na wɛbsaet yi aboa hɔn ma woedzi ho dwuma, na mbom aboa hɔn ma woenya mbuae ama nsɛmbisa ahorow bi tse dɛ, ‘Mebɛyɛ dɛn enya anyɛnkofo pa?’ so.

Wɔ Britianfo skuul fofor so bi mu no, nna wopuw Elijah a woedzi mfe awɔtwe no. Ɔnye n’ebusua siee abotar hwɛɛ Beat a Bully video no susũu ho. Wɔbɔɔ mu susũu dza obotum akã na ɔaayɛ ho aber a obi rupuw no no. Iyi maa Elijah akokodur nye ahotodo a obotum dze edzi ɔhaw no ho dwuma. Ekyir yi, wɔ dɛm dapɛn a wɔdze rususũ mbrɛ wobegyina mpuw ano wɔ skuul mu no ho no, Elijah ne kyerɛkyerɛnyi panyin no yii video no kyerɛɛ skuulfo no nyinara.

Nokwasɛm nye dɛ, nnyɛ Britain nkotsee na mpuw yɛ ɔhaw wɔ hɔ. Ɔkɔ do wɔ wiadze yi mu beebiara, na dɛm video a wɔdorɔw yi roboa mbofra wɔ mbea nyina.

Wɔ United States no, nna Ivie a oedzi mfe du no suro no skuulnyi bi a opuw no no. Aber a Ivie hwɛɛ Beat a Bully video no wiee no, onyaa akokodur a ɔdze begyina dɛm abofra no enyim. Afei ɔnye ne kyerɛkyerɛnyi so kasae ma ɔboae ma wodzii tsebea no ho dwuma. Skuul abofra a ɔbɔ mpuw no paa kyɛw, na sesei ɔnye Ivie ntamu yɛ kama.

Jehovah Adasefo dwen mbofra eyiedzi ho paa. Yɛbɔkɔ do ama afotu pa a ɔbɔboa hɔn ma woeedzi dabiara da ɔhaw ahorow bi tse dɛ mpuw ho dwuma.