My Book of Bible Stories a wɔakyerɛ ase akɔ Pangasinan kasa mu, a woyii no edzi wɔ afe 2012 mu no roboa skuul mbofra a wɔwɔ Philippines a wɔkã dɛm kasa no. Dɛm buukuu yi nye Nwomasua Asoɛe a ɔwɔ Philippines no ahyɛdze a ɔnye dɛ wɔmfa mbofra no kurow mu kasa nkyerɛ adze wɔ ahyɛse skuul no hyia paa.

Kasa bɔbor 100 na wɔkã no wɔ Philippines, na dɛ kasa yi mu hendze na wɔdze bɛkyerɛ adze wɔ skuul mu no yɛ adze a wɔakã ho asɛm akyɛr yie. Wɔ afe 2012 mu no, mbra bi a ofi Nwomasua Asoɛe bɔfoaa do dɛ, sɛ “wɔdze kasa a wɔkã no wɔ fie dzi dwuma a,” ɔma yenya “esuafo a wɔbɔ mbɔdzen na wotum sũa adze ntsɛm.” Ɔnam iyi do no, wɔdze nhyehyɛɛ bi a wɔato dzin, “Kasa Asorɔtow no Sũa ho Ntsetsee wɔ Kurow mu Kasa Mu” sii hɔ.

Kasa asorɔtow a wɔpawee dɛ wɔdze bedzi dwuma no mu kor nye Pangasinan kasa no. Naaso, nna akwansidze bi wɔ hɔ. Amandzɛɛbɔ kyerɛ dɛ, kyerɛkyerɛnyi panyin bi gyee too mu dɛ skuulfo nnyi nwoma pii wɔ Pangasinan kasa mu. Ntsi, nna ɔfata paa dɛ Jehovah Adasefo yii buukuu a wɔato dzin My Book of Bible Stories a wɔayɛ no wɔ Pangasinan kasa mu no edzi wɔ hɔn ɔmantɔw ehyiadzi a wɔyɛɛ wɔ November 2012 no ase.

Wɔyɛɛ buukuu yi dodow bɛyɛ 10,000 dɛ wɔbɛkyekyɛ wɔ ehyiadzi ahorow no ase. Mbofra nkakraba nye hɔn awofo nyinara enyi gyee dɛ woenya buukuu bi wɔ hɔnara hɔn kasaa mu. Awarfo bi kãa dɛ: “Hɛn mbofraba no enyi gye ho osiandɛ wotum tse ase yie.”

Wowiee ehyiadzi no ara pɛr, Adasefo no mu binom dze hɔn Bible Stories mbuukuu no kɔr skuul bi a ɔwɔ Dagupan City mu no. Akyerɛkyerɛfo a nna wɔwɔ hɔ, a wɔrohwehwɛ mbuukuu wɔ Pangasinan kasa mu dzendzenndzen no enyi gyee buukuu yi ho papaapa. Wɔkyekyɛɛ buukuu yi mu dodow bɔbor 340. Akyerɛkyerɛfo yi hyɛɛ ase ntsɛmara dɛ wɔdze buukuu yi ridzi dwuma dze akyerɛ mbofra no ma wɔaakenkan wɔ hɔnankasa hɔn kasaa mu.

Ɔyɛ Jehovah Adasefo enyigye dɛ dɛm nwoma yi ridzi dwuma wɔ ntsetsee a wɔdze rema mbofra nkakraba no mu. Kasa asekyerɛfo no mu kor a ɔkã ho ma wɔkyerɛɛ buukuu yi ase no kãa dɛ: “Ofi mber tsentsen na yeehu hia a no ho hia dɛ yɛkyerɛw nsɛm wɔ obi nankasa ne kasaa mu mbrɛ ɔbɛyɛ a yebodu n’akoma mu. Iyi ntsi na Adasefo no bɔ mbɔdzen dɛ wɔbɛkyerɛ Bible nye Bible ho nwoma ahorow ase akɔ kasa ɔhaha pii mu no.”