Wɔ March 14, 2015 no, wɔyɛɛ nhyiamu maa hɔn a woewie Ɔweɔn-Aban Gilead Bible Skuul a Ɔtɔ do 138 no wɔ Jehovah Adasefo adzesuabea a ɔwɔ Patterson, New York no. Abaguafo a nna hɔn dodow bor 14,000 na wɔbaa dwumadzi yi ase, a hɔn a wɔwɔ mbea afofor so a wɔnam video do hwɛɛ bi kã ho. Wɔbɔɔ hɛn Ahendzi ndwom afofor anan dze hyɛɛ dwumadzi no ase, na ekyir yi wɔmaa hɔn a woebehyia mu no nyina ho kwan ma wɔtoow bi. a

Geoffrey Jackson, a ɔyɛ Jehovah Adasefo Akwankyerɛ Kuw no munyi na ɔyɛɛ eguamutsenanyi wɔ nhyiamu yi ase. Wɔ no mbue-enyim nsɛm a ɔdze too gua no mu no, ɔhyɛɛ esuafo no nyinara nkuran dɛ mma wɔmmfa hɔn nyimdzee no nnhyɛ hɔn nkotsee hɔnho, na mbom wɔmfa ntsetsee a woenya no mboa afofor.​—2 Timothy 2:2.

Onua Jackson kãa Moses no nhwɛdo no ho asɛm. Odur mber bi no, nna Moses nankasa no buw no na sɛ yɛbɛkã a, wɔdze gyinaa hɔ dɛ bea a wɔsom maa Israelfo no. Naaso, aber a wosii ntamadan no wiei no, hɔ mbom na ɔbɛyɛɛ bea a nna wɔdze nokwar som ma. Ɔda edzi dɛ nna Moses nnyi ho kwan dɛ ɔhɛn ntamadan no no krɔnkrɔn-mu-krɔnkrɔn-bea hɔ; nna dɛm ho kwan no wɔ hɔ ma ɔsɔfopanyin no nkotsee. Naaso, biribiara nnkyerɛ dɛ Moses kasaa tsiaa dɛm nhyehyɛɛ fofor yi. Mbom no ofi nokwardzi mu boaa Aaron wɔ no dwumadzi fofor a nna oenya dɛ ɔsɔfopanyin no mu. (Exodus 33:​7-​11; 40:34, 35) Esuadze no nye ebɛn? Onua Jackson dze kãa ho dɛ, “Ma ho kwan biara a enya no nsom wo bo, naaso, mma nnsõsõ ho kwan no nyina mmbɔ wo bo da.”

“Aso Ebɛma Ahataw Ndze Abɔ Wo Hu?” Iyi nye asɛntsir a nna ɔda ɔkasa a Kenneth Flodin, a ɔyɛ ɔboafo ma Akwankyerɛ Kuw no ne Nkyerɛkyerɛ Egyinatukuw no mae no do. Ɔgyee too mu dɛ esuafo no botum ehyia tsebea ahorow bi a obotum abɔ hɔn hu, tse dɛ ɔtaa anaa dwumadzi ahorow bi a ɔyɛ dzen. Ɔdze asɛm bi a ɔwɔ Leviticus 26:36 no tuu esuafo no fo dɛ, ɔsɛ dɛ wobu tsebea a ɔtsetse dɛm no dɛ ahataw bi a akyenkyen kɛkɛ, na mbom nnyɛ dɛ biribi a worunntum nnyɛ ho hwee bi a. Afei Onua Flodin twee adwen sii ɔsomafo Paul nhwɛdo no do dɛ, osiandɛ ɔdze noho too Jehovah do no ntsi, otumii gyinaa nsɛndzendzen pii ano.​—2 Corinthfo 1:​8, 10.

“Ebɛnadze Na Hom Rohwehwɛ?” Mark Sanderson, a ɔyɛ Akwankyerɛ Kuw no munyi, na ɔmaa ɔkasa a odzi hɔ no. Osusuu ngyinadosɛm a ɔwɔ Mbɛbusɛm 13:12 a ɔkã dɛ, “Enyidado kyɛr a, ɔma akoma yar” no ho. Ɔyɛ awerɛhow dɛ, nyimpa pii na hɔn asetsena nyina abɔ hɔn anomu osiandɛ wɔdze hɔn akoma dzii botae ahorow bi a worunntum ndu ho da, tse dɛ sikapɛ nye dzin a wɔbɛgye ekyir ntsi.

Wɔ Jesus n’aber do no, nna nyimpa binom wɔ John Onumanyi no ho akwanhwɛ bi a ɔmmfata. (Luke 7:​24-​28) Tse dɛ nhwɛdo no, nna bi a wɔrohwɛ kwan dɛ wobohu onyansapɛfo bi a ɔbɔtow hɔn anansesɛm bi dze agyegye hɔn enyi kɛkɛ. Sɛ dɛm dze a, ɔno nna nkyɛ hɔn nsa besi famu, osiandɛ John kyerɛkyerɛɛ nokwasɛm a nna osi pi. Ibia afofor so hwɛɛ kwan dɛ wobohu obi a nna n’afadze yɛ kuntann. Naaso John faa afadze a ɔda famu, na osiesiee noho tse dɛ ma ehiafo siesie hɔnho no ara pɛr. Naaso, hɔn a nna wɔrohwɛ nkɔnhyɛnyi kwan no dze, nna hɔn nsa rinnsi famu, osiandɛ nna nnyɛ dɛ John yɛ nkɔnhyɛnyi kɛkɛ na mbom ɔbɛprapraa kwan mu maa Messiah no so!​—John 1:​29.

Aber a Onua Sanderson rekyerɛ esuafo no esuadze a ɔwɔ asɛm no mu no, ɔtotɔe serɛɛ hɔn dɛ wɔnhwehwɛ dza ɔfata no. Ntsi, wɔ hɔn dwumadzi ahorow mu no, dɛ nkyɛ wɔbɔtwe adwen esi hɔnho do anaa wɔbɛma afofor asom hɔn no, ɔsɛ dɛ wɔdze hɔn adwen si mbrɛ wobotum dze ntsetsee a woenya no aboa afofor no do mbom. Wobotum ayɛ iyi dze nam ndzɛmba a woesũa wɔ Gilead a wɔnye afofor bɛkyɛ, nye hɔn nuanom a wɔbɛhyɛ hɔn gyedzi dzen na wɔadɔ hɔn no do. Onua Sanderson kãa dɛ, “hwɛ dɛ ebɛyɛ akowaa a ɔbrɛ noho adze wɔ wo nuanom ntamu, na bɔ mbɔdzen dɛ ebɛyɛ Jehovah n’apɛdze ewie.” Ɔdze toaa do dɛ, “na wo nsa rinnsi famu da.”

“Ma Hɔn A Ɔkɔm Dze Hɔn No Edziban.” Iyi nye asɛntsir a James Cauthon a ɔyɛ ɔkyerɛkyerɛfo wɔ Dwumadzibea a Wɔhwɛ Theocracy Skuul Ahorow Do no kãa ho asɛm. Onua Cauthon twee adwen sii do dɛ ɔkɔm bi dze obiara, a ɔnye dɛ obiara pɛ dɛ wɔdɔ no, wɔkyerɛ no ho enyisɔ, na wɔgye no to mu. Nna Jesus mpo wɔ dɛm ehiadze yi, na Jehovah dzii ho dwuma dze nam nsɛm a ɔma akomatɔyamu a ɔkãe wɔ Jesus n’enuma no mu no do.​—Matthew 3:​16, 17.

Jehovah ama hɛn tum dɛ yɛmfa hɛn anomu asɛm nhyɛ afofor nkuran na yɛnhyɛ hɔn dzen, na ɔhwɛ kwan dɛ yɛdze dɛm tum no bedzi dwuma. (Mbɛbusɛm 3:​27) Onua Cauthon kãa dɛ, “Tsetse woho dɛ ebɔhwehwɛ adze papa wɔ afofor ho, na fi wo pɛ mu kamfo hɔn.” Nkamfo a ofi akoma mu no bɔboa hɛn mfɛfo agyedzifo no ma woeebohu dɛ mfaso wɔ hɔn mbɔdzembɔ no do.

“Tu Woho Ma Koraa.” Mark Noumair, a ɔyɛ ɔboafo ma Akwankyerɛ Kuw no ne Nkyerɛkyerɛ Egyinatukuw no, na ɔmaa ɔkasa a odzi hɔ no. Aber a Onua Noumair rekã ɔsomafo Paul no nhwɛdo no ho asɛm no, ɔhyɛɛ esuafo no nkuran dɛ wɔnyɛ pii mbor dza wɔhwehwɛ fi hɔn hɔ no. Mbom, tse dɛ Paul no, sɛ wɔpra hɔn yamu tu hɔnho ma dze som hɔn nuanom a, wobenya enyigye ankasa.​—Philippifo 2:​17, 18.

Aber a nna Paul rihyia nsɛndzendzen mpo no, ɔammpa abaw. Osiandɛ Paul kɔr do yeer noho kesii no wuber mu ntsi, yebotum akã dɛ ɔdze noho mae koraa. Nna obotum akã no wɔ nokwar mu dɛ: “mewie mbirika no tu.” (2 Timothy 4:​6, 7) Onua Noumair hyɛɛ esuafo no nkuran dɛ wonsũasua Paul dze nam nokwardzi mu a wobefi aboa Ahendzi edwuma no wɔ beebiara a wɔbɔsom no mu.

Osuahu Ahorow. Michael Burnett, a no so yɛ Gilead kyerɛkyerɛnyi na ɔyɛɛ nhyiamu no ne fã a odzi hɔ no. Wɔ ɔfã yi, esuafo no mu bi yɛɛ asɛnka mu suahu ahorow a wonyae wɔ aber a nna wɔwɔ Patterson no ho ɔyɛkyerɛ.

Sɛ esuafo no ma hɔn enyi da hɔ wɔ ho kwan ahorow a obue ma hɔn dɛ wobedzi dase no ho, na wɔbɔ mbɔdzen dɛ wɔbɛkã asɛm no wɔ “kasa a ɔda nkorɔfo akoma do”​—kyerɛ obi no kurow mu kasa mu a, ɔtaa sow aba paa. Dɛ nhwɛdo no, osuanyi kor nyaa no ntsee dɛ hɔn a wɔkã Spanish kasa pii wɔ asaasesin a nna ɔreyɛ nhyehyɛɛ akɛyɛ mu edwuma no mu. Ntsi, da kor bi, ansaana oribefi fie akɔ asɛnka no, ɔfaa JW Language app no do sũaa nsɛmfua kakraabi, wɔ Spanish mu. Dɛm da noara, ohyiaa ɔbarimba bi wɔ sitiitsi do a ɔkã Spanish. Ɔdze Spanish kakra a oesũa no nye no hyɛɛ nkɔmbɔtwetwe ase, na ekyir yi okowiee Bible adzesua mu a, banyin no n’ebusuafo mu baanan kã ho.

Nsɛm A Wobisabisa. Dza odzi hɔ no, William Turner, Jr., a ɔyɛ ɔboafo ma Ɔsom Edwuma Egyinatukuw no, bisabisaa esuafo no mu baanan nsɛm faa osuahu ahorow a wonyae ansaana wɔreba Gilead nye afei ntsetsee a woenya efi skuul no mu no ho asɛm.

Esuafo no dze ndzɛmba a wosũae wɔ skuul no mu a ɔhyɛ nkuran no too gua. Dɛ nhwɛdo no, osuanyi kor kãa dza oesũa efi asɛm a ɔwɔ Luke tsir 10 no mu. Jesus n’esuafo 70 a ɔsomaa hɔn no enyi gyei aber wohun dɛ hɔn nkyerɛkyerɛ no asow aba no. Ɔwɔ mu dɛ Jesus so enyi gyei dze, naaso ɔkyerɛkyerɛɛ n’esuafo no dɛ ɔnnsɛ dɛ wɔma hɔn enyigye no gyina dza oefi dza wɔyɛe no mu aba no nkotsee do, na mbom ne tsitsir no dɛ wobohu dɛ Jehovah enyi sɔ hɔn mbɔdzembɔ no do. Iyi kaa hɛn dɛ Jehovah n’enyim adom a yebenya no na ɔdze nokwar enyigye ba, na mbom ɔnnyɛ tsebea a woetwa hɛn ho ehyia bi a.

Onua Turner kãa asɛm a ɔwɔ Philippifo 1:6 no ma ɔfaa esuafo noho dze maa hɔn awerɛhyɛmu dɛ, Jehovah ‘ahyɛ edwuma pa ase’ wɔ hɔn mu na dɛ Jehovah bɔkɔ do akã hɔn ho.

“Kɔ Do Fa W’enyiwa Tsim Jehovah Do.” Samuel Herd, a ɔyɛ Jehovah Adasefo Akwankyerɛ Kuw no munyi, na ɔmaa dwumadzi no mu ɔkasa tsitsir no. Ɔgyee too mu dɛ yerunntum mmfa hɛn enyiwa ankasa nnhu Jehovah. Ɔbɛyɛ dɛn na yɛdze hɛn enyiwa eetsim no do?

Ɔkwan kor a yehu Jehovah nye dɛ yebosusu ndzɛmba a ɔabɔ, a ɔkã no ho nsɛm pii kyerɛ hɛn no ho. Bio so, Jehovah ama ‘hɛn adwen enyi atsew.’ (Ephesusfo 1:​18) Mpɛn dodow a yɛkenkan Bible no, mpɛn dodow noara na yesũa Jehovah no ho adze. Na mpɛn dodow so a yesũa Jehovah no ho adze pii no, mpɛn dodow noara na yɛtse nkã dɛ yɛbɛn no kɛse.

Nsɛmpa anan no tsitsir na yɛbɛpɛ dɛ yesũa no yie, osiandɛ yehu Jesus n’anomu nsɛm nye ne ndzeyɛɛ wɔ mu, na iyi na ɔma yehu Jehovah yie. Jesus daa Jehovah no suban edzi ara ma ɔkãa dɛ: “Nyia oehu me no, oehu Egya no.”​—John 14:9.

Onua Herd hyɛɛ etsiefo no nkuran dɛ ɔnnyɛ hu nkotsee na ɔsɛ dɛ wɔfa Jesus no nhwɛdo no do hu Jehovah, na mbom ɔsɛ dɛ wosũasua dza wohu no so. Tse dɛ nhwɛdo no, dɛ mbrɛ Jesus kum noho maa afofor edziban no, dɛmara so na yɛbɔ mbɔdzen dɛ yɛnye afofor bɛkyɛ sunsum afamu edziban a hɛn nsa akã no.

Mfaso bɛn na obefi hɛn enyiwa a yɛbɔkɔ do dze etsim Jehovah do no mu aba? Yebotum enya awerɛhyɛmu kor noara a ɔdwontofo no nyae no bi aber a ɔkyerɛɛw dɛ: “Medze Ewuradze [Jehovah] esi m’enyim daa: Osiandɛ ɔwɔ m’enyimfa ntsi, murunntutu.”​—Ndwom 16:8.

Ewieisɛm. Aber a esuafo no nyaa hɔn abɔdzin nkrataa no wiei no, hɔn mu kor kenkaan krataa bi a ɔkã akoma a ofi esuafo a woewie skuul yi hɔ dze kyerɛɛ enyisɔ. Ɔno n’ekyir no Onua Jackson dze dwumadzi no baa ewiei wɔ aber a ɔkãa kyerɛɛ hɔn a woewie skuul yi dɛ, ɔnnsɛ dɛ wɔtse nkã dɛ ɔsɛ dɛ biribiara a wɔbɛkyerɛkyerɛ no yɛ fofor anaadɛ no mu dɔ. Mpɛn pii no, dza wɔbɛyɛ ara nye dɛ wɔbɛkaakaa hɔn nuanom mbanyimfo na mbasiafo no dza wonyim no dadaw noara. Onua Jackson sanee sii do dua dɛ ohia dɛ wonya ahobrɛadze. Dɛ nkyɛ wɔbɔtwe adwen esi hɔnho do anaa Gilead ntsetsee a woenya no do no, ɔsɛ dɛ wɔdan afofor adwen kɔ Bible no nye Bible ho nwoma ahorow no do mbom. Ntsi, dɛ nkyɛ hɔn a woewie skuul yi bobu afofor a ibia worinnya ho kwan da dɛ wɔbɔkɔ Gilead skuul no bi no abaw mu no, ɔsɛ dɛ wɔhyɛ hɔn mfɛfo agyedzifo nkuran mbom. Wɔyɛ iyi dze nam dɛ wɔbɔboa enuanom no ma woeenya sunsum afamu nhyehyɛɛ ahorow a ɔbɛn hɔn no do mfaso. Hɔn a wɔbaa nhyiamu yi ase no nyinara fii hɔ no, nna wɔahyɛ hɔn dzen na woesi hɔn bo dɛ wɔbɔsom hɔn nuanom.