Ahɔho ɔpepem pii a wofifi wiadze mfɛndzanan nyina boaboaa hɔnho ano kɔr Rouen esutsen no ano wɔ France etsifi afamu ofitsi June 6 kesii 16, 2013. Wɔkɔhwɛɛ po do ahɛn ho yikyerɛ bi a ɔyɛ fɛw na ɔsõ sen biara a wɔayɛ no mu kor, wɔato no dzin Armada.

Wɔdze po do ahɛn yi a ɔkrɔn na ɔyɛ fɛw paa wɔ wiadze yi mu no faa Seine esutsen nkyeakyeae a ɔda Normandy kurow fɛɛfɛw mu no do twaa kwan kilomita 120 (akwansin 75). Na afei, wɔbɛhyehyɛɛ ahɛn no wɔ bamba bi a ne kɛse yɛ kilomita 7 (akwansin 4), a woesi no wɔ esutsen no ho dɛ wɔdze bɛhyɛ dɛm fã yi no n’enyim. Bɔbor dɛm nda du yi ntamu no, ahɔho nyaa ho kwan soronko foow dɛm ahɛn akɛse 45 a agye dzin yi, na wɔkɔr mu aprɔw.

Ebɛnadze na okenyaan dɛm nkorɔfo pii yi a ɔsosor mfe a woedzi yi ma wɔkɔr Armada no bi? Dwumadzi yi ne fabafo nye ne hyehyɛfo no kãa dɛ, Armada no ma hɔn ho kwan ma “wɔbɛn dɛm ‘Po do Abran’ yi a yɛsoso ho adaa yi.” Nokwasɛm nye dɛ, dɛm po do ahɛn akɛseakɛse yi ma nyimpa pii a mbofra nye mpanyin kã ho, nya adwen dɛ wobotu kwan akɔ ekyirkyir na woeekenya fahodzi.

Nserahwɛfo mpempem pii nyaa ho kwan so tsiee fahodzi fofor bi so ho asɛm, dza Bible mu nokwar no dze ma no. (John 8:​31, 32) Aber a ahɔho no kɔr aprɔw wɔ Rouen kurow fɛɛfɛw no nye ne kaar kwan a nyimpadodow ayɛ do mã no mu no, wohun trɔk a Jehovah Adasefo ahyehyɛ nwoma ahorow wɔ do no. Sɛ ahɔho no anaa ahɛn no mu edwumayɛfo no bɛn trɔk no bi ho a, Adasefo no ma woyi Bible mu nwoma biara a wɔpɛ kwa. Hɔn a wotwaa mu wɔ hɔ no mu pii enyi gyee asɛm a ɔnye “A World Without Prejudice​—When?” a opuei wɔ Ɔweɔn-Aban mu no ho, na wɔtoo nsa frɛɛ hɔn dɛ wombetsie Bible mu ɔkasa bi wɔ French, Borɔfo, anaa Spanish kasa mu.

Kurow mu hɔfo no kyerɛɛ enyisɔ dɛ Adasefo no yɛɛ dɛm. Ɔbarimba kor bi a ahyɛse no ɔyɛɛ no nwanwa dɛ Adasefo no gyina trɔk a wɔahyehyɛ nwoma wɔ do ho wɔ baguamu no kãa dɛ: “Ɔyɛ me enyigye dɛ mehu hom wɔ kwan mu ha. Ɔwɔ mu dɛ menngye hom gyedzi ahorow no nndzi dze, naaso mowɔ obu kɛse paa ma nyimpa a wotum taa hɔn gyedzi ekyir dɛm.” Mbarimba mpanyimfo beenu bi kãa kyerɛɛ Adasefo mbabun beenu bi a wɔreyɛ baguamu adasedzi yi bi no dɛ: “Ɔsɛ dɛ hom dze hyehyɛ homho dɛ hom yɛ Adasefo!”