Jehovah Adasefo gye dzi dɛ Nyankopɔn bu nyimpa ahorow nyina dɛ wɔyɛ pɛr ɔmmfa ho ebusuakuw, kasa anaa ɔman a wofi mu no. (Ndwuma 10:34, 35) Yɛnam Bible nkyerɛkyerɛ do bɔ mbɔdzen dɛ yɛbɔboa nkorɔfo ma woeedzi enyimhwɛ anaa nyiyimu a wɔagye ntsin paa wɔ hɔn mu no mpo do.

Afei so, yɛmmpen ahyehyɛdze anaa kuw biara a wofi enyimhwɛ mu yɛ adze no do. Dɛ nhwɛdo no, wɔ Nazifo no hɔn aber do no, Jehovah Adasefo a nna wɔwɔ Germany nye mbea afofor no powee dɛ wɔbɛtaa Hitler ne satu a ɔtan wɔ mu no ekyir. Wokunkum nyimpa ɔhaha pii, osiandɛ wɔpowee dɛ wɔbɛtaa Hitler ne satu no ekyir ntsi.

Dɛmara so na Adasefo no annhyɛ hɔn nkorɔfo nkuran dɛ wɔmfa hɔnho nhyɛ mbusua a wɔtɔɔr hɔn ase wɔ Rwanda wɔ afe 1994 no mu. Nokwasɛm mbom nye dɛ, Adasefo yi mu binom dze hɔn nkwa too esian mu anaa mpo dɛ wɔhweer hɔn nkwa aber a nna wɔrobɔ hɔn a worukunkum hɔn no nkwa ho ban no.

Osiandɛ yɛpɛ dɛ yɛboa nyimpa ahorow nyina ntsi yɛyɛ Bible ho nwoma ahorow wɔ kasa bɛyɛ 600 mu, na yɛkyekyɛ. Ne dɛm so ntsi, hɛn asafo ahorow no dze enyigye gye nkorɔfo a wofi “aman, nye mbusuakuw, nye nkorɔfo, nye kasa nyina mu” no to mu​—Nyikyerɛ 7:9.