Ofitsi December 2012 no, Jehovah Adasefo a wɔwɔ Thailand ayɛ ɔsatu tsitsir bi dɛ wɔdze bɔboa skuulfo ma woeehu nwoma wɔ skuul. Adasefo eduonu a hɔn enyiwa efifir kɛseraseraa skuul ahorow a ɔwowɔ Bangkok apaamu hɔ no. Wɔnye skuul biara ne panyin hyiae, na wɔdze October 2012 Awake! no a asɛntsir a ɔda enyim se “How to Succeed at School” no maa akyerɛkyerɛfo nye skuul mbofra no.

Ɔsatu yi kɔr yie, na Adasefo no toaa do kɔr ɔman no n’afã ahorow nyina. Bɛyɛ afe kor na fã a odzi hɔ ntamu no, wɔnye skuul ahorow 830 dzii nkitaho. Wobohun dɛ skuulfo nye akyerɛkyerɛfo no ho per hɔn dɛ wobenya dɛm Awake! yi bi ara ma nna ɔsɛ dɛ wɔsan tsintsim magazine yi no dodow mprɛnsa ana woeetum edzi hɔn ebisadze no ho dwuma. Ahyɛse no, wɔkraa October 2012 Awake! yi dodow bɛyɛ 30,000. Naaso, nkorɔfo enyi abɛgye asɛntsir no ho ara ma wɔakyekyɛ magazine yi no dodow bɔbor 650,000!

Skuul mpanyimfo nye akyerɛkyerɛfo bohun mfaso a ɔwɔ Awake! no do. Kyerɛkyerɛnyi kor kãa dɛ, “Magazine yi bɔboa hɛn mbofra no ma woeetum abɛn hɔn ebusua no yie na wɔdze botae pa esisi hɔn enyiwa do.” Skuul ahorow bi dze Awake! no mu nsɛm kaã hɔn adzesua nhyehyɛɛ ho. Afofor so dze magazine yi sũa akenkan wɔ skuul no mu. Wɔ skuul kor bi mu no, wɔmaa skuulfo no gyinaa asɛm a ɔwɔ magazine yi mu yɛɛ skuul dwumadzi, na hɔn a wɔyɛɛ no yie paa no nyaa akyɛdze.

Skuulnyi ababaawa kor bi enyi gyee asɛm a ɔse “Winning the War Against Obesity in the Young” a ɔwɔ magazine yi mu no ho. Ɔkyerɛkyerɛɛ mu dɛ bɔdɛɛyɛ abɛyɛ ɔhaw wɔ beebiara, na n’anyɛnkofo so enyi nngye ho dɛ wɔnye afofor bedzi ho nkɔmbɔ. Ɔdze kãa ho dɛ, “Meda hom ase paa dɛ hom ama hɛn afotu a ne ntseasee yɛ mberɛw, na yetum so dze dzi dwuma yie.”

Awofo so enyi asɔ magazine yi. Maame bi kãa mbrɛ n’enyi sɔ magazine yi ho asɛm kyerɛɛ Adasefo bi a wɔbɛseraa no wɔ ne fie, aber a ɔkãa dɛ, “Afotusɛm pii wɔ mu a obotum aboa me babaa no ma wɔayɛ adze wɔ skuul.”

Owura Pichai Petratyotin, a ɔyɛ Jehovah Adasefo kasamaafo wɔ Thailand no kãa dɛ: “Awake! kã nyansasɛm a ɔwɔ Bible mu a wɔdze edzi dwuma mfe pii nye yi, a ndɛbermufo botum enya do mfasa ankasa ho asɛm. Jehovah Adasefo gye dzi paa dɛ mfaso wɔ nwomasua do, ntsi nna hɛn enyi gye ho dɛ yɛbɛma obiara enya magazine yi bi a worunntua hwee.”