Wɔ September 14, 2013 no, wɔyɛɛ nhyiamu maa hɔn a wowiee Ɔweɔn-Aban Gilead Bible Skuul a ɔtɔ do 135 no wɔ Jehovah Adasefo adzesuabea a ɔwɔ Patterson wɔ New York no, na nyimpa 10,500 na wɔkɔr nhyiamu no bi. Jehovah Adasefo dze dɛm skuul yi tsetse hɔn asomfo a hɔnho akokwaa no ma hɔnho wea wɔ dwumadzi a wɔdze bɛhyɛ hɔn nsa no mu.

Guy Pierce, a ɔyɛ Jehovah Adasefo Akwankyerɛ Kuw no munyi na nna ɔyɛ eguamutsenanyi ma nhyiamu no. Ɔdze ne nsɛm no gyinaa Matthew 28:19, 20 do, hɔ kã dɛ: “Dɛm ntsi hom nkɔ nkɛyɛ amanaman nyina m’esuafo, . . . Hom nkyerɛkyerɛ hɔn dɛ wondzi dza mahyɛ hom nyina do.”

Onua Pierce sii do dua dɛ, dɛm nsɛm no a Jesus kãe no maa edwuma bi hyɛɛ ase, na dɛm edwuma no atoa do ebesi hɛn mber yi mu. Aber a yɛreyɛ nkorɔfo esuafo no, yɛkyerɛkyerɛ hɔn ma wodzi Jesus n’ahyɛdze nyina do. Dza ɔkã ahyɛdze yi ho nye dɛ, ɔkãa dɛ yɛnkã “ahenman ho asɛmpa yi.” (Matthew 24:14) Wɔ dɛm kwan yi do no, osuanyi fofor biara bɛba abɛyɛ Ahenman no ho asɛmpakanyi nye ɔkyerɛkyerɛnyi. Ebɛnadze na efi dɛm adzeyɛ yi mu aba? Onua Pierce kãa dɛ: “Nyimpadodow [a wɔwɔ wiadze] no adɔɔ sõ, naaso Nyankopɔn nkorɔfo so adɔɔ sõ.”

“Wɔmaa Dza Ɔtra Hɔn Tum.” Thomas Cheiky, a ɔyɛ United States Nkorbata Egyinatukuw no munyi no na ɔmaa ɔkasa yi, na nna n’asɛntsir no gyina 2 Corinthfo 8:​1-4 do. Ɔmmfa ho dɛ nna asafo ahorow a wɔwɔ Macedonia wɔ asomafo no aber do no dzi hia dobodobo no, wɔserɛɛ pii dɛ wobeyi biribi ama hɔn nuanom a nna woehia hɔn wɔ Jerusalem no. Gilead esuafo yi ada ayamuyie nye etuhoama sunsum kor yi ara edzi.

Ber kor noara mu no, yebotum enya awerɛhyɛmu dɛ nna Macedoniafo no enyi da hɔ. Ntsi dza wɔdze mae no, nna ɔnndɔɔ sõ mmbor do ma ntsi annhaw hɔn ebusua anaa hɔnankasa hɔn som a wɔdze ma Nyankopɔn no. Onua Cheiky tuu esuafo no fo dɛ, wonsũasũa Macedoniafo no dze nam dɛ wobeker pɛ wɔ mbrɛ wɔma no mu.

“Skuul No Aba N’ewiei.” Samuel Herd a ɔyɛ Akwankyerɛ Kuw no munyi no kyerɛɛ siantsir a ɔnnsɛ dɛ esuafo no ma hɔn werɛ fir osuahu a woebenya wɔ Gilead Skuul no mu no. Tse dɛ mbrɛ obi tse ndwom dɛɛdɛw bi a ɔka ne tsirmu da mũ no nyinara no, dɛmara so na esuafo no botum akaa osuahu papabi a woebenya wɔ Gilead skuul no aber nyina, na aahyɛ hɔn dzen.

Onua Herd kaa esuafo no dɛ, mbrɛ Nyankopɔn ne nkaa mu dɔ no nnyi ewiei. Ɔatoto nworaba ɔpepepem mu ɔpepepem a wogu amansan yi mu no mu biara dzin, na no werɛ nnkefir nworaba no mu biara da. (Ndwom 147:4) Hwɛ mpɛn dodow a no werɛ nnkefir mbɔdzen a esuafo no abɔ wɔ hɔn Gilead ntsetsee no mu no! Wɔapɛ ‘akoradze egu sor,’ na obiara nnkotum ewia esuafo yi mbɔdzembɔ ho adwen a Jehovah dze esie ne nkaa mu no.​—Matthew 6:​20.

Osiandɛ Nyankopɔn kaa esuafo no hɔn edwumadzen nye hɔn dɔ a wɔwɔ ma no no ntsi, esuafo no so botum ama hɔn enyi asɔ dza wɔkaa wɔ Gilead no mu no. Onua Herd kãa dɛ: “Sɛ ekaa biribi fa skuul yi ho, na ɔma wo da no yɛ wo huahuannhuam a, mma wo werɛ mmfir dɛ ebɛda Onyia ɔama w’enyi agye no ase​—Jehovah. Mma ndzɛmba a ebɛkaakaa wɔ skuul yi ho no mmfon wo da. Osiandɛ mfaso a ibenya efi mu no, wo werɛ nnkefir da.”

“Nya Awerɛkyekye Wɔ Jehovah No Tum A Onnyi Ano No Mu.” Gilead kyerɛkyerɛnyi Sam Roberson hyɛɛ esuafo no nkuran dɛ, wɔmfa hɔnho nto Jehovah no tum do mbom sen dɛ wɔdze hɔnankasa hɔn ahoɔdzen bedzi hɔn nsɛndzendzen ho dwuma. Ephesusfo 3:​20 kã Nyankopɔn ho asɛm dɛ, ɔyɛ “onyia no a otum dɛ ɔyɛ ma ɔtra mbordo kyɛn adze nyina a yebisa anaa yɛdwen” no. No tum no bor hɛn ntseasee do ara ma asɛmfua ‘mbordo kyɛn adze nyina a yesusu’ no mpo nnkotum akyerɛkyerɛ mu. Osiandɛ kyerɛwsɛm no kãa dɛ, “ɔyɛ ma ɔtra” do.

Jehovah dze no tum a onnyi ano no boa Christianyi biara. Ɔtse dɛ “ɔkatakyi a no ho yɛ hu” wɔ ahokyer ber mu. (Jeremiah 20:11) Onua Roberson kaa esuafo no dɛ, Jehovah bɔboa hɔn ma woeedzi ɔhaw anaa nsɛndzendzen biara a wohyia no do.

“Kura W’enyidzi Mu Wɔ Ahendzi Edwuma No Mu.” William Samuelson, a ɔno so yɛ Gilead kyerɛkyerɛnyi no kyerɛkyerɛɛ mu dɛ, Gilead esuafo no enya enyidzi wɔ Ahendzi edwuma no mu wɔ akwan ebien do. Ansaana wɔbɛba skuul no nye aber a wɔwɔ skuul no mu no nyinara, wɔdze hɔn ndwuma daa no edzi dɛ wɔfata enyidzi. Bio so, wɔkɔ do nya obu nye enyidzi dze nam dɛ wɔyɛ ananmugyinafo ma aban a ɔkorɔn sen biara wɔ amansan yi mu no​—Nyankopɔn n’Ahendzi.

Esuafo no bɛyɛ dɛn ekura hɔn enyidzi no mu? Onua Samuelson hyɛɛ hɔn nkuran dɛ, dɛ mbrɛ Jesus dzii afofor nyi aber mpo a nna ɔretsen hɔn anaa orutu hɔn fo no, dɛmara na hɔn so, wɔmfa enyidzi mma Jehovah na wɔnda obu edzi nkyerɛ afofor. Ebɛnadze na obefi iyi mu aba? Tse dɛ ɔsomafo Paul no, esuafo no benya hɔn enyidzi no bi akã ho, na wɔaahyɛ hɔn som no enyimnyam mbom sen dɛ wɔbɛhyɛ hɔnanakasa hɔnho enyimnyam.​—Romefo 11:13.

“Mpɔnkɔ No Hɔn Ahoɔdzen Wɔ Hɔn Ano.” Michael Burnett, a ɔno so yɛ Gilead kyerɛkyerɛnyi no kyerɛɛ dɛ, yebotum ayɛ adze ma ɔnye asɛm a ɔwɔ Nyikyerɛ 9:​19 no ne mbamu ehyia. Ɔnye dɛ, yɛdze dza yesũa wɔ Christianfo nhyiamu ase no bedzi dase wɔ akokodur do. Afei ɔnye esuafo no twetwee nkɔmbɔ ma hɔn mu binom kãa asɛnka mu osuahu ahorow a woebenya wɔ Gilead hɔ no ho asɛm, na afofor so yɛɛ hɔn suahu no ho ɔyɛkyerɛ. Dɛ nhwɛdo no, osuanyi kor dze asɛmbisa bi kenyaan banyin bi a ɔyɛ edwuma wɔ gas stehyɛn no n’enyigye. Obisaa no dɛ: “Ebɛn aber na amanaman aber no hyɛɛ ase na ɔbaa ewiei?” (Luke 21:24) Ekyir yi a ɔsanee kɛseraa banyin no, ɔdze asɛm a ɔwɔ Daniel tsir 4, nye nsɛm a ɔwɔ What Does the Bible Really Teach? buukuu no ne nkekaho no mu no boaa no ma onyaa n’asɛmbisa no ho mbuae.

“Wɔahyɛ Hɔn Akoma Dzen.” Adrian Fernandez, a ɔyɛ United States Nkorbata Egyinatukuw no munyi bisabisaa awarfo ahorow ebien a woewie skuul yi no nsɛm. Onua Helge Schumi kãa dɛ, Bible no da no edzi dɛ, aber a Nyankopɔn n’asomfo binom nyaa ho kwan soronko bi ekyir no, wɔbɛyɛɛ ahomado. Iyi ntsi, wɔtaa dze nsɛm a ɔboa obi ma onya ahobrɛadze su kã dza wosũa wɔ Gilead no mu no ho. (2 Mbermunsɛm 26:16) Onua Peter Canning so kãa afotusɛm bi a nyansa wɔ mu a onyaa fii Gilead skuul no mu no ho asɛm. Nna ɔfa kasa a wosũa ho, ɔnye dɛ: “Mma nnyɛ ahomado. Yɛ woho dɛ ma innyim hwee.” Dɛm nyimpa baanan yi a woewie Gilead no kyerɛɛ dɛ, hɔn enyi sɔ mbrɛ skuul no ahyɛ hɔn dzen ama edwuma a daakye wɔdze bɛhyɛ hɔn nsa no, na iyi ahyɛ hɔn akoma so dzen.​—Hebrewfo 13:9.

“Hom Ndzi Dɛw Dɛ Wɔakyerɛw Hom Edzin Wɔ Sor.” (Luke 10:20) Geoffrey Jackson a ɔyɛ Akwankyerɛ Kuw no munyi na ɔmaa ɔkasa tsitsir no. Hɔn a wowiee Gilead mber bi a abɛsen kɔ no mu pii nyaa dwumadzi a ɔyɛ enyigye, anaa wɔdze hɔn kɔr nsaasesin a wɔnntaa nnyɛ mu edwuma mu ma wokenyaa osuahu ahorow pii a ɔyɛ enyigye. Naaso hɔn a afei na woruwie no mu pii rinnya no dɛm. Wɔbɛyɛ hɔn adze dɛn wɔ ho?

Aber a esuafo 70 a Jesus somaa hɔn ma wɔkɛkãa asɛmpa no sanee bae no, wɔdze enyigye bɔbɔɔ amandzɛɛ dɛ woetu mbɔnsam wɔ Jesus ne dzin mu. (Luke 10:​1, 17) Jesus gyee too mu dɛ amandzɛɛbɔ no a wɔdze bae no yɛ enyigye, naaso ɔkãe so dɛ: “Naaso mma hom nndzi dɛw wɔ yi mu dɛ esunsum abrɛ hɔnho adze ama hom, na mbom hom ndzi dɛw dɛ wɔakyerɛw hom edzin wɔ sor.” (Luke 10:20) Ntsi ɔmaa wohun dɛ, ɔnnyɛ dabiara na wobenya osuahu ahorow a ɔyɛ enyigye dɛm. Ɔsɛ dɛ wɔdze hɔn adwen si nokwar a wobedzi ama Jehovah nye ‘hɔn edzin a wɔakyerɛw wɔ sor’ no do, na mbom nnyɛ dza obefi asɛmpaka edwuma no mu aba no do.”

Onua Jackson kãa dɛ: “Dza Jesus kãa kyerɛɛ n’esuafo 70 no fa hɛn so hɛnho.” Ɔnnsɛ dɛ yɛma dza ofi hɛn asɛmpaka edwuma no mu ba no yɛ siantsir tsitsir a ɔma hɛn enyi gye, anaa adze tsitsir a yegyina do ker hɛn nokwardzi. Mbom no, sɛ yɛkɔ do nye Jehovah nya ebusuabɔ pa na yɛbɔ hɛnho mbɔdzen wɔ Jehovah no som mu a, ɔno na hɛn enyi bɛgye na yaakyerɛ dɛ yeridzi nokwar.

Jesus mpo hyiaa tsebea ahorow bi a nna obotum ebu n’abaw mu. Dɛ nhwɛdo no, aber a ɔmaa nyimpa mpempem bi edziban wiei no, wɔhyɛɛ ase dzii n’ekyir. (John 6:​10-​14, 22-​24) Naaso, annkyɛr na Jesus ne nkyerɛkyerɛ too hɔn mu pii fintsidua. Ntsi nyimpa a wɔdze enyigye tuu punkum dzii n’ekyir no dze yuu sanee gyaa no hɔ kɔree. (John 6:​48-​56, 60, 61, 66) Dza ɔnye iyi bɔ ebira no, nna Jesus n’asomafo anokwafo no esi hɔn bo dɛ wɔbɛbata no ho. Wɔyɛɛ nhwɛdo pa, kyerɛ dɛ, wɔammfa hɔn adwen ennsi dza ofi biribi mu ba no do, na mbom wɔdze sii hɔn nokwardzi nye wɔnye Jehovah ntamu ebusuabɔ no do.​—John 6:​67-​69.

Ewieisɛm. Aber a esuafo no nyaa hɔn abɔdzin nkrataa no wiei no, hɔn mu kor kenkaan krataa bi a ofi esuafo a woewie skuul yi hɔ dze kyerɛɛ hɔn enyisɔ. Dza Onua Pierce kãe dze wiee dwumadzi no nye dɛ, wiadze no mmbu Nyankopɔn no nkorɔfo a hɔn a woewie Gilead yi so kã ho no dɛ wɔyɛ nyimpa tsitsir bi. (Ndwuma 4:​13; 1 Corinthfo 1:​27-​31) Naaso, Jehovah gye hɛn ahodohyira no to mu, na ɔdze no sunsum krɔnkrɔn no ma hɛn. Onua Pierce kãa dɛ, ɔwɔ mu dɛ bi a Jehovah enyi ronnsɔ hɛn nyimdzee a yɛwɔ no dze, naaso “N’enyi sɔ hɛn nokwardzi, hɛn dɔ, nye mbrɛ yefi hɛn yamu som no no.”